{
  "bookId": "tanach-divrei-hayamim-b",
  "part": "1",
  "torah": "16",
  "title": "Chronicles 2 Chapter 16",
  "hebrewTitle": "דברי הימים ב פרק טז",
  "sourceUrl": "/reader/tanach-divrei-hayamim-b/1/16",
  "plainUrl": "/reader-plain/tanach-divrei-hayamim-b/1/16/",
  "segments": [
    {
      "index": 1,
      "he": "בשנת שלשים ושש למלכות אסא עלה בעשא מלך ישראל על יהודה ויבן את הרמה לבלתי תת יוצא ובא לאסא מלך יהודה:",
      "en": ""
    },
    {
      "index": 2,
      "he": "ויצא אסא כסף וזהב מאצרות בית יהוה ובית המלך וישלח אל בן הדד מלך ארם היושב בדרמשק לאמר:",
      "en": ""
    },
    {
      "index": 3,
      "he": "ברית ביני ובינך ובין אבי ובין אביך הנה שלחתי לך כסף וזהב לך הפר בריתך את בעשא מלך ישראל ויעלה מעלי:",
      "en": ""
    },
    {
      "index": 4,
      "he": "וישמע בן הדד אל המלך אסא וישלח את שרי החילים אשר לו אל ערי ישראל ויכו את עיון ואת דן ואת אבל מים ואת כל מסכנות ערי נפתלי:",
      "en": ""
    },
    {
      "index": 5,
      "he": "ויהי כשמע בעשא ויחדל מבנות את הרמה וישבת את מלאכתו: (ס)",
      "en": ""
    },
    {
      "index": 6,
      "he": "ואסא המלך לקח את כל יהודה וישאו את אבני הרמה ואת עציה אשר בנה בעשא ויבן בהם את גבע ואת המצפה: (ס)",
      "en": ""
    },
    {
      "index": 7,
      "he": "ובעת ההיא בא חנני הראה אל אסא מלך יהודה ויאמר אליו בהשענך על מלך ארם ולא נשענת על יהוה אלהיך על כן נמלט חיל מלך ארם מידך:",
      "en": ""
    },
    {
      "index": 8,
      "he": "הלא הכושים והלובים היו לחיל לרב לרכב ולפרשים להרבה מאד ובהשענך על יהוה נתנם בידך:",
      "en": ""
    },
    {
      "index": 9,
      "he": "כי יהוה עיניו משטטות בכל הארץ להתחזק עם לבבם שלם אליו נסכלת על זאת כי מעתה יש עמך מלחמות:",
      "en": ""
    },
    {
      "index": 10,
      "he": "ויכעס אסא אל הראה ויתנהו בית המהפכת כי בזעף עמו על זאת וירצץ אסא מן העם בעת ההיא:",
      "en": ""
    },
    {
      "index": 11,
      "he": "והנה דברי אסא הראשונים והאחרונים הנם כתובים על ספר המלכים ליהודה וישראל:",
      "en": ""
    },
    {
      "index": 12,
      "he": "ויחלא אסא בשנת שלושים ותשע למלכותו ברגליו עד למעלה חליו וגם בחליו לא דרש את יהוה כי ברפאים:",
      "en": ""
    },
    {
      "index": 13,
      "he": "וישכב אסא עם אבתיו וימת בשנת ארבעים ואחת למלכו:",
      "en": ""
    },
    {
      "index": 14,
      "he": "ויקברהו בקברתיו אשר כרה לו בעיר דויד וישכיבהו במשכב אשר מלא בשמים וזנים מרקחים במרקחת מעשה וישרפו לו שרפה גדולה עד למאד: (פ)",
      "en": ""
    }
  ]
}