Chronicles 1 Chapter 22
דברי הימים א פרק כב
Source: https://ajew.org/reader/tanach-divrei-hayamim-a/1/22

Segment 1
HE:
ויאמר דויד זה הוא בית יהוה האלהים וזה מזבח לעלה לישראל: (פ)

Segment 2
HE:
ויאמר דויד לכנוס את הגרים אשר בארץ ישראל ויעמד חצבים לחצוב אבני גזית לבנות בית האלהים:

Segment 3
HE:
וברזל לרב למסמרים לדלתות השערים ולמחברות הכין דויד ונחשת לרב אין משקל:

Segment 4
HE:
ועצי ארזים לאין מספר כי הביאו הצידנים והצרים עצי ארזים לרב לדויד: (פ)

Segment 5
HE:
ויאמר דויד שלמה בני נער ורך והבית לבנות ליהוה להגדיל למעלה לשם ולתפארת לכל הארצות אכינה נא לו ויכן דויד לרב לפני מותו:

Segment 6
HE:
ויקרא לשלמה בנו ויצוהו לבנות בית ליהוה אלהי ישראל: (ס)

Segment 7
HE:
ויאמר דויד לשלמה (בנו) בני אני היה עם לבבי לבנות בית לשם יהוה אלהי:

Segment 8
HE:
ויהי עלי דבר יהוה לאמר דם לרב שפכת ומלחמות גדלות עשית לא תבנה בית לשמי כי דמים רבים שפכת ארצה לפני:

Segment 9
HE:
הנה בן נולד לך הוא יהיה איש מנוחה והנחותי לו מכל אויביו מסביב כי שלמה יהיה שמו ושלום ושקט אתן על ישראל בימיו:

Segment 10
HE:
הוא יבנה בית לשמי והוא יהיה לי לבן ואני לו לאב והכינותי כסא מלכותו על ישראל עד עולם:

Segment 11
HE:
עתה בני יהי יהוה עמך והצלחת ובנית בית יהוה אלהיך כאשר דבר עליך:

Segment 12
HE:
אך יתן לך יהוה שכל ובינה ויצוך על ישראל ולשמור את תורת יהוה אלהיך:

Segment 13
HE:
אז תצליח אם תשמור לעשות את החקים ואת המשפטים אשר צוה יהוה את משה על ישראל חזק ואמץ אל תירא ואל תחת:

Segment 14
HE:
והנה בעניי הכינותי לבית יהוה זהב ככרים מאה אלף וכסף אלף אלפים ככרים ולנחשת ולברזל אין משקל כי לרב היה ועצים ואבנים הכינותי ועליהם תוסיף:

Segment 15
HE:
ועמך לרב עשי מלאכה חצבים וחרשי אבן ועץ וכל חכם בכל מלאכה:

Segment 16
HE:
לזהב לכסף ולנחשת ולברזל אין מספר קום ועשה ויהי יהוה עמך:

Segment 17
HE:
ויצו דויד לכל שרי ישראל לעזר לשלמה בנו: (ס)

Segment 18
HE:
הלא יהוה אלהיכם עמכם והניח לכם מסביב כי נתן בידי את ישבי הארץ ונכבשה הארץ לפני יהוה ולפני עמו:

Segment 19
HE:
עתה תנו לבבכם ונפשכם לדרוש ליהוה אלהיכם וקומו ובנו את מקדש יהוה האלהים להביא את ארון ברית יהוה וכלי קדש האלהים לבית הנבנה לשם יהוה: (פ)