{
  "bookId": "tanach-amos",
  "part": "1",
  "torah": "9",
  "title": "Amos Chapter 9",
  "hebrewTitle": "עמוס פרק ט",
  "sourceUrl": "/reader/tanach-amos/1/9",
  "plainUrl": "/reader-plain/tanach-amos/1/9/",
  "segments": [
    {
      "index": 1,
      "he": "ראיתי את אדני נצב על המזבח ויאמר הך הכפתור וירעשו הספים ובצעם בראש כלם ואחריתם בחרב אהרג לא ינוס להם נס ולא ימלט להם פליט:",
      "en": ""
    },
    {
      "index": 2,
      "he": "אם יחתרו בשאול משם ידי תקחם ואם יעלו השמים משם אורידם:",
      "en": ""
    },
    {
      "index": 3,
      "he": "ואם יחבאו בראש הכרמל משם אחפש ולקחתים ואם יסתרו מנגד עיני בקרקע הים משם אצוה את הנחש ונשכם:",
      "en": ""
    },
    {
      "index": 4,
      "he": "ואם ילכו בשבי לפני איביהם משם אצוה את החרב והרגתם ושמתי עיני עליהם לרעה ולא לטובה:",
      "en": ""
    },
    {
      "index": 5,
      "he": "ואדני יהוה הצבאות הנוגע בארץ ותמוג ואבלו כל יושבי בה ועלתה כיאר כלה ושקעה כיאר מצרים:",
      "en": ""
    },
    {
      "index": 6,
      "he": "הבונה בשמים (מעלותו) מעלותיו ואגדתו על ארץ יסדה הקרא למי הים וישפכם על פני הארץ יהוה שמו:",
      "en": ""
    },
    {
      "index": 7,
      "he": "הלוא כבני כשיים אתם לי בני ישראל נאם יהוה הלוא את ישראל העליתי מארץ מצרים ופלשתיים מכפתור וארם מקיר:",
      "en": ""
    },
    {
      "index": 8,
      "he": "הנה עיני אדני יהוה בממלכה החטאה והשמדתי אתה מעל פני האדמה אפס כי לא השמיד אשמיד את בית יעקב נאם יהוה:",
      "en": ""
    },
    {
      "index": 9,
      "he": "כי הנה אנכי מצוה והנעותי בכל הגוים את בית ישראל כאשר ינוע בכברה ולא יפול צרור ארץ:",
      "en": ""
    },
    {
      "index": 10,
      "he": "בחרב ימותו כל חטאי עמי האמרים לא תגיש ותקדים בעדינו הרעה:",
      "en": ""
    },
    {
      "index": 11,
      "he": "ביום ההוא אקים את סכת דויד הנפלת וגדרתי את פרציהן והרסתיו אקים ובניתיה כימי עולם:",
      "en": ""
    },
    {
      "index": 12,
      "he": "למען יירשו את שארית אדום וכל הגוים אשר נקרא שמי עליהם נאם יהוה עשה זאת: (פ)",
      "en": ""
    },
    {
      "index": 13,
      "he": "הנה ימים באים נאם יהוה ונגש חורש בקצר ודרך ענבים במשך הזרע והטיפו ההרים עסיס וכל הגבעות תתמוגגנה:",
      "en": ""
    },
    {
      "index": 14,
      "he": "ושבתי את שבות עמי ישראל ובנו ערים נשמות וישבו ונטעו כרמים ושתו את יינם ועשו גנות ואכלו את פריהם:",
      "en": ""
    },
    {
      "index": 15,
      "he": "ונטעתים על אדמתם ולא ינתשו עוד מעל אדמתם אשר נתתי להם אמר יהוה אלהיך: (פפפ)",
      "en": ""
    }
  ]
}