Genesis Chapter 20
בראשית פרק כ
Source: https://ajew.org/reader/tanach-bereishit/1/20

Segment 1
HE:
ויסע משם אברהם ארצה הנגב וישב בין קדש ובין שור ויגר בגרר:

Segment 2
HE:
ויאמר אברהם אל שרה אשתו אחתי הוא וישלח אבימלך מלך גרר ויקח את שרה:

Segment 3
HE:
ויבא אלהים אל אבימלך בחלום הלילה ויאמר לו הנך מת על האשה אשר לקחת והוא בעלת בעל:

Segment 4
HE:
ואבימלך לא קרב אליה ויאמר אדני הגוי גם צדיק תהרג:

Segment 5
HE:
הלא הוא אמר לי אחתי הוא והיא גם הוא אמרה אחי הוא בתם לבבי ובנקין כפי עשיתי זאת:

Segment 6
HE:
ויאמר אליו האלהים בחלם גם אנכי ידעתי כי בתם לבבך עשית זאת ואחשך גם אנכי אותך מחטו לי על כן לא נתתיך לנגע אליה:

Segment 7
HE:
ועתה השב אשת האיש כי נביא הוא ויתפלל בעדך וחיה ואם אינך משיב דע כי מות תמות אתה וכל אשר לך:

Segment 8
HE:
וישכם אבימלך בבקר ויקרא לכל עבדיו וידבר את כל הדברים האלה באזניהם וייראו האנשים מאד:

Segment 9
HE:
ויקרא אבימלך לאברהם ויאמר לו מה עשית לנו ומה חטאתי לך כי הבאת עלי ועל ממלכתי חטאה גדלה מעשים אשר לא יעשו עשית עמדי:

Segment 10
HE:
ויאמר אבימלך אל אברהם מה ראית כי עשית את הדבר הזה:

Segment 11
HE:
ויאמר אברהם כי אמרתי רק אין יראת אלהים במקום הזה והרגוני על דבר אשתי:

Segment 12
HE:
וגם אמנה אחתי בת אבי הוא אך לא בת אמי ותהי לי לאשה:

Segment 13
HE:
ויהי כאשר התעו אתי אלהים מבית אבי ואמר לה זה חסדך אשר תעשי עמדי אל כל המקום אשר נבוא שמה אמרי לי אחי הוא:

Segment 14
HE:
ויקח אבימלך צאן ובקר ועבדים ושפחת ויתן לאברהם וישב לו את שרה אשתו:

Segment 15
HE:
ויאמר אבימלך הנה ארצי לפניך בטוב בעיניך שב:

Segment 16
HE:
ולשרה אמר הנה נתתי אלף כסף לאחיך הנה הוא לך כסות עינים לכל אשר אתך ואת כל ונכחת:

Segment 17
HE:
ויתפלל אברהם אל האלהים וירפא אלהים את אבימלך ואת אשתו ואמהתיו וילדו:

Segment 18
HE:
כי עצר עצר יהוה בעד כל רחם לבית אבימלך על דבר שרה אשת אברהם: (ס)