Deuteronomy Chapter 5
דברים פרק ה
Source: https://ajew.org/reader/tanach-devarim/1/5

Segment 1
HE:
רביעי  ויקרא משה אל כל ישראל ויאמר אלהם שמע ישראל את החקים ואת המשפטים אשר אנכי דבר באזניכם היום ולמדתם אתם ושמרתם לעשתם:

Segment 2
HE:
יהוה אלהינו כרת עמנו ברית בחרב:

Segment 3
HE:
לא את אבתינו כרת יהוה את הברית הזאת כי אתנו אנחנו אלה פה היום כלנו חיים:

Segment 4
HE:
פנים בפנים דבר יהוה עמכם בהר מתוך האש:

Segment 5
HE:
אנכי עמד בין יהוה וביניכם בעת ההוא להגיד לכם את דבר יהוה כי יראתם מפני האש ולא עליתם בהר לאמר: (ס)

Segment 6
HE:
אנכי יהוה אלהיך אשר הוצאתיך מארץ מצרים מבית עבדים:

Segment 7
HE:
לא יהיה לך אלהים אחרים על פני:

Segment 8
HE:
לא תעשה לך פסל כל תמונה אשר בשמים ממעל ואשר בארץ מתחת ואשר במים מתחת לארץ:

Segment 9
HE:
לא תשתחוה להם ולא תעבדם כי אנכי יהוה אלהיך אל קנא פקד עון אבות על בנים ועל שלשים ועל רבעים לשנאי:

Segment 10
HE:
ועשה חסד לאלפים לאהבי ולשמרי (מצותו) מצותי: (ס)

Segment 11
HE:
לא תשא את שם יהוה אלהיך לשוא כי לא ינקה יהוה את אשר ישא את שמו לשוא: (ס)

Segment 12
HE:
שמור את יום השבת לקדשו כאשר צוך יהוה אלהיך

Segment 13
HE:
ששת ימים תעבד ועשית כל מלאכתך:

Segment 14
HE:
ויום השביעי שבת ליהוה אלהיך לא תעשה כל מלאכה אתה ובנך ובתך ועבדך ואמתך ושורך וחמרך וכל בהמתך וגרך אשר בשעריך למען ינוח עבדך ואמתך כמוך:

Segment 15
HE:
וזכרת כי עבד היית בארץ מצרים ויצאך יהוה אלהיך משם ביד חזקה ובזרע נטויה על כן צוך יהוה אלהיך לעשות את יום השבת: (ס)

Segment 16
HE:
כבד את אביך ואת אמך כאשר צוך יהוה אלהיך למען יאריכן ימיך ולמען ייטב לך על האדמה אשר יהוה אלהיך נתן לך: (ס)

Segment 17
HE:
לא תרצח: (ס) ולא תנאף: (ס) ולא תגנב: (ס) ולא תענה ברעך עד שוא: (ס)

Segment 18
HE:
ולא תחמד אשת רעך (ס) ולא תתאוה בית רעך שדהו ועבדו ואמתו שורו וחמרו וכל אשר לרעך: (ס)

Segment 19
HE:
חמישי  את הדברים האלה דבר יהוה אל כל קהלכם בהר מתוך האש הענן והערפל קול גדול ולא יסף ויכתבם על שני לחת אבנים ויתנם אלי:

Segment 20
HE:
ויהי כשמעכם את הקול מתוך החשך וההר בער באש ותקרבון אלי כל ראשי שבטיכם וזקניכם:

Segment 21
HE:
ותאמרו הן הראנו יהוה אלהינו את כבדו ואת גדלו ואת קלו שמענו מתוך האש היום הזה ראינו כי ידבר אלהים את האדם וחי:

Segment 22
HE:
ועתה למה נמות כי תאכלנו האש הגדלה הזאת אם יספים אנחנו לשמע את קול יהוה אלהינו עוד ומתנו:

Segment 23
HE:
כי מי כל בשר אשר שמע קול אלהים חיים מדבר מתוך האש כמנו ויחי:

Segment 24
HE:
קרב אתה ושמע את כל אשר יאמר יהוה אלהינו ואת תדבר אלינו את כל אשר ידבר יהוה אלהינו אליך ושמענו ועשינו:

Segment 25
HE:
וישמע יהוה את קול דבריכם בדברכם אלי ויאמר יהוה אלי שמעתי את קול דברי העם הזה אשר דברו אליך היטיבו כל אשר דברו:

Segment 26
HE:
מי יתן והיה לבבם זה להם ליראה אתי ולשמר את כל מצותי כל הימים למען ייטב להם ולבניהם לעלם:

Segment 27
HE:
לך אמר להם שובו לכם לאהליכם:

Segment 28
HE:
ואתה פה עמד עמדי ואדברה אליך את כל המצוה והחקים והמשפטים אשר תלמדם ועשו בארץ אשר אנכי נתן להם לרשתה:

Segment 29
HE:
ושמרתם לעשות כאשר צוה יהוה אלהיכם אתכם לא תסרו ימין ושמאל:

Segment 30
HE:
בכל הדרך אשר צוה יהוה אלהיכם אתכם תלכו למען תחיון וטוב לכם והארכתם ימים בארץ אשר תירשון: