Chronicles 2 Chapter 34
דברי הימים ב פרק לד
Source: https://ajew.org/reader/tanach-divrei-hayamim-b/1/34

Segment 1
HE:
בן שמונה שנים יאשיהו במלכו ושלשים ואחת שנה מלך בירושלם:

Segment 2
HE:
ויעש הישר בעיני יהוה וילך בדרכי דויד אביו ולא סר ימין ושמאול:

Segment 3
HE:
ובשמונה שנים למלכו והוא עודנו נער החל לדרוש לאלהי דויד אביו ובשתים עשרה שנה החל לטהר את יהודה וירושלם מן הבמות והאשרים והפסלים והמסכות:

Segment 4
HE:
וינתצו לפניו את מזבחות הבעלים והחמנים אשר למעלה מעליהם גדע והאשרים והפסלים והמסכות שבר והדק ויזרק על פני הקברים הזבחים להם:

Segment 5
HE:
ועצמות כהנים שרף על (מזבחותים) מזבחותם ויטהר את יהודה ואת ירושלם:

Segment 6
HE:
ובערי מנשה ואפרים ושמעון ועד נפתלי (בהר) (בתיהם) בחרבתיהם סביב:

Segment 7
HE:
וינתץ את המזבחות ואת האשרים והפסלים כתת להדק וכל החמנים גדע בכל ארץ ישראל וישב לירושלם: (פ)

Segment 8
HE:
ובשנת שמונה עשרה למלכו לטהר הארץ והבית שלח את שפן בן אצליהו ואת מעשיהו שר העיר ואת יואח בן יואחז המזכיר לחזק את בית יהוה אלהיו:

Segment 9
HE:
ויבאו אל חלקיהו הכהן הגדול ויתנו את הכסף המובא בית אלהים אשר אספו הלוים שמרי הסף מיד מנשה ואפרים ומכל שארית ישראל ומכל יהודה ובנימן (וישבי) וישבו ירושלם:

Segment 10
HE:
ויתנו על יד עשה המלאכה המפקדים בבית יהוה ויתנו אתו עושי המלאכה אשר עשים בבית יהוה לבדוק ולחזק הבית:

Segment 11
HE:
ויתנו לחרשים ולבנים לקנות אבני מחצב ועצים למחברות ולקרות את הבתים אשר השחיתו מלכי יהודה: (ס)

Segment 12
HE:
והאנשים עשים באמונה במלאכה ועליהם מפקדים יחת ועבדיהו הלוים מן בני מררי וזכריה ומשלם מן בני הקהתים לנצח והלוים כל מבין בכלי שיר:

Segment 13
HE:
ועל הסבלים ומנצחים לכל עשה מלאכה לעבודה ועבודה ומהלוים סופרים ושטרים ושוערים:

Segment 14
HE:
ובהוציאם את הכסף המובא בית יהוה מצא חלקיהו הכהן את ספר תורת יהוה ביד משה:

Segment 15
HE:
ויען חלקיהו ויאמר אל שפן הסופר ספר התורה מצאתי בבית יהוה ויתן חלקיהו את הספר אל שפן:

Segment 16
HE:
ויבא שפן את הספר אל המלך וישב עוד את המלך דבר לאמר כל אשר נתן ביד עבדיך הם עשים:

Segment 17
HE:
ויתיכו את הכסף הנמצא בבית יהוה ויתנוהו על יד המפקדים ועל יד עושי המלאכה:

Segment 18
HE:
ויגד שפן הסופר למלך לאמר ספר נתן לי חלקיהו הכהן ויקרא בו שפן לפני המלך:

Segment 19
HE:
ויהי כשמע המלך את דברי התורה ויקרע את בגדיו:

Segment 20
HE:
ויצו המלך את חלקיהו ואת אחיקם בן שפן ואת עבדון בן מיכה ואת שפן הסופר ואת עשיה עבד המלך לאמר:

Segment 21
HE:
לכו דרשו את יהוה בעדי ובעד הנשאר בישראל וביהודה על דברי הספר אשר נמצא כי גדולה חמת יהוה אשר נתכה בנו על אשר לא שמרו אבותינו את דבר יהוה לעשות ככל הכתוב על הספר הזה:

Segment 22
HE:
וילך חלקיהו ואשר המלך אל חלדה הנביאה אשת שלם בן (תוקהת) תקהת בן חסרה שומר הבגדים והיא יושבת בירושלם במשנה וידברו אליה כזאת:

Segment 23
HE:
ותאמר להם כה אמר יהוה אלהי ישראל אמרו לאיש אשר שלח אתכם אלי: (ס)

Segment 24
HE:
כה אמר יהוה הנני מביא רעה על המקום הזה ועל יושביו את כל האלות הכתובות על הספר אשר קראו לפני מלך יהודה:

Segment 25
HE:
תחת אשר עזבוני (ויקטירו) ויקטרו לאלהים אחרים למען הכעיסני בכל מעשי ידיהם ותתך חמתי במקום הזה ולא תכבה:

Segment 26
HE:
ואל מלך יהודה השלח אתכם לדרוש ביהוה כה תאמרו אליו (ס) כה אמר יהוה אלהי ישראל הדברים אשר שמעת:

Segment 27
HE:
יען רך לבבך ותכנע מלפני אלהים בשמעך את דבריו על המקום הזה ועל ישביו ותכנע לפני ותקרע את בגדיך ותבך לפני וגם אני שמעתי נאם יהוה:

Segment 28
HE:
הנני אספך אל אבתיך ונאספת אל קברתיך בשלום ולא תראינה עיניך בכל הרעה אשר אני מביא על המקום הזה ועל ישביו וישיבו את המלך דבר: (ס)

Segment 29
HE:
וישלח המלך ויאסף את כל זקני יהודה וירושלם:

Segment 30
HE:
ויעל המלך בית יהוה וכל איש יהודה וישבי ירושלם והכהנים והלוים וכל העם מגדול ועד קטן ויקרא באזניהם את כל דברי ספר הברית הנמצא בית יהוה:

Segment 31
HE:
ויעמד המלך על עמדו ויכרת את הברית לפני יהוה ללכת אחרי יהוה ולשמור את מצותיו ועדותיו וחקיו בכל לבבו ובכל נפשו לעשות את דברי הברית הכתובים על הספר הזה:

Segment 32
HE:
ויעמד את כל הנמצא בירושלם ובנימן ויעשו ישבי ירושלם כברית אלהים אלהי אבותיהם:

Segment 33
HE:
ויסר יאשיהו את כל התועבות מכל הארצות אשר לבני ישראל ויעבד את כל הנמצא בישראל לעבוד את יהוה אלהיהם כל ימיו לא סרו מאחרי יהוה אלהי אבותיהם: (ס)