Chronicles 2 Chapter 6
דברי הימים ב פרק ו
Source: https://ajew.org/reader/tanach-divrei-hayamim-b/1/6

Segment 1
HE:
אז אמר שלמה יהוה אמר לשכון בערפל:

Segment 2
HE:
ואני בניתי בית זבל לך ומכון לשבתך עולמים:

Segment 3
HE:
ויסב המלך את פניו ויברך את כל קהל ישראל וכל קהל ישראל עומד:

Segment 4
HE:
ויאמר ברוך יהוה אלהי ישראל אשר דבר בפיו את דויד אבי ובידיו מלא לאמר:

Segment 5
HE:
מן היום אשר הוצאתי את עמי מארץ מצרים לא בחרתי בעיר מכל שבטי ישראל לבנות בית להיות שמי שם ולא בחרתי באיש להיות נגיד על עמי ישראל:

Segment 6
HE:
ואבחר בירושלם להיות שמי שם ואבחר בדויד להיות על עמי ישראל:

Segment 7
HE:
ויהי עם לבב דויד אבי לבנות בית לשם יהוה אלהי ישראל:

Segment 8
HE:
ויאמר יהוה אל דויד אבי יען אשר היה עם לבבך לבנות בית לשמי הטיבות כי היה עם לבבך:

Segment 9
HE:
רק אתה לא תבנה הבית כי בנך היוצא מחלציך הוא יבנה הבית לשמי:

Segment 10
HE:
ויקם יהוה את דברו אשר דבר ואקום תחת דויד אבי ואשב על כסא ישראל כאשר דבר יהוה ואבנה הבית לשם יהוה אלהי ישראל:

Segment 11
HE:
ואשים שם את הארון אשר שם ברית יהוה אשר כרת עם בני ישראל:

Segment 12
HE:
ויעמד לפני מזבח יהוה נגד כל קהל ישראל ויפרש כפיו:

Segment 13
HE:
כי עשה שלמה כיור נחשת ויתנהו בתוך העזרה חמש אמות ארכו וחמש אמות רחבו ואמות שלוש קומתו ויעמד עליו ויברך על ברכיו נגד כל קהל ישראל ויפרש כפיו השמימה: (פ)

Segment 14
HE:
ויאמר (פ) יהוה אלהי ישראל אין כמוך אלהים בשמים ובארץ שמר הברית והחסד לעבדיך ההלכים לפניך בכל לבם:

Segment 15
HE:
אשר שמרת לעבדך דויד אבי את אשר דברת לו ותדבר בפיך ובידך מלאת כיום הזה:

Segment 16
HE:
ועתה יהוה אלהי ישראל שמר לעבדך דויד אבי את אשר דברת לו לאמר לא יכרת לך איש מלפני יושב על כסא ישראל רק אם ישמרו בניך את דרכם ללכת בתורתי כאשר הלכת לפני:

Segment 17
HE:
ועתה יהוה אלהי ישראל יאמן דברך אשר דברת לעבדך לדויד:

Segment 18
HE:
כי האמנם ישב אלהים את האדם על הארץ הנה שמים ושמי השמים לא יכלכלוך אף כי הבית הזה אשר בניתי:

Segment 19
HE:
ופנית אל תפלת עבדך ואל תחנתו יהוה אלהי לשמע אל הרנה ואל התפלה אשר עבדך מתפלל לפניך:

Segment 20
HE:
להיות עיניך פתחות אל הבית הזה יומם ולילה אל המקום אשר אמרת לשום שמך שם לשמוע אל התפלה אשר יתפלל עבדך אל המקום הזה:

Segment 21
HE:
ושמעת אל תחנוני עבדך ועמך ישראל אשר יתפללו אל המקום הזה ואתה תשמע ממקום שבתך מן השמים ושמעת וסלחת:

Segment 22
HE:
אם יחטא איש לרעהו ונשא בו אלה להאלתו ובא אלה לפני מזבחך בבית הזה:

