Chronicles 2 Chapter 12
דברי הימים ב פרק יב
Source: https://ajew.org/reader/tanach-divrei-hayamim-b/1/12

Segment 1
HE:
ויהי כהכין מלכות רחבעם וכחזקתו עזב את תורת יהוה וכל ישראל עמו: (פ)

Segment 2
HE:
ויהי בשנה החמישית למלך רחבעם עלה שישק מלך מצרים על ירושלם כי מעלו ביהוה:

Segment 3
HE:
באלף ומאתים רכב ובששים אלף פרשים ואין מספר לעם אשר באו עמו ממצרים לובים סכיים וכושים:

Segment 4
HE:
וילכד את ערי המצרות אשר ליהודה ויבא עד ירושלם: (ס)

Segment 5
HE:
ושמעיה הנביא בא אל רחבעם ושרי יהודה אשר נאספו אל ירושלם מפני שישק ויאמר להם כה אמר יהוה אתם עזבתם אתי ואף אני עזבתי אתכם ביד שישק:

Segment 6
HE:
ויכנעו שרי ישראל והמלך ויאמרו צדיק יהוה:

Segment 7
HE:
ובראות יהוה כי נכנעו היה דבר יהוה אל שמעיה לאמר נכנעו לא אשחיתם ונתתי להם כמעט לפליטה ולא תתך חמתי בירושלם ביד שישק:

Segment 8
HE:
כי יהיו לו לעבדים וידעו עבודתי ועבודת ממלכות הארצות: (ס)

Segment 9
HE:
ויעל שישק מלך מצרים על ירושלם ויקח את אצרות בית יהוה ואת אצרות בית המלך את הכל לקח ויקח את מגני הזהב אשר עשה שלמה:

Segment 10
HE:
ויעש המלך רחבעם תחתיהם מגני נחשת והפקיד על יד שרי הרצים השמרים פתח בית המלך:

Segment 11
HE:
ויהי מדי בוא המלך בית יהוה באו הרצים ונשאום והשבום אל תא הרצים:

Segment 12
HE:
ובהכנעו שב ממנו אף יהוה ולא להשחית לכלה וגם ביהודה היה דברים טובים: (ס)

Segment 13
HE:
ויתחזק המלך רחבעם בירושלם וימלך כי בן ארבעים ואחת שנה רחבעם במלכו ושבע עשרה שנה מלך בירושלם העיר אשר בחר יהוה לשום את שמו שם מכל שבטי ישראל ושם אמו נעמה העמנית:

Segment 14
HE:
ויעש הרע כי לא הכין לבו לדרוש את יהוה: (ס)

Segment 15
HE:
ודברי רחבעם הראשנים והאחרונים הלא הם כתובים בדברי שמעיה הנביא ועדו החזה להתיחש ומלחמות רחבעם וירבעם כל הימים:

Segment 16
HE:
וישכב רחבעם עם אבתיו ויקבר בעיר דויד וימלך אביה בנו תחתיו: (פ)