Deuteronomy Chapter 20
דברים פרק כ
Source: https://ajew.org/reader/tanach-devarim/1/20

Segment 1
HE:
כי תצא למלחמה על איבך וראית סוס ורכב עם רב ממך לא תירא מהם כי יהוה אלהיך עמך המעלך מארץ מצרים:

Segment 2
HE:
והיה כקרבכם אל המלחמה ונגש הכהן ודבר אל העם:

Segment 3
HE:
ואמר אלהם שמע ישראל אתם קרבים היום למלחמה על איביכם אל ירך לבבכם אל תיראו ואל תחפזו ואל תערצו מפניהם:

Segment 4
HE:
כי יהוה אלהיכם ההלך עמכם להלחם לכם עם איביכם להושיע אתכם:

Segment 5
HE:
ודברו השטרים אל העם לאמר מי האיש אשר בנה בית חדש ולא חנכו ילך וישב לביתו פן ימות במלחמה ואיש אחר יחנכנו:

Segment 6
HE:
ומי האיש אשר נטע כרם ולא חללו ילך וישב לביתו פן ימות במלחמה ואיש אחר יחללנו:

Segment 7
HE:
ומי האיש אשר ארש אשה ולא לקחה ילך וישב לביתו פן ימות במלחמה ואיש אחר יקחנה:

Segment 8
HE:
ויספו השטרים לדבר אל העם ואמרו מי האיש הירא ורך הלבב ילך וישב לביתו ולא ימס את לבב אחיו כלבבו:

Segment 9
HE:
והיה ככלת השטרים לדבר אל העם ופקדו שרי צבאות בראש העם: (ס)

Segment 10
HE:
שביעי  כי תקרב אל עיר להלחם עליה וקראת אליה לשלום:

Segment 11
HE:
והיה אם שלום תענך ופתחה לך והיה כל העם הנמצא בה יהיו לך למס ועבדוך:

Segment 12
HE:
ואם לא תשלים עמך ועשתה עמך מלחמה וצרת עליה:

Segment 13
HE:
ונתנה יהוה אלהיך בידך והכית את כל זכורה לפי חרב:

Segment 14
HE:
רק הנשים והטף והבהמה וכל אשר יהיה בעיר כל שללה תבז לך ואכלת את שלל איביך אשר נתן יהוה אלהיך לך:

Segment 15
HE:
כן תעשה לכל הערים הרחקת ממך מאד אשר לא מערי הגוים האלה הנה:

Segment 16
HE:
רק מערי העמים האלה אשר יהוה אלהיך נתן לך נחלה לא תחיה כל נשמה:

Segment 17
HE:
כי החרם תחרימם החתי והאמרי הכנעני והפרזי החוי והיבוסי כאשר צוך יהוה אלהיך:

Segment 18
HE:
למען אשר לא ילמדו אתכם לעשות ככל תועבתם אשר עשו לאלהיהם וחטאתם ליהוה אלהיכם: (ס)

Segment 19
HE:
כי תצור אל עיר ימים רבים להלחם עליה לתפשה לא תשחית את עצה לנדח עליו גרזן כי ממנו תאכל ואתו לא תכרת כי האדם עץ השדה לבא מפניך במצור:

Segment 20
HE:
רק עץ אשר תדע כי לא עץ מאכל הוא אתו תשחית וכרת ובנית מצור על העיר אשר הוא עשה עמך מלחמה עד רדתה: (פ)