Chronicles 2 Chapter 18
דברי הימים ב פרק יח
Source: https://ajew.org/reader/tanach-divrei-hayamim-b/1/18

Segment 1
HE:
ויהי ליהושפט עשר וכבוד לרב ויתחתן לאחאב:

Segment 2
HE:
וירד לקץ שנים אל אחאב לשמרון ויזבח לו אחאב צאן ובקר לרב ולעם אשר עמו ויסיתהו לעלות אל רמות גלעד:

Segment 3
HE:
ויאמר אחאב מלך ישראל אל יהושפט מלך יהודה התלך עמי רמת גלעד ויאמר לו כמוני כמוך וכעמך עמי ועמך במלחמה:

Segment 4
HE:
ויאמר יהושפט אל מלך ישראל דרש נא כיום את דבר יהוה:

Segment 5
HE:
ויקבץ מלך ישראל את הנבאים ארבע מאות איש ויאמר אלהם הנלך אל רמת גלעד למלחמה אם אחדל ויאמרו עלה ויתן האלהים ביד המלך:

Segment 6
HE:
ויאמר יהושפט האין פה נביא ליהוה עוד ונדרשה מאתו:

Segment 7
HE:
ויאמר מלך ישראל אל יהושפט עוד איש אחד לדרוש את יהוה מאתו ואני שנאתיהו כי איננו מתנבא עלי לטובה כי כל ימיו לרעה הוא מיכיהו בן ימלא ויאמר יהושפט אל יאמר המלך כן:

Segment 8
HE:
ויקרא מלך ישראל אל סריס אחד ויאמר מהר (מיכהו) מיכיהו בן ימלא:

Segment 9
HE:
ומלך ישראל ויהושפט מלך יהודה יושבים איש על כסאו מלבשים בגדים וישבים בגרן פתח שער שמרון וכל הנביאים מתנבאים לפניהם:

Segment 10
HE:
ויעש לו צדקיהו בן כנענה קרני ברזל ויאמר כה אמר יהוה באלה תנגח את ארם עד כלותם:

Segment 11
HE:
וכל הנבאים נבאים כן לאמר עלה רמת גלעד והצלח ונתן יהוה ביד המלך:

Segment 12
HE:
והמלאך אשר הלך לקרא למיכיהו דבר אליו לאמר הנה דברי הנבאים פה אחד טוב אל המלך ויהי נא דברך כאחד מהם ודברת טוב:

Segment 13
HE:
ויאמר מיכיהו חי יהוה כי את אשר יאמר אלהי אתו אדבר:

Segment 14
HE:
ויבא אל המלך ויאמר המלך אליו מיכה הנלך אל רמת גלעד למלחמה אם אחדל ויאמר עלו והצליחו וינתנו בידכם:

Segment 15
HE:
ויאמר אליו המלך עד כמה פעמים אני משביעך אשר לא תדבר אלי רק אמת בשם יהוה:

Segment 16
HE:
ויאמר ראיתי את כל ישראל נפוצים על ההרים כצאן אשר אין להן רעה ויאמר יהוה לא אדנים לאלה ישובו איש לביתו בשלום:

Segment 17
HE:
ויאמר מלך ישראל אל יהושפט הלא אמרתי אליך לא יתנבא עלי טוב כי אם לרע: (ס)

Segment 18
HE:
ויאמר לכן שמעו דבר יהוה ראיתי את יהוה יושב על כסאו וכל צבא השמים עמדים על ימינו ושמאלו:

Segment 19
HE:
ויאמר יהוה מי יפתה את אחאב מלך ישראל ויעל ויפל ברמות גלעד ויאמר זה אמר ככה וזה אמר ככה:

Segment 20
HE:
ויצא הרוח ויעמד לפני יהוה ויאמר אני אפתנו ויאמר יהוה אליו במה:

Segment 21
HE:
ויאמר אצא והייתי לרוח שקר בפי כל נביאיו ויאמר תפתה וגם תוכל צא ועשה כן:

Segment 22
HE:
ועתה הנה נתן יהוה רוח שקר בפי נביאיך אלה ויהוה דבר עליך רעה: (ס)

Segment 23
HE:
ויגש צדקיהו בן כנענה ויך את מיכיהו על הלחי ויאמר אי זה הדרך עבר רוח יהוה מאתי לדבר אתך:

Segment 24
HE:
ויאמר מיכיהו הנך ראה ביום ההוא אשר תבוא חדר בחדר להחבא:

Segment 25
HE:
ויאמר מלך ישראל קחו את מיכיהו והשיבהו אל אמון שר העיר ואל יואש בן המלך:

Segment 26
HE:
ואמרתם כה אמר המלך שימו זה בית הכלא והאכלהו לחם לחץ ומים לחץ עד שובי בשלום:

Segment 27
HE:
ויאמר מיכיהו אם שוב תשוב בשלום לא דבר יהוה בי ויאמר שמעו עמים כלם:

Segment 28
HE:
ויעל מלך ישראל ויהושפט מלך יהודה אל רמת גלעד:

Segment 29
HE:
ויאמר מלך ישראל אל יהושפט התחפש ובוא במלחמה ואתה לבש בגדיך ויתחפש מלך ישראל ויבאו במלחמה:

Segment 30
HE:
ומלך ארם צוה את שרי הרכב אשר לו לאמר לא תלחמו את הקטן את הגדול כי אם את מלך ישראל לבדו:

Segment 31
HE:
ויהי כראות שרי הרכב את יהושפט והמה אמרו מלך ישראל הוא ויסבו עליו להלחם ויזעק יהושפט ויהוה עזרו ויסיתם אלהים ממנו:

Segment 32
HE:
ויהי כראות שרי הרכב כי לא היה מלך ישראל וישבו מאחריו:

Segment 33
HE:
ואיש משך בקשת לתמו ויך את מלך ישראל בין הדבקים ובין השרין ויאמר לרכב הפך (ידיך) ידך והוצאתני מן המחנה כי החליתי:

Segment 34
HE:
ותעל המלחמה ביום ההוא ומלך ישראל היה מעמיד במרכבה נכח ארם עד הערב וימת לעת בוא השמש: