Chronicles 2 Chapter 26
דברי הימים ב פרק כו
Source: https://ajew.org/reader/tanach-divrei-hayamim-b/1/26

Segment 1
HE:
ויקחו כל עם יהודה את עזיהו והוא בן שש עשרה שנה וימליכו אתו תחת אביו אמציהו:

Segment 2
HE:
הוא בנה את אילות וישיבה ליהודה אחרי שכב המלך עם אבתיו: (פ)

Segment 3
HE:
בן שש עשרה שנה עזיהו במלכו וחמשים ושתים שנה מלך בירושלם ושם אמו (יכיליה) יכליה מן ירושלם:

Segment 4
HE:
ויעש הישר בעיני יהוה ככל אשר עשה אמציהו אביו:

Segment 5
HE:
ויהי לדרש אלהים בימי זכריהו המבין בראת האלהים ובימי דרשו את יהוה הצליחו האלהים:

Segment 6
HE:
ויצא וילחם בפלשתים ויפרץ את חומת גת ואת חומת יבנה ואת חומת אשדוד ויבנה ערים באשדוד ובפלשתים:

Segment 7
HE:
ויעזרהו האלהים על פלשתים ועל (הערביים) הערבים הישבים בגור בעל והמעונים:

Segment 8
HE:
ויתנו העמונים מנחה לעזיהו וילך שמו עד לבוא מצרים כי החזיק עד למעלה:

Segment 9
HE:
ויבן עזיהו מגדלים בירושלם על שער הפנה ועל שער הגיא ועל המקצוע ויחזקם:

Segment 10
HE:
ויבן מגדלים במדבר ויחצב ברות רבים כי מקנה רב היה לו ובשפלה ובמישור אכרים וכרמים בהרים ובכרמל כי אהב אדמה היה: (ס)

Segment 11
HE:
ויהי לעזיהו חיל עשה מלחמה יוצאי צבא לגדוד במספר פקדתם ביד (יעואל) יעיאל הסופר ומעשיהו השוטר על יד חנניהו משרי המלך:

Segment 12
HE:
כל מספר ראשי האבות לגבורי חיל אלפים ושש מאות:

Segment 13
HE:
ועל ידם חיל צבא שלש מאות אלף ושבעת אלפים וחמש מאות עושי מלחמה בכח חיל לעזר למלך על האויב:

Segment 14
HE:
ויכן להם עזיהו לכל הצבא מגנים ורמחים וכובעים ושרינות וקשתות ולאבני קלעים:

Segment 15
HE:
ויעש בירושלם חשבנות מחשבת חושב להיות על המגדלים ועל הפנות לירוא בחצים ובאבנים גדלות ויצא שמו עד למרחוק כי הפליא להעזר עד כי חזק:

Segment 16
HE:
וכחזקתו גבה לבו עד להשחית וימעל ביהוה אלהיו ויבא אל היכל יהוה להקטיר על מזבח הקטרת: (פ)

Segment 17
HE:
ויבא אחריו עזריהו הכהן ועמו כהנים ליהוה שמונים בני חיל:

Segment 18
HE:
ויעמדו על עזיהו המלך ויאמרו לו לא לך עזיהו להקטיר ליהוה כי לכהנים בני אהרן המקדשים להקטיר צא מן המקדש כי מעלת ולא לך לכבוד מיהוה אלהים:

Segment 19
HE:
ויזעף עזיהו ובידו מקטרת להקטיר ובזעפו עם הכהנים והצרעת זרחה במצחו לפני הכהנים בבית יהוה מעל למזבח הקטרת:

Segment 20
HE:
ויפן אליו עזריהו כהן הראש וכל הכהנים והנה הוא מצרע במצחו ויבהלוהו משם וגם הוא נדחף לצאת כי נגעו יהוה:

Segment 21
HE:
ויהי עזיהו המלך מצרע עד יום מותו וישב בית (החפשות) החפשית מצרע כי נגזר מבית יהוה ויותם בנו על בית המלך שופט את עם הארץ:

Segment 22
HE:
ויתר דברי עזיהו הראשנים והאחרנים כתב ישעיהו בן אמוץ הנביא:

Segment 23
HE:
וישכב עזיהו עם אבתיו ויקברו אתו עם אבתיו בשדה הקבורה אשר למלכים כי אמרו מצורע הוא וימלך יותם בנו תחתיו: (פ)