{
  "bookId": "tanach-divrei-hayamim-b",
  "part": "1",
  "torah": "5",
  "title": "Chronicles 2 Chapter 5",
  "hebrewTitle": "דברי הימים ב פרק ה",
  "sourceUrl": "/reader/tanach-divrei-hayamim-b/1/5",
  "plainUrl": "/reader-plain/tanach-divrei-hayamim-b/1/5/",
  "segments": [
    {
      "index": 1,
      "he": "ותשלם כל המלאכה אשר עשה שלמה לבית יהוה (ס) ויבא שלמה את קדשי דויד אביו ואת הכסף ואת הזהב ואת כל הכלים נתן באצרות בית האלהים: (פ)",
      "en": ""
    },
    {
      "index": 2,
      "he": "אז יקהיל שלמה את זקני ישראל ואת כל ראשי המטות נשיאי האבות לבני ישראל אל ירושלם להעלות את ארון ברית יהוה מעיר דויד היא ציון:",
      "en": ""
    },
    {
      "index": 3,
      "he": "ויקהלו אל המלך כל איש ישראל בחג הוא החדש השבעי:",
      "en": ""
    },
    {
      "index": 4,
      "he": "ויבאו כל זקני ישראל וישאו הלוים את הארון:",
      "en": ""
    },
    {
      "index": 5,
      "he": "ויעלו את הארון ואת אהל מועד ואת כל כלי הקדש אשר באהל העלו אתם הכהנים הלוים:",
      "en": ""
    },
    {
      "index": 6,
      "he": "והמלך שלמה וכל עדת ישראל הנועדים עליו לפני הארון מזבחים צאן ובקר אשר לא יספרו ולא ימנו מרב:",
      "en": ""
    },
    {
      "index": 7,
      "he": "ויביאו הכהנים את ארון ברית יהוה אל מקומו אל דביר הבית אל קדש הקדשים אל תחת כנפי הכרובים:",
      "en": ""
    },
    {
      "index": 8,
      "he": "ויהיו הכרובים פרשים כנפים על מקום הארון ויכסו הכרובים על הארון ועל בדיו מלמעלה:",
      "en": ""
    },
    {
      "index": 9,
      "he": "ויאריכו הבדים ויראו ראשי הבדים מן הארון על פני הדביר ולא יראו החוצה ויהי שם עד היום הזה:",
      "en": ""
    },
    {
      "index": 10,
      "he": "אין בארון רק שני הלחות אשר נתן משה בחרב אשר כרת יהוה עם בני ישראל בצאתם ממצרים: (פ)",
      "en": ""
    },
    {
      "index": 11,
      "he": "ויהי בצאת הכהנים מן הקדש כי כל הכהנים הנמצאים התקדשו אין לשמור למחלקות:",
      "en": ""
    },
    {
      "index": 12,
      "he": "והלוים המשררים לכלם לאסף להימן לידתון ולבניהם ולאחיהם מלבשים בוץ במצלתים ובנבלים וכנרות עמדים מזרח למזבח ועמהם כהנים למאה ועשרים (מחצררים) מחצרים בחצצרות:",
      "en": ""
    },
    {
      "index": 13,
      "he": "ויהי כאחד (למחצצרים) למחצרים ולמשררים להשמיע קול אחד להלל ולהדות ליהוה וכהרים קול בחצצרות ובמצלתים ובכלי השיר ובהלל ליהוה כי טוב כי לעולם חסדו והבית מלא ענן בית יהוה:",
      "en": ""
    },
    {
      "index": 14,
      "he": "ולא יכלו הכהנים לעמוד לשרת מפני הענן כי מלא כבוד יהוה את בית האלהים: (פ)",
      "en": ""
    }
  ]
}