Deuteronomy Chapter 24
דברים פרק כד
Source: https://ajew.org/reader/tanach-devarim/1/24

Segment 1
HE:
כי יקח איש אשה ובעלה והיה אם לא תמצא חן בעיניו כי מצא בה ערות דבר וכתב לה ספר כריתת ונתן בידה ושלחה מביתו:

Segment 2
HE:
ויצאה מביתו והלכה והיתה לאיש אחר:

Segment 3
HE:
ושנאה האיש האחרון וכתב לה ספר כריתת ונתן בידה ושלחה מביתו או כי ימות האיש האחרון אשר לקחה לו לאשה:

Segment 4
HE:
לא יוכל בעלה הראשון אשר שלחה לשוב לקחתה להיות לו לאשה אחרי אשר הטמאה כי תועבה הוא לפני יהוה ולא תחטיא את הארץ אשר יהוה אלהיך נתן לך נחלה: (ס)

Segment 5
HE:
שישי  כי יקח איש אשה חדשה לא יצא בצבא ולא יעבר עליו לכל דבר נקי יהיה לביתו שנה אחת ושמח את אשתו אשר לקח:

Segment 6
HE:
לא יחבל רחים ורכב כי נפש הוא חבל: (ס)

Segment 7
HE:
כי ימצא איש גנב נפש מאחיו מבני ישראל והתעמר בו ומכרו ומת הגנב ההוא ובערת הרע מקרבך: (ס)

Segment 8
HE:
השמר בנגע הצרעת לשמר מאד ולעשות ככל אשר יורו אתכם הכהנים הלוים כאשר צויתם תשמרו לעשות:

Segment 9
HE:
זכור את אשר עשה יהוה אלהיך למרים בדרך בצאתכם ממצרים: (ס)

Segment 10
HE:
כי תשה ברעך משאת מאומה לא תבא אל ביתו לעבט עבטו:

Segment 11
HE:
בחוץ תעמד והאיש אשר אתה נשה בו יוציא אליך את העבוט החוצה:

Segment 12
HE:
ואם איש עני הוא לא תשכב בעבטו:

Segment 13
HE:
השב תשיב לו את העבוט כבוא השמש ושכב בשלמתו וברכך ולך תהיה צדקה לפני יהוה אלהיך: (ס)

Segment 14
HE:
שביעי  לא תעשק שכיר עני ואביון מאחיך או מגרך אשר בארצך בשעריך:

Segment 15
HE:
ביומו תתן שכרו ולא תבוא עליו השמש כי עני הוא ואליו הוא נשא את נפשו ולא יקרא עליך אל יהוה והיה בך חטא: (ס)

Segment 16
HE:
לא יומתו אבות על בנים ובנים לא יומתו על אבות איש בחטאו יומתו: (ס)

Segment 17
HE:
לא תטה משפט גר יתום ולא תחבל בגד אלמנה:

Segment 18
HE:
וזכרת כי עבד היית במצרים ויפדך יהוה אלהיך משם על כן אנכי מצוך לעשות את הדבר הזה: (ס)

Segment 19
HE:
כי תקצר קצירך בשדך ושכחת עמר בשדה לא תשוב לקחתו לגר ליתום ולאלמנה יהיה למען יברכך יהוה אלהיך בכל מעשה ידיך: (ס)

Segment 20
HE:
כי תחבט זיתך לא תפאר אחריך לגר ליתום ולאלמנה יהיה:

Segment 21
HE:
כי תבצר כרמך לא תעולל אחריך לגר ליתום ולאלמנה יהיה:

Segment 22
HE:
וזכרת כי עבד היית בארץ מצרים על כן אנכי מצוך לעשות את הדבר הזה: (ס)