Deuteronomy Chapter 31
דברים פרק לא
Source: https://ajew.org/reader/tanach-devarim/1/31

Segment 1
HE:
וילך משה וידבר את הדברים האלה אל כל ישראל:

Segment 2
HE:
ויאמר אלהם בן מאה ועשרים שנה אנכי היום לא אוכל עוד לצאת ולבוא ויהוה אמר אלי לא תעבר את הירדן הזה:

Segment 3
HE:
יהוה אלהיך הוא עבר לפניך הוא ישמיד את הגוים האלה מלפניך וירשתם יהושע הוא עבר לפניך כאשר דבר יהוה:

Segment 4
HE:
שני  ועשה יהוה להם כאשר עשה לסיחון ולעוג מלכי האמרי ולארצם אשר השמיד אתם:

Segment 5
HE:
ונתנם יהוה לפניכם ועשיתם להם ככל המצוה אשר צויתי אתכם:

Segment 6
HE:
חזקו ואמצו אל תיראו ואל תערצו מפניהם כי יהוה אלהיך הוא ההלך עמך לא ירפך ולא יעזבך: (ס)

Segment 7
HE:
שלישי - במחוברות חמישי  ויקרא משה ליהושע ויאמר אליו לעיני כל ישראל חזק ואמץ כי אתה תבוא את העם הזה אל הארץ אשר נשבע יהוה לאבתם לתת להם ואתה תנחילנה אותם:

Segment 8
HE:
ויהוה הוא ההלך לפניך הוא יהיה עמך לא ירפך ולא יעזבך לא תירא ולא תחת:

Segment 9
HE:
ויכתב משה את התורה הזאת ויתנה אל הכהנים בני לוי הנשאים את ארון ברית יהוה ואל כל זקני ישראל:

Segment 10
HE:
רביעי  ויצו משה אותם לאמר מקץ שבע שנים במעד שנת השמטה בחג הסכות:

Segment 11
HE:
בבוא כל ישראל לראות את פני יהוה אלהיך במקום אשר יבחר תקרא את התורה הזאת נגד כל ישראל באזניהם:

Segment 12
HE:
הקהל את העם האנשים והנשים והטף וגרך אשר בשעריך למען ישמעו ולמען ילמדו ויראו את יהוה אלהיכם ושמרו לעשות את כל דברי התורה הזאת:

Segment 13
HE:
ובניהם אשר לא ידעו ישמעו ולמדו ליראה את יהוה אלהיכם כל הימים אשר אתם חיים על האדמה אשר אתם עברים את הירדן שמה לרשתה: (פ)

Segment 14
HE:
חמישי - במחוברות ששי  ויאמר יהוה אל משה הן קרבו ימיך למות קרא את יהושע והתיצבו באהל מועד ואצונו וילך משה ויהושע ויתיצבו באהל מועד:

Segment 15
HE:
וירא יהוה באהל בעמוד ענן ויעמד עמוד הענן על פתח האהל:

Segment 16
HE:
ויאמר יהוה אל משה הנך שכב עם אבתיך וקם העם הזה וזנה אחרי אלהי נכר הארץ אשר הוא בא שמה בקרבו ועזבני והפר את בריתי אשר כרתי אתו:

Segment 17
HE:
וחרה אפי בו ביום ההוא ועזבתים והסתרתי פני מהם והיה לאכל ומצאהו רעות רבות וצרות ואמר ביום ההוא הלא על כי אין אלהי בקרבי מצאוני הרעות האלה:

Segment 18
HE:
ואנכי הסתר אסתיר פני ביום ההוא על כל הרעה אשר עשה כי פנה אל אלהים אחרים:

Segment 19
HE:
ועתה כתבו לכם את השירה הזאת ולמדה את בני ישראל שימה בפיהם למען תהיה לי השירה הזאת לעד בבני ישראל:

Segment 20
HE:
שישי - במחוברות שביעי  כי אביאנו אל האדמה אשר נשבעתי לאבתיו זבת חלב ודבש ואכל ושבע ודשן ופנה אל אלהים אחרים ועבדום ונאצוני והפר את בריתי:

Segment 21
HE:
והיה כי תמצאן אתו רעות רבות וצרות וענתה השירה הזאת לפניו לעד כי לא תשכח מפי זרעו כי ידעתי את יצרו אשר הוא עשה היום בטרם אביאנו אל הארץ אשר נשבעתי:

Segment 22
HE:
ויכתב משה את השירה הזאת ביום ההוא וילמדה את בני ישראל:

Segment 23
HE:
ויצו את יהושע בן נון ויאמר חזק ואמץ כי אתה תביא את בני ישראל אל הארץ אשר נשבעתי להם ואנכי אהיה עמך:

Segment 24
HE:
ויהי ככלות משה לכתב את דברי התורה הזאת על ספר עד תמם:

Segment 25
HE:
שביעי  ויצו משה את הלוים נשאי ארון ברית יהוה לאמר:

Segment 26
HE:
לקח את ספר התורה הזה ושמתם אתו מצד ארון ברית יהוה אלהיכם והיה שם בך לעד:

Segment 27
HE:
כי אנכי ידעתי את מריך ואת ערפך הקשה הן בעודני חי עמכם היום ממרים היתם עם יהוה ואף כי אחרי מותי:

Segment 28
HE:
מפטיר  הקהילו אלי את כל זקני שבטיכם ושטריכם ואדברה באזניהם את הדברים האלה ואעידה בם את השמים ואת הארץ:

Segment 29
HE:
כי ידעתי אחרי מותי כי השחת תשחתון וסרתם מן הדרך אשר צויתי אתכם וקראת אתכם הרעה באחרית הימים כי תעשו את הרע בעיני יהוה להכעיסו במעשה ידיכם:

Segment 30
HE:
וידבר משה באזני כל קהל ישראל את דברי השירה הזאת עד תמם: (פפפ)