Genesis Chapter 24
בראשית פרק כד
Source: https://ajew.org/reader/tanach-bereishit/1/24

Segment 1
HE:
ואברהם זקן בא בימים ויהוה ברך את אברהם בכל:

Segment 2
HE:
ויאמר אברהם אל עבדו זקן ביתו המשל בכל אשר לו שים נא ידך תחת ירכי:

Segment 3
HE:
ואשביעך ביהוה אלהי השמים ואלהי הארץ אשר לא תקח אשה לבני מבנות הכנעני אשר אנכי יושב בקרבו:

Segment 4
HE:
כי אל ארצי ואל מולדתי תלך ולקחת אשה לבני ליצחק:

Segment 5
HE:
ויאמר אליו העבד אולי לא תאבה האשה ללכת אחרי אל הארץ הזאת ההשב אשיב את בנך אל הארץ אשר יצאת משם:

Segment 6
HE:
ויאמר אליו אברהם השמר לך פן תשיב את בני שמה:

Segment 7
HE:
יהוה אלהי השמים אשר לקחני מבית אבי ומארץ מולדתי ואשר דבר לי ואשר נשבע לי לאמר לזרעך אתן את הארץ הזאת הוא ישלח מלאכו לפניך ולקחת אשה לבני משם:

Segment 8
HE:
ואם לא תאבה האשה ללכת אחריך ונקית משבעתי זאת רק את בני לא תשב שמה:

Segment 9
HE:
וישם העבד את ידו תחת ירך אברהם אדניו וישבע לו על הדבר הזה:

Segment 10
HE:
שלישי  ויקח העבד עשרה גמלים מגמלי אדניו וילך וכל טוב אדניו בידו ויקם וילך אל ארם נהרים אל עיר נחור:

Segment 11
HE:
ויברך הגמלים מחוץ לעיר אל באר המים לעת ערב לעת צאת השאבת:

Segment 12
HE:
ויאמר יהוה אלהי אדני אברהם הקרה נא לפני היום ועשה חסד עם אדני אברהם:

Segment 13
HE:
הנה אנכי נצב על עין המים ובנות אנשי העיר יצאת לשאב מים:

Segment 14
HE:
והיה הנער אשר אמר אליה הטי נא כדך ואשתה ואמרה שתה וגם גמליך אשקה אתה הכחת לעבדך ליצחק ובה אדע כי עשית חסד עם אדני:

Segment 15
HE:
ויהי הוא טרם כלה לדבר והנה רבקה יצאת אשר ילדה לבתואל בן מלכה אשת נחור אחי אברהם וכדה על שכמה:

Segment 16
HE:
והנער טבת מראה מאד בתולה ואיש לא ידעה ותרד העינה ותמלא כדה ותעל:

Segment 17
HE:
וירץ העבד לקראתה ויאמר הגמיאיני נא מעט מים מכדך:

Segment 18
HE:
ותאמר שתה אדני ותמהר ותרד כדה על ידה ותשקהו:

Segment 19
HE:
ותכל להשקתו ותאמר גם לגמליך אשאב עד אם כלו לשתת:

Segment 20
HE:
ותמהר ותער כדה אל השקת ותרץ עוד אל הבאר לשאב ותשאב לכל גמליו:

Segment 21
HE:
והאיש משתאה לה מחריש לדעת ההצליח יהוה דרכו אם לא:

Segment 22
HE:
ויהי כאשר כלו הגמלים לשתות ויקח האיש נזם זהב בקע משקלו ושני צמידים על ידיה עשרה זהב משקלם:

Segment 23
HE:
ויאמר בת מי את הגידי נא לי היש בית אביך מקום לנו ללין:

Segment 24
HE:
ותאמר אליו בת בתואל אנכי בן מלכה אשר ילדה לנחור:

Segment 25
HE:
ותאמר אליו גם תבן גם מספוא רב עמנו גם מקום ללון:

Segment 26
HE:
ויקד האיש וישתחו ליהוה:

Segment 27
HE:
רביעי  ויאמר ברוך יהוה אלהי אדני אברהם אשר לא עזב חסדו ואמתו מעם אדני אנכי בדרך נחני יהוה בית אחי אדני:

Segment 28
HE:
ותרץ הנער ותגד לבית אמה כדברים האלה:

Segment 29
HE:
ולרבקה אח ושמו לבן וירץ לבן אל האיש החוצה אל העין:

Segment 30
HE:
ויהי כראת את הנזם ואת הצמדים על ידי אחתו וכשמעו את דברי רבקה אחתו לאמר כה דבר אלי האיש ויבא אל האיש והנה עמד על הגמלים על העין:

Segment 31
HE:
ויאמר בוא ברוך יהוה למה תעמד בחוץ ואנכי פניתי הבית ומקום לגמלים:

Segment 32
HE:
ויבא האיש הביתה ויפתח הגמלים ויתן תבן ומספוא לגמלים ומים לרחץ רגליו ורגלי האנשים אשר אתו:

Segment 33
HE:
(ויישם) ויושם לפניו לאכל ויאמר לא אכל עד אם דברתי דברי ויאמר דבר:

