Numbers Chapter 11
במדבר פרק יא
Source: https://ajew.org/reader/tanach-bamidbar/1/11

Segment 1
HE:
ויהי העם כמתאננים רע באזני יהוה וישמע יהוה ויחר אפו ותבער בם אש יהוה ותאכל בקצה המחנה:

Segment 2
HE:
ויצעק העם אל משה ויתפלל משה אל יהוה ותשקע האש:

Segment 3
HE:
ויקרא שם המקום ההוא תבערה כי בערה בם אש יהוה:

Segment 4
HE:
והאספסף אשר בקרבו התאוו תאוה וישבו ויבכו גם בני ישראל ויאמרו מי יאכלנו בשר:

Segment 5
HE:
זכרנו את הדגה אשר נאכל במצרים חנם את הקשאים ואת האבטחים ואת החציר ואת הבצלים ואת השומים:

Segment 6
HE:
ועתה נפשנו יבשה אין כל בלתי אל המן עינינו:

Segment 7
HE:
והמן כזרע גד הוא ועינו כעין הבדלח:

Segment 8
HE:
שטו העם ולקטו וטחנו ברחים או דכו במדכה ובשלו בפרור ועשו אתו עגות והיה טעמו כטעם לשד השמן:

Segment 9
HE:
וברדת הטל על המחנה לילה ירד המן עליו:

Segment 10
HE:
וישמע משה את העם בכה למשפחתיו איש לפתח אהלו ויחר אף יהוה מאד ובעיני משה רע:

Segment 11
HE:
ויאמר משה אל יהוה למה הרעת לעבדך ולמה לא מצתי חן בעיניך לשום את משא כל העם הזה עלי:

Segment 12
HE:
האנכי הריתי את כל העם הזה אם אנכי ילדתיהו כי תאמר אלי שאהו בחיקך כאשר ישא האמן את הינק על האדמה אשר נשבעת לאבתיו:

Segment 13
HE:
מאין לי בשר לתת לכל העם הזה כי יבכו עלי לאמר תנה לנו בשר ונאכלה:

Segment 14
HE:
לא אוכל אנכי לבדי לשאת את כל העם הזה כי כבד ממני:

Segment 15
HE:
ואם ככה את עשה לי הרגני נא הרג אם מצאתי חן בעיניך ואל אראה ברעתי: (פ)

Segment 16
HE:
ויאמר יהוה אל משה אספה לי שבעים איש מזקני ישראל אשר ידעת כי הם זקני העם ושטריו ולקחת אתם אל אהל מועד והתיצבו שם עמך:

Segment 17
HE:
וירדתי ודברתי עמך שם ואצלתי מן הרוח אשר עליך ושמתי עליהם ונשאו אתך במשא העם ולא תשא אתה לבדך:

Segment 18
HE:
ואל העם תאמר התקדשו למחר ואכלתם בשר כי בכיתם באזני יהוה לאמר מי יאכלנו בשר כי טוב לנו במצרים ונתן יהוה לכם בשר ואכלתם:

Segment 19
HE:
לא יום אחד תאכלון ולא יומים ולא חמשה ימים ולא עשרה ימים ולא עשרים יום:

Segment 20
HE:
עד חדש ימים עד אשר יצא מאפכם והיה לכם לזרא יען כי מאסתם את יהוה אשר בקרבכם ותבכו לפניו לאמר למה זה יצאנו ממצרים:

Segment 21
HE:
ויאמר משה שש מאות אלף רגלי העם אשר אנכי בקרבו ואתה אמרת בשר אתן להם ואכלו חדש ימים:

Segment 22
HE:
הצאן ובקר ישחט להם ומצא להם אם את כל דגי הים יאסף להם ומצא להם: (פ)

Segment 23
HE:
ויאמר יהוה אל משה היד יהוה תקצר עתה תראה היקרך דברי אם לא:

Segment 24
HE:
ויצא משה וידבר אל העם את דברי יהוה ויאסף שבעים איש מזקני העם ויעמד אתם סביבת האהל:

Segment 25
HE:
וירד יהוה בענן וידבר אליו ויאצל מן הרוח אשר עליו ויתן על שבעים איש הזקנים ויהי כנוח עליהם הרוח ויתנבאו ולא יספו:

Segment 26
HE:
וישארו שני אנשים במחנה שם האחד אלדד ושם השני מידד ותנח עלהם הרוח והמה בכתבים ולא יצאו האהלה ויתנבאו במחנה:

Segment 27
HE:
וירץ הנער ויגד למשה ויאמר אלדד ומידד מתנבאים במחנה:

Segment 28
HE:
ויען יהושע בן נון משרת משה מבחריו ויאמר אדני משה כלאם:

Segment 29
HE:
ויאמר לו משה המקנא אתה לי ומי יתן כל עם יהוה נביאים כי יתן יהוה את רוחו עליהם:

Segment 30
HE:
שביעי  ויאסף משה אל המחנה הוא וזקני ישראל:

Segment 31
HE:
ורוח נסע מאת יהוה ויגז שלוים מן הים ויטש על המחנה כדרך יום כה וכדרך יום כה סביבות המחנה וכאמתים על פני הארץ:

Segment 32
HE:
ויקם העם כל היום ההוא וכל הלילה וכל יום המחרת ויאספו את השלו הממעיט אסף עשרה חמרים וישטחו להם שטוח סביבות המחנה:

Segment 33
HE:
הבשר עודנו בין שניהם טרם יכרת ואף יהוה חרה בעם ויך יהוה בעם מכה רבה מאד:

Segment 34
HE:
ויקרא את שם המקום ההוא קברות התאוה כי שם קברו את העם המתאוים:

Segment 35
HE:
מקברות התאוה נסעו העם חצרות ויהיו בחצרות: (פ)