Deuteronomy Chapter 19
דברים פרק יט
Source: https://ajew.org/reader/tanach-devarim/1/19

Segment 1
HE:
כי יכרית יהוה אלהיך את הגוים אשר יהוה אלהיך נתן לך את ארצם וירשתם וישבת בעריהם ובבתיהם:

Segment 2
HE:
שלוש ערים תבדיל לך בתוך ארצך אשר יהוה אלהיך נתן לך לרשתה:

Segment 3
HE:
תכין לך הדרך ושלשת את גבול ארצך אשר ינחילך יהוה אלהיך והיה לנוס שמה כל רצח:

Segment 4
HE:
וזה דבר הרצח אשר ינוס שמה וחי אשר יכה את רעהו בבלי דעת והוא לא שנא לו מתמל שלשם:

Segment 5
HE:
ואשר יבא את רעהו ביער לחטב עצים ונדחה ידו בגרזן לכרת העץ ונשל הברזל מן העץ ומצא את רעהו ומת הוא ינוס אל אחת הערים האלה וחי:

Segment 6
HE:
פן ירדף גאל הדם אחרי הרצח כי יחם לבבו והשיגו כי ירבה הדרך והכהו נפש ולו אין משפט מות כי לא שנא הוא לו מתמול שלשום:

Segment 7
HE:
על כן אנכי מצוך לאמר שלש ערים תבדיל לך:

Segment 8
HE:
ואם ירחיב יהוה אלהיך את גבלך כאשר נשבע לאבתיך ונתן לך את כל הארץ אשר דבר לתת לאבתיך:

Segment 9
HE:
כי תשמר את כל המצוה הזאת לעשתה אשר אנכי מצוך היום לאהבה את יהוה אלהיך וללכת בדרכיו כל הימים ויספת לך עוד שלש ערים על השלש האלה:

Segment 10
HE:
ולא ישפך דם נקי בקרב ארצך אשר יהוה אלהיך נתן לך נחלה והיה עליך דמים: (פ)

Segment 11
HE:
וכי יהיה איש שנא לרעהו וארב לו וקם עליו והכהו נפש ומת ונס אל אחת הערים האל:

Segment 12
HE:
ושלחו זקני עירו ולקחו אתו משם ונתנו אתו ביד גאל הדם ומת:

Segment 13
HE:
לא תחוס עינך עליו ובערת דם הנקי מישראל וטוב לך: (ס)

Segment 14
HE:
שישי  לא תסיג גבול רעך אשר גבלו ראשנים בנחלתך אשר תנחל בארץ אשר יהוה אלהיך נתן לך לרשתה: (ס)

Segment 15
HE:
לא יקום עד אחד באיש לכל עון ולכל חטאת בכל חטא אשר יחטא על פי שני עדים או על פי שלשה עדים יקום דבר:

Segment 16
HE:
כי יקום עד חמס באיש לענות בו סרה:

Segment 17
HE:
ועמדו שני האנשים אשר להם הריב לפני יהוה לפני הכהנים והשפטים אשר יהיו בימים ההם:

Segment 18
HE:
ודרשו השפטים היטב והנה עד שקר העד שקר ענה באחיו:

Segment 19
HE:
ועשיתם לו כאשר זמם לעשות לאחיו ובערת הרע מקרבך:

Segment 20
HE:
והנשארים ישמעו ויראו ולא יספו לעשות עוד כדבר הרע הזה בקרבך:

Segment 21
HE:
ולא תחוס עינך נפש בנפש עין בעין שן בשן יד ביד רגל ברגל: (ס)