Deuteronomy Chapter 13
דברים פרק יג
Source: https://ajew.org/reader/tanach-devarim/1/13

Segment 1
HE:
את כל הדבר אשר אנכי מצוה אתכם אתו תשמרו לעשות לא תסף עליו ולא תגרע ממנו: (פ)

Segment 2
HE:
כי יקום בקרבך נביא או חלם חלום ונתן אליך אות או מופת:

Segment 3
HE:
ובא האות והמופת אשר דבר אליך לאמר נלכה אחרי אלהים אחרים אשר לא ידעתם ונעבדם:

Segment 4
HE:
לא תשמע אל דברי הנביא ההוא או אל חולם החלום ההוא כי מנסה יהוה אלהיכם אתכם לדעת הישכם אהבים את יהוה אלהיכם בכל לבבכם ובכל נפשכם:

Segment 5
HE:
אחרי יהוה אלהיכם תלכו ואתו תיראו ואת מצותיו תשמרו ובקלו תשמעו ואתו תעבדו ובו תדבקון:

Segment 6
HE:
והנביא ההוא או חלם החלום ההוא יומת כי דבר סרה על יהוה אלהיכם המוציא אתכם מארץ מצרים והפדך מבית עבדים להדיחך מן הדרך אשר צוך יהוה אלהיך ללכת בה ובערת הרע מקרבך: (פ)

Segment 7
HE:
כי יסיתך אחיך בן אמך או בנך או בתך או אשת חיקך או רעך אשר כנפשך בסתר לאמר נלכה ונעבדה אלהים אחרים אשר לא ידעת אתה ואבתיך:

Segment 8
HE:
מאלהי העמים אשר סביבתיכם הקרבים אליך או הרחקים ממך מקצה הארץ ועד קצה הארץ:

Segment 9
HE:
לא תאבה לו ולא תשמע אליו ולא תחוס עינך עליו ולא תחמל ולא תכסה עליו:

Segment 10
HE:
כי הרג תהרגנו ידך תהיה בו בראשונה להמיתו ויד כל העם באחרנה:

Segment 11
HE:
וסקלתו באבנים ומת כי בקש להדיחך מעל יהוה אלהיך המוציאך מארץ מצרים מבית עבדים:

Segment 12
HE:
וכל ישראל ישמעו ויראון ולא יוספו לעשות כדבר הרע הזה בקרבך: (פ)

Segment 13
HE:
כי תשמע באחת עריך אשר יהוה אלהיך נתן לך לשבת שם לאמר:

Segment 14
HE:
יצאו אנשים בני בליעל מקרבך וידיחו את ישבי עירם לאמר נלכה ונעבדה אלהים אחרים אשר לא ידעתם:

Segment 15
HE:
ודרשת וחקרת ושאלת היטב והנה אמת נכון הדבר נעשתה התועבה הזאת בקרבך:

Segment 16
HE:
הכה תכה את ישבי העיר (ההוא) ההוא לפי חרב החרם אתה ואת כל אשר בה ואת בהמתה לפי חרב:

Segment 17
HE:
ואת כל שללה תקבץ אל תוך רחבה ושרפת באש את העיר ואת כל שללה כליל ליהוה אלהיך והיתה תל עולם לא תבנה עוד:

Segment 18
HE:
ולא ידבק בידך מאומה מן החרם למען ישוב יהוה מחרון אפו ונתן לך רחמים ורחמך והרבך כאשר נשבע לאבתיך:

Segment 19
HE:
כי תשמע בקול יהוה אלהיך לשמר את כל מצותיו אשר אנכי מצוך היום לעשות הישר בעיני יהוה אלהיך: (פ)