{
  "bookId": "tanach-daniel",
  "part": "1",
  "torah": "9",
  "title": "Daniel Chapter 9",
  "hebrewTitle": "דניאל פרק ט",
  "sourceUrl": "/reader/tanach-daniel/1/9",
  "plainUrl": "/reader-plain/tanach-daniel/1/9/",
  "segments": [
    {
      "index": 1,
      "he": "בשנת אחת לדריוש בן אחשורוש מזרע מדי אשר המלך על מלכות כשדים:",
      "en": ""
    },
    {
      "index": 2,
      "he": "בשנת אחת למלכו אני דניאל בינתי בספרים מספר השנים אשר היה דבר יהוה אל ירמיה הנביא למלאות לחרבות ירושלם שבעים שנה:",
      "en": ""
    },
    {
      "index": 3,
      "he": "ואתנה את פני אל אדני האלהים לבקש תפלה ותחנונים בצום ושק ואפר:",
      "en": ""
    },
    {
      "index": 4,
      "he": "ואתפללה ליהוה אלהי ואתודה ואמרה אנא אדני האל הגדול והנורא שמר הברית והחסד לאהביו ולשמרי מצותיו:",
      "en": ""
    },
    {
      "index": 5,
      "he": "חטאנו ועוינו (והרשענו) הרשענו ומרדנו וסור ממצותך וממשפטיך:",
      "en": ""
    },
    {
      "index": 6,
      "he": "ולא שמענו אל עבדיך הנביאים אשר דברו בשמך אל מלכינו שרינו ואבתינו ואל כל עם הארץ:",
      "en": ""
    },
    {
      "index": 7,
      "he": "לך אדני הצדקה ולנו בשת הפנים כיום הזה לאיש יהודה וליושבי ירושלם ולכל ישראל הקרבים והרחקים בכל הארצות אשר הדחתם שם במעלם אשר מעלו בך:",
      "en": ""
    },
    {
      "index": 8,
      "he": "יהוה לנו בשת הפנים למלכינו לשרינו ולאבתינו אשר חטאנו לך:",
      "en": ""
    },
    {
      "index": 9,
      "he": "לאדני אלהינו הרחמים והסלחות כי מרדנו בו:",
      "en": ""
    },
    {
      "index": 10,
      "he": "ולא שמענו בקול יהוה אלהינו ללכת בתורתיו אשר נתן לפנינו ביד עבדיו הנביאים:",
      "en": ""
    },
    {
      "index": 11,
      "he": "וכל ישראל עברו את תורתך וסור לבלתי שמוע בקלך ותתך עלינו האלה והשבעה אשר כתובה בתורת משה עבד האלהים כי חטאנו לו:",
      "en": ""
    },
    {
      "index": 12,
      "he": "ויקם את (דבריו) דברו אשר דבר עלינו ועל שפטינו אשר שפטונו להביא עלינו רעה גדלה אשר לא נעשתה תחת כל השמים כאשר נעשתה בירושלם:",
      "en": ""
    },
    {
      "index": 13,
      "he": "כאשר כתוב בתורת משה את כל הרעה הזאת באה עלינו ולא חלינו את פני יהוה אלהינו לשוב מעוננו ולהשכיל באמתך:",
      "en": ""
    },
    {
      "index": 14,
      "he": "וישקד יהוה על הרעה ויביאה עלינו כי צדיק יהוה אלהינו על כל מעשיו אשר עשה ולא שמענו בקלו:",
      "en": ""
    },
    {
      "index": 15,
      "he": "ועתה אדני אלהינו אשר הוצאת את עמך מארץ מצרים ביד חזקה ותעש לך שם כיום הזה חטאנו רשענו:",
      "en": ""
    },
    {
      "index": 16,
      "he": "אדני ככל צדקתך ישב נא אפך וחמתך מעירך ירושלם הר קדשך כי בחטאינו ובעונות אבתינו ירושלם ועמך לחרפה לכל סביבתינו:",
      "en": ""
    },
    {
      "index": 17,
      "he": "ועתה שמע אלהינו אל תפלת עבדך ואל תחנוניו והאר פניך על מקדשך השמם למען אדני:",
      "en": ""
    },
    {
      "index": 18,
      "he": "הטה אלהי אזנך ושמע (פקחה) פקח עיניך וראה שממתינו והעיר אשר נקרא שמך עליה כי לא על צדקתינו אנחנו מפילים תחנונינו לפניך כי על רחמיך הרבים:",
      "en": ""
    },
    {
      "index": 19,
      "he": "אדני שמעה אדני סלחה אדני הקשיבה ועשה אל תאחר למענך אלהי כי שמך נקרא על עירך ועל עמך:",
      "en": ""
    },
    {
      "index": 20,
      "he": "ועוד אני מדבר ומתפלל ומתודה חטאתי וחטאת עמי ישראל ומפיל תחנתי לפני יהוה אלהי על הר קדש אלהי:",
      "en": ""
    },
    {
      "index": 21,
      "he": "ועוד אני מדבר בתפלה והאיש גבריאל אשר ראיתי בחזון בתחלה מעף ביעף נגע אלי כעת מנחת ערב:",
      "en": ""
    },
    {
      "index": 22,
      "he": "ויבן וידבר עמי ויאמר דניאל עתה יצאתי להשכילך בינה:",
      "en": ""
    },
    {
      "index": 23,
      "he": "בתחלת תחנוניך יצא דבר ואני באתי להגיד כי חמודות אתה ובין בדבר והבן במראה:",
      "en": ""
    },
    {
      "index": 24,
      "he": "שבעים שבעים נחתך על עמך ועל עיר קדשך לכלא הפשע (ולחתם) ולהתם (חטאות) חטאת ולכפר עון ולהביא צדק עלמים ולחתם חזון ונביא ולמשח קדש קדשים:",
      "en": ""
    },
    {
      "index": 25,
      "he": "ותדע ותשכל מן מצא דבר להשיב ולבנות ירושלם עד משיח נגיד שבעים שבעה ושבעים ששים ושנים תשוב ונבנתה רחוב וחרוץ ובצוק העתים:",
      "en": ""
    },
    {
      "index": 26,
      "he": "ואחרי השבעים ששים ושנים יכרת משיח ואין לו והעיר והקדש ישחית עם נגיד הבא וקצו בשטף ועד קץ מלחמה נחרצת שממות:",
      "en": ""
    },
    {
      "index": 27,
      "he": "והגביר ברית לרבים שבוע אחד וחצי השבוע ישבית זבח ומנחה ועל כנף שקוצים משמם ועד כלה ונחרצה תתך על שמם: (פ)",
      "en": ""
    }
  ]
}