Chronicles 2 Chapter 20
דברי הימים ב פרק כ
Source: https://ajew.org/reader/tanach-divrei-hayamim-b/1/20

Segment 1
HE:
ויהי אחרי כן באו בני מואב ובני עמון ועמהם מהעמונים על יהושפט למלחמה:

Segment 2
HE:
ויבאו ויגידו ליהושפט לאמר בא עליך המון רב מעבר לים מארם והנם בחצצון תמר היא עין גדי:

Segment 3
HE:
וירא ויתן יהושפט את פניו לדרוש ליהוה ויקרא צום על כל יהודה:

Segment 4
HE:
ויקבצו יהודה לבקש מיהוה גם מכל ערי יהודה באו לבקש את יהוה:

Segment 5
HE:
ויעמד יהושפט בקהל יהודה וירושלם בבית יהוה לפני החצר החדשה:

Segment 6
HE:
ויאמר יהוה אלהי אבתינו הלא אתה הוא אלהים בשמים ואתה מושל בכל ממלכות הגוים ובידך כח וגבורה ואין עמך להתיצב:

Segment 7
HE:
הלא אתה אלהינו הורשת את ישבי הארץ הזאת מלפני עמך ישראל ותתנה לזרע אברהם אהבך לעולם:

Segment 8
HE:
וישבו בה ויבנו לך בה מקדש לשמך לאמר:

Segment 9
HE:
אם תבוא עלינו רעה חרב שפוט ודבר ורעב נעמדה לפני הבית הזה ולפניך כי שמך בבית הזה ונזעק אליך מצרתנו ותשמע ותושיע:

Segment 10
HE:
ועתה הנה בני עמון ומואב והר שעיר אשר לא נתתה לישראל לבוא בהם בבאם מארץ מצרים כי סרו מעליהם ולא השמידום:

Segment 11
HE:
והנה הם גמלים עלינו לבוא לגרשנו מירשתך אשר הורשתנו:

Segment 12
HE:
אלהינו הלא תשפט בם כי אין בנו כח לפני ההמון הרב הזה הבא עלינו ואנחנו לא נדע מה נעשה כי עליך עינינו:

Segment 13
HE:
וכל יהודה עמדים לפני יהוה גם טפם נשיהם ובניהם: (ס)

Segment 14
HE:
ויחזיאל בן זכריהו בן בניה בן יעיאל בן מתניה הלוי מן בני אסף היתה עליו רוח יהוה בתוך הקהל:

Segment 15
HE:
ויאמר הקשיבו כל יהודה וישבי ירושלם והמלך יהושפט כה אמר יהוה לכם אתם אל תיראו ואל תחתו מפני ההמון הרב הזה כי לא לכם המלחמה כי לאלהים:

Segment 16
HE:
מחר רדו עליהם הנם עלים במעלה הציץ ומצאתם אתם בסוף הנחל פני מדבר ירואל:

Segment 17
HE:
לא לכם להלחם בזאת התיצבו עמדו וראו את ישועת יהוה עמכם יהודה וירושלם אל תיראו ואל תחתו מחר צאו לפניהם ויהוה עמכם:

Segment 18
HE:
ויקד יהושפט אפים ארצה וכל יהודה וישבי ירושלם נפלו לפני יהוה להשתחות ליהוה:

Segment 19
HE:
ויקמו הלוים מן בני הקהתים ומן בני הקרחים להלל ליהוה אלהי ישראל בקול גדול למעלה:

Segment 20
HE:
וישכימו בבקר ויצאו למדבר תקוע ובצאתם עמד יהושפט ויאמר שמעוני יהודה וישבי ירושלם האמינו ביהוה אלהיכם ותאמנו האמינו בנביאיו והצליחו:

Segment 21
HE:
ויועץ אל העם ויעמד משררים ליהוה ומהללים להדרת קדש בצאת לפני החלוץ ואמרים הודו ליהוה כי לעולם חסדו:

Segment 22
HE:
ובעת החלו ברנה ותהלה נתן יהוה מארבים על בני עמון מואב והר שעיר הבאים ליהודה וינגפו:

Segment 23
HE:
ויעמדו בני עמון ומואב על ישבי הר שעיר להחרים ולהשמיד וככלותם ביושבי שעיר עזרו איש ברעהו למשחית:

Segment 24
HE:
ויהודה בא על המצפה למדבר ויפנו אל ההמון והנם פגרים נפלים ארצה ואין פליטה:

Segment 25
HE:
ויבא יהושפט ועמו לבז את שללם וימצאו בהם לרב ורכוש ופגרים וכלי חמדות וינצלו להם לאין משא ויהיו ימים שלושה בזזים את השלל כי רב הוא:

Segment 26
HE:
וביום הרבעי נקהלו לעמק ברכה כי שם ברכו את יהוה על כן קראו את שם המקום ההוא עמק ברכה עד היום:

Segment 27
HE:
וישבו כל איש יהודה וירושלם ויהושפט בראשם לשוב אל ירושלם בשמחה כי שמחם יהוה מאויביהם:

Segment 28
HE:
ויבאו ירושלם בנבלים ובכנרות ובחצצרות אל בית יהוה:

Segment 29
HE:
ויהי פחד אלהים על כל ממלכות הארצות בשמעם כי נלחם יהוה עם אויבי ישראל:

Segment 30
HE:
ותשקט מלכות יהושפט וינח לו אלהיו מסביב: (פ)

Segment 31
HE:
וימלך יהושפט על יהודה בן שלשים וחמש שנה במלכו ועשרים וחמש שנה מלך בירושלם ושם אמו עזובה בת שלחי:

Segment 32
HE:
וילך בדרך אביו אסא ולא סר ממנה לעשות הישר בעיני יהוה:

Segment 33
HE:
אך הבמות לא סרו ועוד העם לא הכינו לבבם לאלהי אבתיהם:

Segment 34
HE:
ויתר דברי יהושפט הראשנים והאחרנים הנם כתובים בדברי יהוא בן חנני אשר העלה על ספר מלכי ישראל:

Segment 35
HE:
ואחריכן אתחבר יהושפט מלך יהודה עם אחזיה מלך ישראל הוא הרשיע לעשות:

Segment 36
HE:
ויחברהו עמו לעשות אניות ללכת תרשיש ויעשו אניות בעציון גבר:

Segment 37
HE:
ויתנבא אליעזר בן דדוהו ממרשה על יהושפט לאמר כהתחברך עם אחזיהו פרץ יהוה את מעשיך וישברו אניות ולא עצרו ללכת אל תרשיש: