Deuteronomy Chapter 28
דברים פרק כח
Source: https://ajew.org/reader/tanach-devarim/1/28

Segment 1
HE:
והיה אם שמוע תשמע בקול יהוה אלהיך לשמר לעשות את כל מצותיו אשר אנכי מצוך היום ונתנך יהוה אלהיך עליון על כל גויי הארץ:

Segment 2
HE:
ובאו עליך כל הברכות האלה והשיגך כי תשמע בקול יהוה אלהיך:

Segment 3
HE:
ברוך אתה בעיר וברוך אתה בשדה:

Segment 4
HE:
ברוך פרי בטנך ופרי אדמתך ופרי בהמתך שגר אלפיך ועשתרות צאנך:

Segment 5
HE:
ברוך טנאך ומשארתך:

Segment 6
HE:
ברוך אתה בבאך וברוך אתה בצאתך:

Segment 7
HE:
שישי  יתן יהוה את איביך הקמים עליך נגפים לפניך בדרך אחד יצאו אליך ובשבעה דרכים ינוסו לפניך:

Segment 8
HE:
יצו יהוה אתך את הברכה באסמיך ובכל משלח ידך וברכך בארץ אשר יהוה אלהיך נתן לך:

Segment 9
HE:
יקימך יהוה לו לעם קדוש כאשר נשבע לך כי תשמר את מצות יהוה אלהיך והלכת בדרכיו:

Segment 10
HE:
וראו כל עמי הארץ כי שם יהוה נקרא עליך ויראו ממך:

Segment 11
HE:
והותרך יהוה לטובה בפרי בטנך ובפרי בהמתך ובפרי אדמתך על האדמה אשר נשבע יהוה לאבתיך לתת לך:

Segment 12
HE:
יפתח יהוה לך את אוצרו הטוב את השמים לתת מטר ארצך בעתו ולברך את כל מעשה ידך והלוית גוים רבים ואתה לא תלוה:

Segment 13
HE:
ונתנך יהוה לראש ולא לזנב והיית רק למעלה ולא תהיה למטה כי תשמע אל מצות יהוה אלהיך אשר אנכי מצוך היום לשמר ולעשות:

Segment 14
HE:
ולא תסור מכל הדברים אשר אנכי מצוה אתכם היום ימין ושמאול ללכת אחרי אלהים אחרים לעבדם: (פפפ)

Segment 15
HE:
והיה אם לא תשמע בקול יהוה אלהיך לשמר לעשות את כל מצותיו וחקתיו אשר אנכי מצוך היום ובאו עליך כל הקללות האלה והשיגוך:

Segment 16
HE:
ארור אתה בעיר וארור אתה בשדה:

Segment 17
HE:
ארור טנאך ומשארתך:

Segment 18
HE:
ארור פרי בטנך ופרי אדמתך שגר אלפיך ועשתרת צאנך:

Segment 19
HE:
ארור אתה בבאך וארור אתה בצאתך:

Segment 20
HE:
ישלח יהוה בך את המארה את המהומה ואת המגערת בכל משלח ידך אשר תעשה עד השמדך ועד אבדך מהר מפני רע מעלליך אשר עזבתני:

Segment 21
HE:
ידבק יהוה בך את הדבר עד כלתו אתך מעל האדמה אשר אתה בא שמה לרשתה:

Segment 22
HE:
יככה יהוה בשחפת ובקדחת ובדלקת ובחרחר ובחרב ובשדפון ובירקון ורדפוך עד אבדך:

Segment 23
HE:
והיו שמיך אשר על ראשך נחשת והארץ אשר תחתיך ברזל:

Segment 24
HE:
יתן יהוה את מטר ארצך אבק ועפר מן השמים ירד עליך עד השמדך:

Segment 25
HE:
יתנך יהוה נגף לפני איביך בדרך אחד תצא אליו ובשבעה דרכים תנוס לפניו והיית לזעוה לכל ממלכות הארץ:

Segment 26
HE:
והיתה נבלתך למאכל לכל עוף השמים ולבהמת הארץ ואין מחריד:

Segment 27
HE:
יככה יהוה בשחין מצרים (ובעפלים) ובטחרים ובגרב ובחרס אשר לא תוכל להרפא:

Segment 28
HE:
יככה יהוה בשגעון ובעורון ובתמהון לבב:

Segment 29
HE:
והיית ממשש בצהרים כאשר ימשש העור באפלה ולא תצליח את דרכיך והיית אך עשוק וגזול כל הימים ואין מושיע:

Segment 30
HE:
אשה תארש ואיש אחר (ישגלנה) ישכבנה בית תבנה ולא תשב בו כרם תטע ולא תחללנו:

Segment 31
HE:
שורך טבוח לעיניך ולא תאכל ממנו חמרך גזול מלפניך ולא ישוב לך צאנך נתנות לאיביך ואין לך מושיע:

Segment 32
HE:
בניך ובנתיך נתנים לעם אחר ועיניך ראות וכלות אליהם כל היום ואין לאל ידך:

Segment 33
HE:
פרי אדמתך וכל יגיעך יאכל עם אשר לא ידעת והיית רק עשוק ורצוץ כל הימים:

Segment 34
HE:
והיית משגע ממראה עיניך אשר תראה:

Segment 35
HE:
יככה יהוה בשחין רע על הברכים ועל השקים אשר לא תוכל להרפא מכף רגלך ועד קדקדך:

Segment 36
HE:
יולך יהוה אתך ואת מלכך אשר תקים עליך אל גוי אשר לא ידעת אתה ואבתיך ועבדת שם אלהים אחרים עץ ואבן:

