Daniel Chapter 9
דניאל פרק ט
Source: https://ajew.org/reader/tanach-daniel/1/9

Segment 1
HE:
בשנת אחת לדריוש בן אחשורוש מזרע מדי אשר המלך על מלכות כשדים:

Segment 2
HE:
בשנת אחת למלכו אני דניאל בינתי בספרים מספר השנים אשר היה דבר יהוה אל ירמיה הנביא למלאות לחרבות ירושלם שבעים שנה:

Segment 3
HE:
ואתנה את פני אל אדני האלהים לבקש תפלה ותחנונים בצום ושק ואפר:

Segment 4
HE:
ואתפללה ליהוה אלהי ואתודה ואמרה אנא אדני האל הגדול והנורא שמר הברית והחסד לאהביו ולשמרי מצותיו:

Segment 5
HE:
חטאנו ועוינו (והרשענו) הרשענו ומרדנו וסור ממצותך וממשפטיך:

Segment 6
HE:
ולא שמענו אל עבדיך הנביאים אשר דברו בשמך אל מלכינו שרינו ואבתינו ואל כל עם הארץ:

Segment 7
HE:
לך אדני הצדקה ולנו בשת הפנים כיום הזה לאיש יהודה וליושבי ירושלם ולכל ישראל הקרבים והרחקים בכל הארצות אשר הדחתם שם במעלם אשר מעלו בך:

Segment 8
HE:
יהוה לנו בשת הפנים למלכינו לשרינו ולאבתינו אשר חטאנו לך:

Segment 9
HE:
לאדני אלהינו הרחמים והסלחות כי מרדנו בו:

Segment 10
HE:
ולא שמענו בקול יהוה אלהינו ללכת בתורתיו אשר נתן לפנינו ביד עבדיו הנביאים:

Segment 11
HE:
וכל ישראל עברו את תורתך וסור לבלתי שמוע בקלך ותתך עלינו האלה והשבעה אשר כתובה בתורת משה עבד האלהים כי חטאנו לו:

Segment 12
HE:
ויקם את (דבריו) דברו אשר דבר עלינו ועל שפטינו אשר שפטונו להביא עלינו רעה גדלה אשר לא נעשתה תחת כל השמים כאשר נעשתה בירושלם:

Segment 13
HE:
כאשר כתוב בתורת משה את כל הרעה הזאת באה עלינו ולא חלינו את פני יהוה אלהינו לשוב מעוננו ולהשכיל באמתך:

Segment 14
HE:
וישקד יהוה על הרעה ויביאה עלינו כי צדיק יהוה אלהינו על כל מעשיו אשר עשה ולא שמענו בקלו:

Segment 15
HE:
ועתה אדני אלהינו אשר הוצאת את עמך מארץ מצרים ביד חזקה ותעש לך שם כיום הזה חטאנו רשענו:

Segment 16
HE:
אדני ככל צדקתך ישב נא אפך וחמתך מעירך ירושלם הר קדשך כי בחטאינו ובעונות אבתינו ירושלם ועמך לחרפה לכל סביבתינו:

Segment 17
HE:
ועתה שמע אלהינו אל תפלת עבדך ואל תחנוניו והאר פניך על מקדשך השמם למען אדני:

Segment 18
HE:
הטה אלהי אזנך ושמע (פקחה) פקח עיניך וראה שממתינו והעיר אשר נקרא שמך עליה כי לא על צדקתינו אנחנו מפילים תחנונינו לפניך כי על רחמיך הרבים:

Segment 19
HE:
אדני שמעה אדני סלחה אדני הקשיבה ועשה אל תאחר למענך אלהי כי שמך נקרא על עירך ועל עמך:

Segment 20
HE:
ועוד אני מדבר ומתפלל ומתודה חטאתי וחטאת עמי ישראל ומפיל תחנתי לפני יהוה אלהי על הר קדש אלהי:

Segment 21
HE:
ועוד אני מדבר בתפלה והאיש גבריאל אשר ראיתי בחזון בתחלה מעף ביעף נגע אלי כעת מנחת ערב:

Segment 22
HE:
ויבן וידבר עמי ויאמר דניאל עתה יצאתי להשכילך בינה:

Segment 23
HE:
בתחלת תחנוניך יצא דבר ואני באתי להגיד כי חמודות אתה ובין בדבר והבן במראה:

Segment 24
HE:
שבעים שבעים נחתך על עמך ועל עיר קדשך לכלא הפשע (ולחתם) ולהתם (חטאות) חטאת ולכפר עון ולהביא צדק עלמים ולחתם חזון ונביא ולמשח קדש קדשים:

Segment 25
HE:
ותדע ותשכל מן מצא דבר להשיב ולבנות ירושלם עד משיח נגיד שבעים שבעה ושבעים ששים ושנים תשוב ונבנתה רחוב וחרוץ ובצוק העתים:

Segment 26
HE:
ואחרי השבעים ששים ושנים יכרת משיח ואין לו והעיר והקדש ישחית עם נגיד הבא וקצו בשטף ועד קץ מלחמה נחרצת שממות:

Segment 27
HE:
והגביר ברית לרבים שבוע אחד וחצי השבוע ישבית זבח ומנחה ועל כנף שקוצים משמם ועד כלה ונחרצה תתך על שמם: (פ)