Segment 23
HE:
ואתה תשמע מן השמים ועשית ושפטת את עבדיך להשיב לרשע לתת דרכו בראשו ולהצדיק צדיק לתת לו כצדקתו: (ס)

Segment 24
HE:
ואם ינגף עמך ישראל לפני אויב כי יחטאו לך ושבו והודו את שמך והתפללו והתחננו לפניך בבית הזה:

Segment 25
HE:
ואתה תשמע מן השמים וסלחת לחטאת עמך ישראל והשיבותם אל האדמה אשר נתתה להם ולאבתיהם: (פ)

Segment 26
HE:
בהעצר השמים ולא יהיה מטר כי יחטאו לך והתפללו אל המקום הזה והודו את שמך מחטאתם ישובון כי תענם:

Segment 27
HE:
ואתה תשמע השמים וסלחת לחטאת עבדיך ועמך ישראל כי תורם אל הדרך הטובה אשר ילכו בה ונתתה מטר על ארצך אשר נתתה לעמך לנחלה: (ס)

Segment 28
HE:
רעב כי יהיה בארץ דבר כי יהיה שדפון וירקון ארבה וחסיל כי יהיה כי יצר לו אויביו בארץ שעריו כל נגע וכל מחלה:

Segment 29
HE:
כל תפלה כל תחנה אשר יהיה לכל האדם ולכל עמך ישראל אשר ידעו איש נגעו ומכאבו ופרש כפיו אל הבית הזה:

Segment 30
HE:
ואתה תשמע מן השמים מכון שבתך וסלחת ונתתה לאיש ככל דרכיו אשר תדע את לבבו כי אתה לבדך ידעת את לבב בני האדם:

Segment 31
HE:
למען ייראוך ללכת בדרכיך כל הימים אשר הם חיים על פני האדמה אשר נתתה לאבתינו: (ס)

Segment 32
HE:
וגם אל הנכרי אשר לא מעמך ישראל הוא ובא מארץ רחוקה למען שמך הגדול וידך החזקה וזרועך הנטויה ובאו והתפללו אל הבית הזה:

Segment 33
HE:
ואתה תשמע מן השמים ממכון שבתך ועשית ככל אשר יקרא אליך הנכרי למען ידעו כל עמי הארץ את שמך וליראה אתך כעמך ישראל ולדעת כי שמך נקרא על הבית הזה אשר בניתי:

Segment 34
HE:
כי יצא עמך למלחמה על אויביו בדרך אשר תשלחם והתפללו אליך דרך העיר הזאת אשר בחרת בה והבית אשר בניתי לשמך:

Segment 35
HE:
ושמעת מן השמים את תפלתם ואת תחנתם ועשית משפטם:

Segment 36
HE:
כי יחטאו לך כי אין אדם אשר לא יחטא ואנפת בם ונתתם לפני אויב ושבום שוביהם אל ארץ רחוקה או קרובה:

Segment 37
HE:
והשיבו אל לבבם בארץ אשר נשבו שם ושבו והתחננו אליך בארץ שבים לאמר חטאנו העוינו ורשענו:

Segment 38
HE:
ושבו אליך בכל לבם ובכל נפשם בארץ שבים אשר שבו אתם והתפללו דרך ארצם אשר נתתה לאבותם והעיר אשר בחרת ולבית אשר בניתי לשמך:

Segment 39
HE:
ושמעת מן השמים ממכון שבתך את תפלתם ואת תחנתיהם ועשית משפטם וסלחת לעמך אשר חטאו לך:

Segment 40
HE:
עתה אלהי יהיו נא עיניך פתחות ואזניך קשבות לתפלת המקום הזה: (ס)

Segment 41
HE:
ועתה קומה יהוה אלהים לנוחך אתה וארון עזך כהניך יהוה אלהים ילבשו תשועה וחסידיך ישמחו בטוב:

Segment 42
HE:
יהוה אלהים אל תשב פני משיחיך זכרה לחסדי דויד עבדך: (פ)