Numbers Chapter 23
במדבר פרק כג
Source: https://ajew.org/reader/tanach-bamidbar/1/23

Segment 1
HE:
ויאמר בלעם אל בלק בנה לי בזה שבעה מזבחת והכן לי בזה שבעה פרים ושבעה אילים:

Segment 2
HE:
ויעש בלק כאשר דבר בלעם ויעל בלק ובלעם פר ואיל במזבח:

Segment 3
HE:
ויאמר בלעם לבלק התיצב על עלתך ואלכה אולי יקרה יהוה לקראתי ודבר מה יראני והגדתי לך וילך שפי:

Segment 4
HE:
ויקר אלהים אל בלעם ויאמר אליו את שבעת המזבחת ערכתי ואעל פר ואיל במזבח:

Segment 5
HE:
וישם יהוה דבר בפי בלעם ויאמר שוב אל בלק וכה תדבר:

Segment 6
HE:
וישב אליו והנה נצב על עלתו הוא וכל שרי מואב:

Segment 7
HE:
וישא משלו ויאמר מן ארם ינחני בלק מלך מואב מהררי קדם לכה ארה לי יעקב ולכה זעמה ישראל:

Segment 8
HE:
מה אקב לא קבה אל ומה אזעם לא זעם יהוה:

Segment 9
HE:
כי מראש צרים אראנו ומגבעות אשורנו הן עם לבדד ישכן ובגוים לא יתחשב:

Segment 10
HE:
מי מנה עפר יעקב ומספר את רבע ישראל תמת נפשי מות ישרים ותהי אחריתי כמהו:

Segment 11
HE:
ויאמר בלק אל בלעם מה עשית לי לקב איבי לקחתיך והנה ברכת ברך:

Segment 12
HE:
ויען ויאמר הלא את אשר ישים יהוה בפי אתו אשמר לדבר:

Segment 13
HE:
חמישי  ויאמר אליו בלק לך נא אתי אל מקום אחר אשר תראנו משם אפס קצהו תראה וכלו לא תראה וקבנו לי משם:

Segment 14
HE:
ויקחהו שדה צפים אל ראש הפסגה ויבן שבעה מזבחת ויעל פר ואיל במזבח:

Segment 15
HE:
ויאמר אל בלק התיצב כה על עלתך ואנכי אקרה כה:

Segment 16
HE:
ויקר יהוה אל בלעם וישם דבר בפיו ויאמר שוב אל בלק וכה תדבר:

Segment 17
HE:
ויבא אליו והנו נצב על עלתו ושרי מואב אתו ויאמר לו בלק מה דבר יהוה:

Segment 18
HE:
וישא משלו ויאמר קום בלק ושמע האזינה עדי בנו צפר:

Segment 19
HE:
לא איש אל ויכזב ובן אדם ויתנחם ההוא אמר ולא יעשה ודבר ולא יקימנה:

Segment 20
HE:
הנה ברך לקחתי וברך ולא אשיבנה:

Segment 21
HE:
לא הביט און ביעקב ולא ראה עמל בישראל יהוה אלהיו עמו ותרועת מלך בו:

Segment 22
HE:
אל מוציאם ממצרים כתועפת ראם לו:

Segment 23
HE:
כי לא נחש ביעקב ולא קסם בישראל כעת יאמר ליעקב ולישראל מה פעל אל:

Segment 24
HE:
הן עם כלביא יקום וכארי יתנשא לא ישכב עד יאכל טרף ודם חללים ישתה:

Segment 25
HE:
ויאמר בלק אל בלעם גם קב לא תקבנו גם ברך לא תברכנו:

Segment 26
HE:
ויען בלעם ויאמר אל בלק הלא דברתי אליך לאמר כל אשר ידבר יהוה אתו אעשה:

Segment 27
HE:
שישי - במחוברות שביעי  ויאמר בלק אל בלעם לכה נא אקחך אל מקום אחר אולי יישר בעיני האלהים וקבתו לי משם:

Segment 28
HE:
ויקח בלק את בלעם ראש הפעור הנשקף על פני הישימן:

Segment 29
HE:
ויאמר בלעם אל בלק בנה לי בזה שבעה מזבחת והכן לי בזה שבעה פרים ושבעה אילם:

Segment 30
HE:
ויעש בלק כאשר אמר בלעם ויעל פר ואיל במזבח: