{
  "bookId": "tanach-ezra",
  "part": "1",
  "torah": "9",
  "title": "Ezra Chapter 9",
  "hebrewTitle": "עזרא פרק ט",
  "sourceUrl": "/reader/tanach-ezra/1/9",
  "plainUrl": "/reader-plain/tanach-ezra/1/9/",
  "segments": [
    {
      "index": 1,
      "he": "וככלות אלה נגשו אלי השרים לאמר לא נבדלו העם ישראל והכהנים והלוים מעמי הארצות כתועבתיהם לכנעני החתי הפרזי היבוסי העמני המאבי המצרי והאמרי:",
      "en": ""
    },
    {
      "index": 2,
      "he": "כי נשאו מבנתיהם להם ולבניהם והתערבו זרע הקדש בעמי הארצות ויד השרים והסגנים היתה במעל הזה ראשונה: (ס)",
      "en": ""
    },
    {
      "index": 3,
      "he": "וכשמעי את הדבר הזה קרעתי את בגדי ומעילי ואמרטה משער ראשי וזקני ואשבה משומם:",
      "en": ""
    },
    {
      "index": 4,
      "he": "ואלי יאספו כל חרד בדברי אלהי ישראל על מעל הגולה ואני ישב משומם עד למנחת הערב:",
      "en": ""
    },
    {
      "index": 5,
      "he": "ובמנחת הערב קמתי מתעניתי ובקרעי בגדי ומעילי ואכרעה על ברכי ואפרשה כפי אל יהוה אלהי:",
      "en": ""
    },
    {
      "index": 6,
      "he": "ואמרה אלהי בשתי ונכלמתי להרים אלהי פני אליך כי עונתינו רבו למעלה ראש ואשמתנו גדלה עד לשמים:",
      "en": ""
    },
    {
      "index": 7,
      "he": "מימי אבתינו אנחנו באשמה גדלה עד היום הזה ובעונתינו נתנו אנחנו מלכינו כהנינו ביד מלכי הארצות בחרב בשבי ובבזה ובבשת פנים כהיום הזה:",
      "en": ""
    },
    {
      "index": 8,
      "he": "ועתה כמעט רגע היתה תחנה מאת יהוה אלהינו להשאיר לנו פליטה ולתת לנו יתד במקום קדשו להאיר עינינו אלהינו ולתתנו מחיה מעט בעבדתנו:",
      "en": ""
    },
    {
      "index": 9,
      "he": "כי עבדים אנחנו ובעבדתנו לא עזבנו אלהינו ויט עלינו חסד לפני מלכי פרס לתת לנו מחיה לרומם את בית אלהינו ולהעמיד את חרבתיו ולתת לנו גדר ביהודה ובירושלם: (ס)",
      "en": ""
    },
    {
      "index": 10,
      "he": "ועתה מה נאמר אלהינו אחרי זאת כי עזבנו מצותיך:",
      "en": ""
    },
    {
      "index": 11,
      "he": "אשר צוית ביד עבדיך הנביאים לאמר הארץ אשר אתם באים לרשתה ארץ נדה היא בנדת עמי הארצות בתועבתיהם אשר מלאוה מפה אל פה בטמאתם:",
      "en": ""
    },
    {
      "index": 12,
      "he": "ועתה בנותיכם אל תתנו לבניהם ובנתיהם אל תשאו לבניכם ולא תדרשו שלמם וטובתם עד עולם למען תחזקו ואכלתם את טוב הארץ והורשתם לבניכם עד עולם:",
      "en": ""
    },
    {
      "index": 13,
      "he": "ואחרי כל הבא עלינו במעשינו הרעים ובאשמתנו הגדלה כי אתה אלהינו חשכת למטה מעוננו ונתתה לנו פליטה כזאת:",
      "en": ""
    },
    {
      "index": 14,
      "he": "הנשוב להפר מצותיך ולהתחתן בעמי התעבות האלה הלוא תאנף בנו עד כלה לאין שארית ופליטה: (פ)",
      "en": ""
    },
    {
      "index": 15,
      "he": "יהוה אלהי ישראל צדיק אתה כי נשארנו פליטה כהיום הזה הננו לפניך באשמתינו כי אין לעמוד לפניך על זאת: (פ)",
      "en": ""
    }
  ]
}