Deuteronomy Chapter 29
דברים פרק כט
Source: https://ajew.org/reader/tanach-devarim/1/29

Segment 1
HE:
שביעי  ויקרא משה אל כל ישראל ויאמר אלהם אתם ראיתם את כל אשר עשה יהוה לעיניכם בארץ מצרים לפרעה ולכל עבדיו ולכל ארצו:

Segment 2
HE:
המסות הגדלת אשר ראו עיניך האתת והמפתים הגדלים ההם:

Segment 3
HE:
ולא נתן יהוה לכם לב לדעת ועינים לראות ואזנים לשמע עד היום הזה:

Segment 4
HE:
ואולך אתכם ארבעים שנה במדבר לא בלו שלמתיכם מעליכם ונעלך לא בלתה מעל רגלך:

Segment 5
HE:
לחם לא אכלתם ויין ושכר לא שתיתם למען תדעו כי אני יהוה אלהיכם:

Segment 6
HE:
מפטיר  ותבאו אל המקום הזה ויצא סיחן מלך חשבון ועוג מלך הבשן לקראתנו למלחמה ונכם:

Segment 7
HE:
ונקח את ארצם ונתנה לנחלה לראובני ולגדי ולחצי שבט המנשי:

Segment 8
HE:
ושמרתם את דברי הברית הזאת ועשיתם אתם למען תשכילו את כל אשר תעשון: (פפפ)

Segment 9
HE:
אתם נצבים היום כלכם לפני יהוה אלהיכם ראשיכם שבטיכם זקניכם ושטריכם כל איש ישראל:

Segment 10
HE:
טפכם נשיכם וגרך אשר בקרב מחניך מחטב עציך עד שאב מימיך:

Segment 11
HE:
לעברך בברית יהוה אלהיך ובאלתו אשר יהוה אלהיך כרת עמך היום:

Segment 12
HE:
שני  למען הקים אתך היום לו לעם והוא יהיה לך לאלהים כאשר דבר לך וכאשר נשבע לאבתיך לאברהם ליצחק וליעקב:

Segment 13
HE:
ולא אתכם לבדכם אנכי כרת את הברית הזאת ואת האלה הזאת:

Segment 14
HE:
כי את אשר ישנו פה עמנו עמד היום לפני יהוה אלהינו ואת אשר איננו פה עמנו היום:

Segment 15
HE:
שלישי  כי אתם ידעתם את אשר ישבנו בארץ מצרים ואת אשר עברנו בקרב הגוים אשר עברתם:

Segment 16
HE:
ותראו את שקוציהם ואת גלליהם עץ ואבן כסף וזהב אשר עמהם:

Segment 17
HE:
פן יש בכם איש או אשה או משפחה או שבט אשר לבבו פנה היום מעם יהוה אלהינו ללכת לעבד את אלהי הגוים ההם פן יש בכם שרש פרה ראש ולענה:

Segment 18
HE:
והיה בשמעו את דברי האלה הזאת והתברך בלבבו לאמר שלום יהיה לי כי בשררות לבי אלך למען ספות הרוה את הצמאה:

Segment 19
HE:
לא יאבה יהוה סלח לו כי אז יעשן אף יהוה וקנאתו באיש ההוא ורבצה בו כל האלה הכתובה בספר הזה ומחה יהוה את שמו מתחת השמים:

Segment 20
HE:
והבדילו יהוה לרעה מכל שבטי ישראל ככל אלות הברית הכתובה בספר התורה הזה:

Segment 21
HE:
ואמר הדור האחרון בניכם אשר יקומו מאחריכם והנכרי אשר יבא מארץ רחוקה וראו את מכות הארץ ההוא ואת תחלאיה אשר חלה יהוה בה:

Segment 22
HE:
גפרית ומלח שרפה כל ארצה לא תזרע ולא תצמח ולא יעלה בה כל עשב כמהפכת סדם ועמרה אדמה (וצביים) וצבוים אשר הפך יהוה באפו ובחמתו:

Segment 23
HE:
ואמרו כל הגוים על מה עשה יהוה ככה לארץ הזאת מה חרי האף הגדול הזה:

Segment 24
HE:
ואמרו על אשר עזבו את ברית יהוה אלהי אבתם אשר כרת עמם בהוציאו אתם מארץ מצרים:

Segment 25
HE:
וילכו ויעבדו אלהים אחרים וישתחוו להם אלהים אשר לא ידעום ולא חלק להם:

Segment 26
HE:
ויחר אף יהוה בארץ ההוא להביא עליה את כל הקללה הכתובה בספר הזה:

Segment 27
HE:
ויתשם יהוה מעל אדמתם באף ובחמה ובקצף גדול וישלכם אל ארץ אחרת כיום הזה:

Segment 28
HE:
הנסתרת ליהוה אלהינו והנגלת לנו ולבנינו עד עולם לעשות את כל דברי התורה הזאת: (ס)