Chronicles 2 Chapter 21
דברי הימים ב פרק כא
Source: https://ajew.org/reader/tanach-divrei-hayamim-b/1/21

Segment 1
HE:
וישכב יהושפט עם אבתיו ויקבר עם אבתיו בעיר דויד וימלך יהורם בנו תחתיו:

Segment 2
HE:
ולו אחים בני יהושפט עזריה ויחיאל וזכריהו ועזריהו ומיכאל ושפטיהו כל אלה בני יהושפט מלך ישראל:

Segment 3
HE:
ויתן להם אביהם מתנות רבות לכסף ולזהב ולמגדנות עם ערי מצרות ביהודה ואת הממלכה נתן ליהורם כי הוא הבכור: (פ)

Segment 4
HE:
ויקם יהורם על ממלכת אביו ויתחזק ויהרג את כל אחיו בחרב וגם משרי ישראל:

Segment 5
HE:
בן שלשים ושתים שנה יהורם במלכו ושמונה שנים מלך בירושלם:

Segment 6
HE:
וילך בדרך מלכי ישראל כאשר עשו בית אחאב כי בת אחאב היתה לו אשה ויעש הרע בעיני יהוה:

Segment 7
HE:
ולא אבה יהוה להשחית את בית דויד למען הברית אשר כרת לדויד וכאשר אמר לתת לו ניר ולבניו כל הימים:

Segment 8
HE:
בימיו פשע אדום מתחת יד יהודה וימליכו עליהם מלך:

Segment 9
HE:
ויעבר יהורם עם שריו וכל הרכב עמו ויהי קם לילה ויך את אדום הסובב אליו ואת שרי הרכב:

Segment 10
HE:
ויפשע אדום מתחת יד יהודה עד היום הזה אז תפשע לבנה בעת ההיא מתחת ידו כי עזב את יהוה אלהי אבתיו:

Segment 11
HE:
גם הוא עשה במות בהרי יהודה ויזן את ישבי ירושלם וידח את יהודה: (פ)

Segment 12
HE:
ויבא אליו מכתב מאליהו הנביא לאמר כה אמר יהוה אלהי דויד אביך תחת אשר לא הלכת בדרכי יהושפט אביך ובדרכי אסא מלך יהודה:

Segment 13
HE:
ותלך בדרך מלכי ישראל ותזנה את יהודה ואת ישבי ירושלם כהזנות בית אחאב וגם את אחיך בית אביך הטובים ממך הרגת:

Segment 14
HE:
הנה יהוה נגף מגפה גדולה בעמך ובבניך ובנשיך ובכל רכושך:

Segment 15
HE:
ואתה בחליים רבים במחלה מעיך עד יצאו מעיך מן החלי ימים על ימים:

Segment 16
HE:
ויער יהוה על יהורם את רוח הפלשתים והערבים אשר על יד כושים:

Segment 17
HE:
ויעלו ביהודה ויבקעוה וישבו את כל הרכוש הנמצא לבית המלך וגם בניו ונשיו ולא נשאר לו בן כי אם יהואחז קטן בניו:

Segment 18
HE:
ואחרי כל זאת נגפו יהוה במעיו לחלי לאין מרפא:

Segment 19
HE:
ויהי לימים מימים וכעת צאת הקץ לימים שנים יצאו מעיו עם חליו וימת בתחלאים רעים ולא עשו לו עמו שרפה כשרפת אבתיו:

Segment 20
HE:
בן שלשים ושתים היה במלכו ושמונה שנים מלך בירושלם וילך בלא חמדה ויקברהו בעיר דויד ולא בקברות המלכים: