Genesis Chapter 47
בראשית פרק מז
Source: https://ajew.org/reader/tanach-bereishit/1/47

Segment 1
HE:
ויבא יוסף ויגד לפרעה ויאמר אבי ואחי וצאנם ובקרם וכל אשר להם באו מארץ כנען והנם בארץ גשן:

Segment 2
HE:
ומקצה אחיו לקח חמשה אנשים ויצגם לפני פרעה:

Segment 3
HE:
ויאמר פרעה אל אחיו מה מעשיכם ויאמרו אל פרעה רעה צאן עבדיך גם אנחנו גם אבותינו:

Segment 4
HE:
ויאמרו אל פרעה לגור בארץ באנו כי אין מרעה לצאן אשר לעבדיך כי כבד הרעב בארץ כנען ועתה ישבו נא עבדיך בארץ גשן:

Segment 5
HE:
ויאמר פרעה אל יוסף לאמר אביך ואחיך באו אליך:

Segment 6
HE:
ארץ מצרים לפניך הוא במיטב הארץ הושב את אביך ואת אחיך ישבו בארץ גשן ואם ידעת ויש בם אנשי חיל ושמתם שרי מקנה על אשר לי:

Segment 7
HE:
ויבא יוסף את יעקב אביו ויעמדהו לפני פרעה ויברך יעקב את פרעה:

Segment 8
HE:
ויאמר פרעה אל יעקב כמה ימי שני חייך:

Segment 9
HE:
ויאמר יעקב אל פרעה ימי שני מגורי שלשים ומאת שנה מעט ורעים היו ימי שני חיי ולא השיגו את ימי שני חיי אבתי בימי מגוריהם:

Segment 10
HE:
ויברך יעקב את פרעה ויצא מלפני פרעה:

Segment 11
HE:
שביעי  ויושב יוסף את אביו ואת אחיו ויתן להם אחזה בארץ מצרים במיטב הארץ בארץ רעמסס כאשר צוה פרעה:

Segment 12
HE:
ויכלכל יוסף את אביו ואת אחיו ואת כל בית אביו לחם לפי הטף:

Segment 13
HE:
ולחם אין בכל הארץ כי כבד הרעב מאד ותלה ארץ מצרים וארץ כנען מפני הרעב:

Segment 14
HE:
וילקט יוסף את כל הכסף הנמצא בארץ מצרים ובארץ כנען בשבר אשר הם שברים ויבא יוסף את הכסף ביתה פרעה:

Segment 15
HE:
ויתם הכסף מארץ מצרים ומארץ כנען ויבאו כל מצרים אל יוסף לאמר הבה לנו לחם ולמה נמות נגדך כי אפס כסף:

Segment 16
HE:
ויאמר יוסף הבו מקניכם ואתנה לכם במקניכם אם אפס כסף:

Segment 17
HE:
ויביאו את מקניהם אל יוסף ויתן להם יוסף לחם בסוסים ובמקנה הצאן ובמקנה הבקר ובחמרים וינהלם בלחם בכל מקנהם בשנה ההוא:

Segment 18
HE:
ותתם השנה ההוא ויבאו אליו בשנה השנית ויאמרו לו לא נכחד מאדני כי אם תם הכסף ומקנה הבהמה אל אדני לא נשאר לפני אדני בלתי אם גויתנו ואדמתנו:

Segment 19
HE:
למה נמות לעיניך גם אנחנו גם אדמתנו קנה אתנו ואת אדמתנו בלחם ונהיה אנחנו ואדמתנו עבדים לפרעה ותן זרע ונחיה ולא נמות והאדמה לא תשם:

Segment 20
HE:
ויקן יוסף את כל אדמת מצרים לפרעה כי מכרו מצרים איש שדהו כי חזק עלהם הרעב ותהי הארץ לפרעה:

Segment 21
HE:
ואת העם העביר אתו לערים מקצה גבול מצרים ועד קצהו:

Segment 22
HE:
רק אדמת הכהנים לא קנה כי חק לכהנים מאת פרעה ואכלו את חקם אשר נתן להם פרעה על כן לא מכרו את אדמתם:

Segment 23
HE:
ויאמר יוסף אל העם הן קניתי אתכם היום ואת אדמתכם לפרעה הא לכם זרע וזרעתם את האדמה:

Segment 24
HE:
והיה בתבואת ונתתם חמישית לפרעה וארבע הידת יהיה לכם לזרע השדה ולאכלכם ולאשר בבתיכם ולאכל לטפכם:

Segment 25
HE:
מפטיר  ויאמרו החיתנו נמצא חן בעיני אדני והיינו עבדים לפרעה:

Segment 26
HE:
וישם אתה יוסף לחק עד היום הזה על אדמת מצרים לפרעה לחמש רק אדמת הכהנים לבדם לא היתה לפרעה:

Segment 27
HE:
וישב ישראל בארץ מצרים בארץ גשן ויאחזו בה ויפרו וירבו מאד:

Segment 28
HE:
ויחי יעקב בארץ מצרים שבע עשרה שנה ויהי ימי יעקב שני חייו שבע שנים וארבעים ומאת שנה:

Segment 29
HE:
ויקרבו ימי ישראל למות ויקרא לבנו ליוסף ויאמר לו אם נא מצאתי חן בעיניך שים נא ידך תחת ירכי ועשית עמדי חסד ואמת אל נא תקברני במצרים:

Segment 30
HE:
ושכבתי עם אבתי ונשאתני ממצרים וקברתני בקברתם ויאמר אנכי אעשה כדברך:

Segment 31
HE:
ויאמר השבעה לי וישבע לו וישתחו ישראל על ראש המטה: (פ)