Segment 37
HE:
והיית לשמה למשל ולשנינה בכל העמים אשר ינהגך יהוה שמה:

Segment 38
HE:
זרע רב תוציא השדה ומעט תאסף כי יחסלנו הארבה:

Segment 39
HE:
כרמים תטע ועבדת ויין לא תשתה ולא תאגר כי תאכלנו התלעת:

Segment 40
HE:
זיתים יהיו לך בכל גבולך ושמן לא תסוך כי ישל זיתך:

Segment 41
HE:
בנים ובנות תוליד ולא יהיו לך כי ילכו בשבי:

Segment 42
HE:
כל עצך ופרי אדמתך יירש הצלצל:

Segment 43
HE:
הגר אשר בקרבך יעלה עליך מעלה מעלה ואתה תרד מטה מטה:

Segment 44
HE:
הוא ילוך ואתה לא תלונו הוא יהיה לראש ואתה תהיה לזנב:

Segment 45
HE:
ובאו עליך כל הקללות האלה ורדפוך והשיגוך עד השמדך כי לא שמעת בקול יהוה אלהיך לשמר מצותיו וחקתיו אשר צוך:

Segment 46
HE:
והיו בך לאות ולמופת ובזרעך עד עולם:

Segment 47
HE:
תחת אשר לא עבדת את יהוה אלהיך בשמחה ובטוב לבב מרב כל:

Segment 48
HE:
ועבדת את איביך אשר ישלחנו יהוה בך ברעב ובצמא ובעירם ובחסר כל ונתן על ברזל על צוארך עד השמידו אתך:

Segment 49
HE:
ישא יהוה עליך גוי מרחק מקצה הארץ כאשר ידאה הנשר גוי אשר לא תשמע לשנו:

Segment 50
HE:
גוי עז פנים אשר לא ישא פנים לזקן ונער לא יחן:

Segment 51
HE:
ואכל פרי בהמתך ופרי אדמתך עד השמדך אשר לא ישאיר לך דגן תירוש ויצהר שגר אלפיך ועשתרת צאנך עד האבידו אתך:

Segment 52
HE:
והצר לך בכל שעריך עד רדת חמתיך הגבהת והבצרות אשר אתה בטח בהן בכל ארצך והצר לך בכל שעריך בכל ארצך אשר נתן יהוה אלהיך לך:

Segment 53
HE:
ואכלת פרי בטנך בשר בניך ובנתיך אשר נתן לך יהוה אלהיך במצור ובמצוק אשר יציק לך איבך:

Segment 54
HE:
האיש הרך בך והענג מאד תרע עינו באחיו ובאשת חיקו וביתר בניו אשר יותיר:

Segment 55
HE:
מתת לאחד מהם מבשר בניו אשר יאכל מבלי השאיר לו כל במצור ובמצוק אשר יציק לך איבך בכל שעריך:

Segment 56
HE:
הרכה בך והענגה אשר לא נסתה כף רגלה הצג על הארץ מהתענג ומרך תרע עינה באיש חיקה ובבנה ובבתה:

Segment 57
HE:
ובשליתה היוצת מבין רגליה ובבניה אשר תלד כי תאכלם בחסר כל בסתר במצור ובמצוק אשר יציק לך איבך בשעריך:

Segment 58
HE:
אם לא תשמר לעשות את כל דברי התורה הזאת הכתבים בספר הזה ליראה את השם הנכבד והנורא הזה את יהוה אלהיך:

Segment 59
HE:
והפלא יהוה את מכתך ואת מכות זרעך מכות גדלת ונאמנות וחלים רעים ונאמנים:

Segment 60
HE:
והשיב בך את כל מדוה מצרים אשר יגרת מפניהם ודבקו בך:

Segment 61
HE:
גם כל חלי וכל מכה אשר לא כתוב בספר התורה הזאת יעלם יהוה עליך עד השמדך:

Segment 62
HE:
ונשארתם במתי מעט תחת אשר הייתם ככוכבי השמים לרב כי לא שמעת בקול יהוה אלהיך:

Segment 63
HE:
והיה כאשר שש יהוה עליכם להיטיב אתכם ולהרבות אתכם כן ישיש יהוה עליכם להאביד אתכם ולהשמיד אתכם ונסחתם מעל האדמה אשר אתה בא שמה לרשתה:

Segment 64
HE:
והפיצך יהוה בכל העמים מקצה הארץ ועד קצה הארץ ועבדת שם אלהים אחרים אשר לא ידעת אתה ואבתיך עץ ואבן:

Segment 65
HE:
ובגוים ההם לא תרגיע ולא יהיה מנוח לכף רגלך ונתן יהוה לך שם לב רגז וכליון עינים ודאבון נפש:

Segment 66
HE:
והיו חייך תלאים לך מנגד ופחדת לילה ויומם ולא תאמין בחייך:

Segment 67
HE:
בבקר תאמר מי יתן ערב ובערב תאמר מי יתן בקר מפחד לבבך אשר תפחד וממראה עיניך אשר תראה:

Segment 68
HE:
והשיבך יהוה מצרים באניות בדרך אשר אמרתי לך לא תסיף עוד לראתה והתמכרתם שם לאיביך לעבדים ולשפחות ואין קנה:

Segment 69
HE:
אלה דברי הברית אשר צוה יהוה את משה לכרת את בני ישראל בארץ מואב מלבד הברית אשר כרת אתם בחרב: