Chronicles 2 Chapter 30
דברי הימים ב פרק ל
Source: https://ajew.org/reader/tanach-divrei-hayamim-b/1/30

Segment 1
HE:
וישלח יחזקיהו על כל ישראל ויהודה וגם אגרות כתב על אפרים ומנשה לבוא לבית יהוה בירושלם לעשות פסח ליהוה אלהי ישראל:

Segment 2
HE:
ויועץ המלך ושריו וכל הקהל בירושלם לעשות הפסח בחדש השני:

Segment 3
HE:
כי לא יכלו לעשתו בעת ההיא כי הכהנים לא התקדשו למדי והעם לא נאספו לירושלם:

Segment 4
HE:
ויישר הדבר בעיני המלך ובעיני כל הקהל:

Segment 5
HE:
ויעמידו דבר להעביר קול בכל ישראל מבאר שבע ועד דן לבוא לעשות פסח ליהוה אלהי ישראל בירושלם כי לא לרב עשו ככתוב:

Segment 6
HE:
וילכו הרצים באגרות מיד המלך ושריו בכל ישראל ויהודה וכמצות המלך לאמר בני ישראל שובו אל יהוה אלהי אברהם יצחק וישראל וישב אל הפליטה הנשארת לכם מכף מלכי אשור:

Segment 7
HE:
ואל תהיו כאבותיכם וכאחיכם אשר מעלו ביהוה אלהי אבותיהם ויתנם לשמה כאשר אתם ראים:

Segment 8
HE:
עתה אל תקשו ערפכם כאבותיכם תנו יד ליהוה ובאו למקדשו אשר הקדיש לעולם ועבדו את יהוה אלהיכם וישב מכם חרון אפו:

Segment 9
HE:
כי בשובכם על יהוה אחיכם ובניכם לרחמים לפני שוביהם ולשוב לארץ הזאת כי חנון ורחום יהוה אלהיכם ולא יסיר פנים מכם אם תשובו אליו: (ס)

Segment 10
HE:
ויהיו הרצים עברים מעיר לעיר בארץ אפרים ומנשה ועד זבלון ויהיו משחיקים עליהם ומלעגים בם:

Segment 11
HE:
אך אנשים מאשר ומנשה ומזבלון נכנעו ויבאו לירושלם:

Segment 12
HE:
גם ביהודה היתה יד האלהים לתת להם לב אחד לעשות מצות המלך והשרים בדבר יהוה:

Segment 13
HE:
ויאספו ירושלם עם רב לעשות את חג המצות בחדש השני קהל לרב מאד:

Segment 14
HE:
ויקמו ויסירו את המזבחות אשר בירושלם ואת כל המקטרות הסירו וישליכו לנחל קדרון:

Segment 15
HE:
וישחטו הפסח בארבעה עשר לחדש השני והכהנים והלוים נכלמו ויתקדשו ויביאו עלות בית יהוה:

Segment 16
HE:
ויעמדו על עמדם כמשפטם כתורת משה איש האלהים הכהנים זרקים את הדם מיד הלוים:

Segment 17
HE:
כי רבת בקהל אשר לא התקדשו והלוים על שחיטת הפסחים לכל לא טהור להקדיש ליהוה:

Segment 18
HE:
כי מרבית העם רבת מאפרים ומנשה יששכר וזבלון לא הטהרו כי אכלו את הפסח בלא ככתוב כי התפלל יחזקיהו עליהם לאמר יהוה הטוב יכפר בעד:

Segment 19
HE:
כל לבבו הכין לדרוש האלהים יהוה אלהי אבותיו ולא כטהרת הקדש: (ס)

Segment 20
HE:
וישמע יהוה אל יחזקיהו וירפא את העם: (ס)

Segment 21
HE:
ויעשו בני ישראל הנמצאים בירושלם את חג המצות שבעת ימים בשמחה גדולה ומהללים ליהוה יום ביום הלוים והכהנים בכלי עז ליהוה: (ס)

Segment 22
HE:
וידבר יחזקיהו על לב כל הלוים המשכילים שכל טוב ליהוה ויאכלו את המועד שבעת הימים מזבחים זבחי שלמים ומתודים ליהוה אלהי אבותיהם: (ס)

Segment 23
HE:
ויועצו כל הקהל לעשות שבעת ימים אחרים ויעשו שבעת ימים שמחה:

Segment 24
HE:
כי חזקיהו מלך יהודה הרים לקהל אלף פרים ושבעת אלפים צאן (ס) והשרים הרימו לקהל פרים אלף וצאן עשרת אלפים ויתקדשו כהנים לרב:

Segment 25
HE:
וישמחו כל קהל יהודה והכהנים והלוים וכל הקהל הבאים מישראל והגרים הבאים מארץ ישראל והיושבים ביהודה:

Segment 26
HE:
ותהי שמחה גדולה בירושלם כי מימי שלמה בן דויד מלך ישראל לא כזאת בירושלם: (ס)

Segment 27
HE:
ויקמו הכהנים הלוים ויברכו את העם וישמע בקולם ותבוא תפלתם למעון קדשו לשמים: (פ)