Chronicles 2 Chapter 33
דברי הימים ב פרק לג
Source: https://ajew.org/reader/tanach-divrei-hayamim-b/1/33

Segment 1
HE:
בן שתים עשרה שנה מנשה במלכו וחמשים וחמש שנה מלך בירושלם:

Segment 2
HE:
ויעש הרע בעיני יהוה כתועבות הגוים אשר הוריש יהוה מפני בני ישראל:

Segment 3
HE:
וישב ויבן את הבמות אשר נתץ יחזקיהו אביו ויקם מזבחות לבעלים ויעש אשרות וישתחו לכל צבא השמים ויעבד אתם:

Segment 4
HE:
ובנה מזבחות בבית יהוה אשר אמר יהוה בירושלם יהיה שמי לעולם:

Segment 5
HE:
ויבן מזבחות לכל צבא השמים בשתי חצרות בית יהוה:

Segment 6
HE:
והוא העביר את בניו באש בגי בן הנם ועונן ונחש וכשף ועשה אוב וידעוני הרבה לעשות הרע בעיני יהוה להכעיסו:

Segment 7
HE:
וישם את פסל הסמל אשר עשה בבית האלהים אשר אמר אלהים אל דויד ואל שלמה בנו בבית הזה ובירושלם אשר בחרתי מכל שבטי ישראל אשים את שמי לעילום:

Segment 8
HE:
ולא אוסיף להסיר את רגל ישראל מעל האדמה אשר העמדתי לאבתיכם רק אם ישמרו לעשות את כל אשר צויתים לכל התורה והחקים והמשפטים ביד משה:

Segment 9
HE:
ויתע מנשה את יהודה וישבי ירושלם לעשות רע מן הגוים אשר השמיד יהוה מפני בני ישראל: (פ)

Segment 10
HE:
וידבר יהוה אל מנשה ואל עמו ולא הקשיבו:

Segment 11
HE:
ויבא יהוה עליהם את שרי הצבא אשר למלך אשור וילכדו את מנשה בחחים ויאסרהו בנחשתים ויוליכהו בבלה:

Segment 12
HE:
וכהצר לו חלה את פני יהוה אלהיו ויכנע מאד מלפני אלהי אבתיו:

Segment 13
HE:
ויתפלל אליו ויעתר לו וישמע תחנתו וישיבהו ירושלם למלכותו וידע מנשה כי יהוה הוא האלהים:

Segment 14
HE:
ואחרי כן בנה חומה חיצונה לעיר דויד מערבה לגיחון בנחל ולבוא בשער הדגים וסבב לעפל ויגביהה מאד וישם שרי חיל בכל הערים הבצרות ביהודה:

Segment 15
HE:
ויסר את אלהי הנכר ואת הסמל מבית יהוה וכל המזבחות אשר בנה בהר בית יהוה ובירושלם וישלך חוצה לעיר:

Segment 16
HE:
(ויכן) ויבן את מזבח יהוה ויזבח עליו זבחי שלמים ותודה ויאמר ליהודה לעבוד את יהוה אלהי ישראל:

Segment 17
HE:
אבל עוד העם זבחים בבמות רק ליהוה אלהיהם:

Segment 18
HE:
ויתר דברי מנשה ותפלתו אל אלהיו ודברי החזים המדברים אליו בשם יהוה אלהי ישראל הנם על דברי מלכי ישראל:

Segment 19
HE:
ותפלתו והעתר לו וכל חטאתו ומעלו והמקמות אשר בנה בהם במות והעמיד האשרים והפסלים לפני הכנעו הנם כתובים על דברי חוזי:

Segment 20
HE:
וישכב מנשה עם אבתיו ויקברהו ביתו וימלך אמון בנו תחתיו: (פ)

Segment 21
HE:
בן עשרים ושתים שנה אמון במלכו ושתים שנים מלך בירושלם:

Segment 22
HE:
ויעש הרע בעיני יהוה כאשר עשה מנשה אביו ולכל הפסילים אשר עשה מנשה אביו זבח אמון ויעבדם:

Segment 23
HE:
ולא נכנע מלפני יהוה כהכנע מנשה אביו כי הוא אמון הרבה אשמה:

Segment 24
HE:
ויקשרו עליו עבדיו וימיתהו בביתו:

Segment 25
HE:
ויכו עם הארץ את כל הקשרים על המלך אמון וימליכו עם הארץ את יאשיהו בנו תחתיו: (פ)