Deuteronomy Chapter 8
דברים פרק ח
Source: https://ajew.org/reader/tanach-devarim/1/8

Segment 1
HE:
כל המצוה אשר אנכי מצוך היום תשמרון לעשות למען תחיון ורביתם ובאתם וירשתם את הארץ אשר נשבע יהוה לאבתיכם:

Segment 2
HE:
וזכרת את כל הדרך אשר הוליכך יהוה אלהיך זה ארבעים שנה במדבר למען ענתך לנסתך לדעת את אשר בלבבך התשמר (מצותו) מצותיו אם לא:

Segment 3
HE:
ויענך וירעבך ויאכלך את המן אשר לא ידעת ולא ידעון אבתיך למען הודיעך כי לא על הלחם לבדו יחיה האדם כי על כל מוצא פי יהוה יחיה האדם:

Segment 4
HE:
שמלתך לא בלתה מעליך ורגלך לא בצקה זה ארבעים שנה:

Segment 5
HE:
וידעת עם לבבך כי כאשר ייסר איש את בנו יהוה אלהיך מיסרך:

Segment 6
HE:
ושמרת את מצות יהוה אלהיך ללכת בדרכיו וליראה אתו:

Segment 7
HE:
כי יהוה אלהיך מביאך אל ארץ טובה ארץ נחלי מים עינת ותהמת יצאים בבקעה ובהר:

Segment 8
HE:
ארץ חטה ושערה וגפן ותאנה ורמון ארץ זית שמן ודבש:

Segment 9
HE:
ארץ אשר לא במסכנת תאכל בה לחם לא תחסר כל בה ארץ אשר אבניה ברזל ומהרריה תחצב נחשת:

Segment 10
HE:
ואכלת ושבעת וברכת את יהוה אלהיך על הארץ הטבה אשר נתן לך:

Segment 11
HE:
שני  השמר לך פן תשכח את יהוה אלהיך לבלתי שמר מצותיו ומשפטיו וחקתיו אשר אנכי מצוך היום:

Segment 12
HE:
פן תאכל ושבעת ובתים טבים תבנה וישבת:

Segment 13
HE:
ובקרך וצאנך ירבין וכסף וזהב ירבה לך וכל אשר לך ירבה:

Segment 14
HE:
ורם לבבך ושכחת את יהוה אלהיך המוציאך מארץ מצרים מבית עבדים:

Segment 15
HE:
המוליכך במדבר הגדל והנורא נחש שרף ועקרב וצמאון אשר אין מים המוציא לך מים מצור החלמיש:

Segment 16
HE:
המאכלך מן במדבר אשר לא ידעון אבתיך למען ענתך ולמען נסתך להיטבך באחריתך:

Segment 17
HE:
ואמרת בלבבך כחי ועצם ידי עשה לי את החיל הזה:

Segment 18
HE:
וזכרת את יהוה אלהיך כי הוא הנתן לך כח לעשות חיל למען הקים את בריתו אשר נשבע לאבתיך כיום הזה: (פ)

Segment 19
HE:
והיה אם שכח תשכח את יהוה אלהיך והלכת אחרי אלהים אחרים ועבדתם והשתחוית להם העדתי בכם היום כי אבד תאבדון:

Segment 20
HE:
כגוים אשר יהוה מאביד מפניכם כן תאבדון עקב לא תשמעון בקול יהוה אלהיכם: (פ)