Segment 34
HE:
ויאמר עבד אברהם אנכי:

Segment 35
HE:
ויהוה ברך את אדני מאד ויגדל ויתן לו צאן ובקר וכסף וזהב ועבדם ושפחת וגמלים וחמרים:

Segment 36
HE:
ותלד שרה אשת אדני בן לאדני אחרי זקנתה ויתן לו את כל אשר לו:

Segment 37
HE:
וישבעני אדני לאמר לא תקח אשה לבני מבנות הכנעני אשר אנכי ישב בארצו:

Segment 38
HE:
אם לא אל בית אבי תלך ואל משפחתי ולקחת אשה לבני:

Segment 39
HE:
ואמר אל אדני אלי לא תלך האשה אחרי:

Segment 40
HE:
ויאמר אלי יהוה אשר התהלכתי לפניו ישלח מלאכו אתך והצליח דרכך ולקחת אשה לבני ממשפחתי ומבית אבי:

Segment 41
HE:
אז תנקה מאלתי כי תבוא אל משפחתי ואם לא יתנו לך והיית נקי מאלתי:

Segment 42
HE:
ואבא היום אל העין ואמר יהוה אלהי אדני אברהם אם ישך נא מצליח דרכי אשר אנכי הלך עליה:

Segment 43
HE:
הנה אנכי נצב על עין המים והיה העלמה היצאת לשאב ואמרתי אליה השקיני נא מעט מים מכדך:

Segment 44
HE:
ואמרה אלי גם אתה שתה וגם לגמליך אשאב הוא האשה אשר הכיח יהוה לבן אדני:

Segment 45
HE:
אני טרם אכלה לדבר אל לבי והנה רבקה יצאת וכדה על שכמה ותרד העינה ותשאב ואמר אליה השקיני נא:

Segment 46
HE:
ותמהר ותורד כדה מעליה ותאמר שתה וגם גמליך אשקה ואשת וגם הגמלים השקתה:

Segment 47
HE:
ואשאל אתה ואמר בת מי את ותאמר בת בתואל בן נחור אשר ילדה לו מלכה ואשם הנזם על אפה והצמידים על ידיה:

Segment 48
HE:
ואקד ואשתחוה ליהוה ואברך את יהוה אלהי אדני אברהם אשר הנחני בדרך אמת לקחת את בת אחי אדני לבנו:

Segment 49
HE:
ועתה אם ישכם עשים חסד ואמת את אדני הגידו לי ואם לא הגידו לי ואפנה על ימין או על שמאל:

Segment 50
HE:
ויען לבן ובתואל ויאמרו מיהוה יצא הדבר לא נוכל דבר אליך רע או טוב:

Segment 51
HE:
הנה רבקה לפניך קח ולך ותהי אשה לבן אדניך כאשר דבר יהוה:

Segment 52
HE:
ויהי כאשר שמע עבד אברהם את דבריהם וישתחו ארצה ליהוה:

Segment 53
HE:
חמישי  ויוצא העבד כלי כסף וכלי זהב ובגדים ויתן לרבקה ומגדנת נתן לאחיה ולאמה:

Segment 54
HE:
ויאכלו וישתו הוא והאנשים אשר עמו וילינו ויקומו בבקר ויאמר שלחני לאדני:

Segment 55
HE:
ויאמר אחיה ואמה תשב הנער אתנו ימים או עשור אחר תלך:

Segment 56
HE:
ויאמר אלהם אל תאחרו אתי ויהוה הצליח דרכי שלחוני ואלכה לאדני:

Segment 57
HE:
ויאמרו נקרא לנער ונשאלה את פיה:

Segment 58
HE:
ויקראו לרבקה ויאמרו אליה התלכי עם האיש הזה ותאמר אלך:

Segment 59
HE:
וישלחו את רבקה אחתם ואת מנקתה ואת עבד אברהם ואת אנשיו:

Segment 60
HE:
ויברכו את רבקה ויאמרו לה אחתנו את היי לאלפי רבבה ויירש זרעך את שער שנאיו:

Segment 61
HE:
ותקם רבקה ונערתיה ותרכבנה על הגמלים ותלכנה אחרי האיש ויקח העבד את רבקה וילך:

Segment 62
HE:
ויצחק בא מבוא באר לחי ראי והוא יושב בארץ הנגב:

Segment 63
HE:
ויצא יצחק לשוח בשדה לפנות ערב וישא עיניו וירא והנה גמלים באים:

Segment 64
HE:
ותשא רבקה את עיניה ותרא את יצחק ותפל מעל הגמל:

Segment 65
HE:
ותאמר אל העבד מי האיש הלזה ההלך בשדה לקראתנו ויאמר העבד הוא אדני ותקח הצעיף ותתכס:

Segment 66
HE:
ויספר העבד ליצחק את כל הדברים אשר עשה:

Segment 67
HE:
ויבאה יצחק האהלה שרה אמו ויקח את רבקה ותהי לו לאשה ויאהבה וינחם יצחק אחרי אמו: (פ)