Numbers Chapter 22
במדבר פרק כב
Source: https://ajew.org/reader/tanach-bamidbar/1/22

Segment 1
HE:
ויסעו בני ישראל ויחנו בערבות מואב מעבר לירדן ירחו: (פפפ)

Segment 2
HE:
וירא בלק בן צפור את כל אשר עשה ישראל לאמרי:

Segment 3
HE:
ויגר מואב מפני העם מאד כי רב הוא ויקץ מואב מפני בני ישראל:

Segment 4
HE:
ויאמר מואב אל זקני מדין עתה ילחכו הקהל את כל סביבתינו כלחך השור את ירק השדה ובלק בן צפור מלך למואב בעת ההוא:

Segment 5
HE:
וישלח מלאכים אל בלעם בן בער פתורה אשר על הנהר ארץ בני עמו לקרא לו לאמר הנה עם יצא ממצרים הנה כסה את עין הארץ והוא ישב ממלי:

Segment 6
HE:
ועתה לכה נא ארה לי את העם הזה כי עצום הוא ממני אולי אוכל נכה בו ואגרשנו מן הארץ כי ידעתי את אשר תברך מברך ואשר תאר יואר:

Segment 7
HE:
וילכו זקני מואב וזקני מדין וקסמים בידם ויבאו אל בלעם וידברו אליו דברי בלק:

Segment 8
HE:
ויאמר אליהם לינו פה הלילה והשבתי אתכם דבר כאשר ידבר יהוה אלי וישבו שרי מואב עם בלעם:

Segment 9
HE:
ויבא אלהים אל בלעם ויאמר מי האנשים האלה עמך:

Segment 10
HE:
ויאמר בלעם אל האלהים בלק בן צפר מלך מואב שלח אלי:

Segment 11
HE:
הנה העם היצא ממצרים ויכס את עין הארץ עתה לכה קבה לי אתו אולי אוכל להלחם בו וגרשתיו:

Segment 12
HE:
ויאמר אלהים אל בלעם לא תלך עמהם לא תאר את העם כי ברוך הוא:

Segment 13
HE:
שני - במחוברות חמישי  ויקם בלעם בבקר ויאמר אל שרי בלק לכו אל ארצכם כי מאן יהוה לתתי להלך עמכם:

Segment 14
HE:
ויקומו שרי מואב ויבאו אל בלק ויאמרו מאן בלעם הלך עמנו:

Segment 15
HE:
ויסף עוד בלק שלח שרים רבים ונכבדים מאלה:

Segment 16
HE:
ויבאו אל בלעם ויאמרו לו כה אמר בלק בן צפור אל נא תמנע מהלך אלי:

Segment 17
HE:
כי כבד אכבדך מאד וכל אשר תאמר אלי אעשה ולכה נא קבה לי את העם הזה:

Segment 18
HE:
ויען בלעם ויאמר אל עבדי בלק אם יתן לי בלק מלא ביתו כסף וזהב לא אוכל לעבר את פי יהוה אלהי לעשות קטנה או גדולה:

Segment 19
HE:
ועתה שבו נא בזה גם אתם הלילה ואדעה מה יסף יהוה דבר עמי:

Segment 20
HE:
ויבא אלהים אל בלעם לילה ויאמר לו אם לקרא לך באו האנשים קום לך אתם ואך את הדבר אשר אדבר אליך אתו תעשה:

Segment 21
HE:
שלישי  ויקם בלעם בבקר ויחבש את אתנו וילך עם שרי מואב:

Segment 22
HE:
ויחר אף אלהים כי הולך הוא ויתיצב מלאך יהוה בדרך לשטן לו והוא רכב על אתנו ושני נעריו עמו:

Segment 23
HE:
ותרא האתון את מלאך יהוה נצב בדרך וחרבו שלופה בידו ותט האתון מן הדרך ותלך בשדה ויך בלעם את האתון להטתה הדרך:

Segment 24
HE:
ויעמד מלאך יהוה במשעול הכרמים גדר מזה וגדר מזה:

Segment 25
HE:
ותרא האתון את מלאך יהוה ותלחץ אל הקיר ותלחץ את רגל בלעם אל הקיר ויסף להכתה:

Segment 26
HE:
ויוסף מלאך יהוה עבור ויעמד במקום צר אשר אין דרך לנטות ימין ושמאול:

Segment 27
HE:
ותרא האתון את מלאך יהוה ותרבץ תחת בלעם ויחר אף בלעם ויך את האתון במקל:

Segment 28
HE:
ויפתח יהוה את פי האתון ותאמר לבלעם מה עשיתי לך כי הכיתני זה שלש רגלים:

Segment 29
HE:
ויאמר בלעם לאתון כי התעללת בי לו יש חרב בידי כי עתה הרגתיך:

Segment 30
HE:
ותאמר האתון אל בלעם הלוא אנכי אתנך אשר רכבת עלי מעודך עד היום הזה ההסכן הסכנתי לעשות לך כה ויאמר לא:

Segment 31
HE:
ויגל יהוה את עיני בלעם וירא את מלאך יהוה נצב בדרך וחרבו שלפה בידו ויקד וישתחו לאפיו:

Segment 32
HE:
ויאמר אליו מלאך יהוה על מה הכית את אתנך זה שלוש רגלים הנה אנכי יצאתי לשטן כי ירט הדרך לנגדי:

Segment 33
HE:
ותראני האתון ותט לפני זה שלש רגלים אולי נטתה מפני כי עתה גם אתכה הרגתי ואותה החייתי:

Segment 34
HE:
ויאמר בלעם אל מלאך יהוה חטאתי כי לא ידעתי כי אתה נצב לקראתי בדרך ועתה אם רע בעיניך אשובה לי:

Segment 35
HE:
ויאמר מלאך יהוה אל בלעם לך עם האנשים ואפס את הדבר אשר אדבר אליך אתו תדבר וילך בלעם עם שרי בלק:

Segment 36
HE:
וישמע בלק כי בא בלעם ויצא לקראתו אל עיר מואב אשר על גבול ארנן אשר בקצה הגבול:

Segment 37
HE:
ויאמר בלק אל בלעם הלא שלח שלחתי אליך לקרא לך למה לא הלכת אלי האמנם לא אוכל כבדך:

Segment 38
HE:
ויאמר בלעם אל בלק הנה באתי אליך עתה היכל אוכל דבר מאומה הדבר אשר ישים אלהים בפי אתו אדבר:

Segment 39
HE:
רביעי - במחוברות ששי  וילך בלעם עם בלק ויבאו קרית חצות:

Segment 40
HE:
ויזבח בלק בקר וצאן וישלח לבלעם ולשרים אשר אתו:

Segment 41
HE:
ויהי בבקר ויקח בלק את בלעם ויעלהו במות בעל וירא משם קצה העם: