Kings 1 Chapter 11
מלכים א פרק יא
Source: https://ajew.org/reader/tanach-melachim-a/1/11

Segment 1
HE:
והמלך שלמה אהב נשים נכריות רבות ואת בת פרעה מואביות עמניות אדמית צדנית חתית:

Segment 2
HE:
מן הגוים אשר אמר יהוה אל בני ישראל לא תבאו בהם והם לא יבאו בכם אכן יטו את לבבכם אחרי אלהיהם בהם דבק שלמה לאהבה:

Segment 3
HE:
ויהי לו נשים שרות שבע מאות ופלגשים שלש מאות ויטו נשיו את לבו:

Segment 4
HE:
ויהי לעת זקנת שלמה נשיו הטו את לבבו אחרי אלהים אחרים ולא היה לבבו שלם עם יהוה אלהיו כלבב דויד אביו:

Segment 5
HE:
וילך שלמה אחרי עשתרת אלהי צדנים ואחרי מלכם שקץ עמנים:

Segment 6
HE:
ויעש שלמה הרע בעיני יהוה ולא מלא אחרי יהוה כדוד אביו: (ס)

Segment 7
HE:
אז יבנה שלמה במה לכמוש שקץ מואב בהר אשר על פני ירושלם ולמלך שקץ בני עמון:

Segment 8
HE:
וכן עשה לכל נשיו הנכריות מקטירות ומזבחות לאלהיהן:

Segment 9
HE:
ויתאנף יהוה בשלמה כי נטה לבבו מעם יהוה אלהי ישראל הנראה אליו פעמים:

Segment 10
HE:
וצוה אליו על הדבר הזה לבלתי לכת אחרי אלהים אחרים ולא שמר את אשר צוה יהוה: (פ)

Segment 11
HE:
ויאמר יהוה לשלמה יען אשר היתה זאת עמך ולא שמרת בריתי וחקתי אשר צויתי עליך קרע אקרע את הממלכה מעליך ונתתיה לעבדך:

Segment 12
HE:
אך בימיך לא אעשנה למען דוד אביך מיד בנך אקרענה:

Segment 13
HE:
רק את כל הממלכה לא אקרע שבט אחד אתן לבנך למען דוד עבדי ולמען ירושלם אשר בחרתי:

Segment 14
HE:
ויקם יהוה שטן לשלמה את הדד האדמי מזרע המלך הוא באדום:

Segment 15
HE:
ויהי בהיות דוד את אדום בעלות יואב שר הצבא לקבר את החללים ויך כל זכר באדום:

Segment 16
HE:
כי ששת חדשים ישב שם יואב וכל ישראל עד הכרית כל זכר באדום:

Segment 17
HE:
ויברח אדד הוא ואנשים אדמיים מעבדי אביו אתו לבוא מצרים והדד נער קטן:

Segment 18
HE:
ויקמו ממדין ויבאו פארן ויקחו אנשים עמם מפארן ויבאו מצרים אל פרעה מלך מצרים ויתן לו בית ולחם אמר לו וארץ נתן לו:

Segment 19
HE:
וימצא הדד חן בעיני פרעה מאד ויתן לו אשה את אחות אשתו אחות תחפניס הגבירה:

Segment 20
HE:
ותלד לו אחות תחפניס את גנבת בנו ותגמלהו תחפנס בתוך בית פרעה ויהי גנבת בית פרעה בתוך בני פרעה:

Segment 21
HE:
והדד שמע במצרים כי שכב דוד עם אבתיו וכי מת יואב שר הצבא ויאמר הדד אל פרעה שלחני ואלך אל ארצי:

Segment 22
HE:
ויאמר לו פרעה כי מה אתה חסר עמי והנך מבקש ללכת אל ארצך ויאמר לא כי שלח תשלחני:

Segment 23
HE:
ויקם אלהים לו שטן את רזון בן אלידע אשר ברח מאת הדדעזר מלך צובה אדניו:

Segment 24
HE:
ויקבץ עליו אנשים ויהי שר גדוד בהרג דוד אתם וילכו דמשק וישבו בה וימלכו בדמשק:

Segment 25
HE:
ויהי שטן לישראל כל ימי שלמה ואת הרעה אשר הדד ויקץ בישראל וימלך על ארם: (פ)

Segment 26
HE:
וירבעם בן נבט אפרתי מן הצרדה ושם אמו צרועה אשה אלמנה עבד לשלמה וירם יד במלך:

Segment 27
HE:
וזה הדבר אשר הרים יד במלך שלמה בנה את המלוא סגר את פרץ עיר דוד אביו:

Segment 28
HE:
והאיש ירבעם גבור חיל וירא שלמה את הנער כי עשה מלאכה הוא ויפקד אתו לכל סבל בית יוסף: (ס)

Segment 29
HE:
ויהי בעת ההיא וירבעם יצא מירושלם וימצא אתו אחיה השילני הנביא בדרך והוא מתכסה בשלמה חדשה ושניהם לבדם בשדה:

Segment 30
HE:
ויתפש אחיה בשלמה החדשה אשר עליו ויקרעה שנים עשר קרעים:

Segment 31
HE:
ויאמר לירבעם קח לך עשרה קרעים כי כה אמר יהוה אלהי ישראל הנני קרע את הממלכה מיד שלמה ונתתי לך את עשרה השבטים:

Segment 32
HE:
והשבט האחד יהיה לו למען עבדי דוד ולמען ירושלם העיר אשר בחרתי בה מכל שבטי ישראל:

Segment 33
HE:
יען אשר עזבוני וישתחוו לעשתרת אלהי צדנין לכמוש אלהי מואב ולמלכם אלהי בני עמון ולא הלכו בדרכי לעשות הישר בעיני וחקתי ומשפטי כדוד אביו:

Segment 34
HE:
ולא אקח את כל הממלכה מידו כי נשיא אשתנו כל ימי חייו למען דוד עבדי אשר בחרתי אתו אשר שמר מצותי וחקתי:

Segment 35
HE:
ולקחתי המלוכה מיד בנו ונתתיה לך את עשרת השבטים:

Segment 36
HE:
ולבנו אתן שבט אחד למען היות ניר לדויד עבדי כל הימים לפני בירושלם העיר אשר בחרתי לי לשום שמי שם:

Segment 37
HE:
ואתך אקח ומלכת בכל אשר תאוה נפשך והיית מלך על ישראל:

Segment 38
HE:
והיה אם תשמע את כל אשר אצוך והלכת בדרכי ועשית הישר בעיני לשמור חקותי ומצותי כאשר עשה דוד עבדי והייתי עמך ובניתי לך בית נאמן כאשר בניתי לדוד ונתתי לך את ישראל:

Segment 39
HE:
ואענה את זרע דוד למען זאת אך לא כל הימים: (ס)

Segment 40
HE:
ויבקש שלמה להמית את ירבעם ויקם ירבעם ויברח מצרים אל שישק מלך מצרים ויהי במצרים עד מות שלמה:

Segment 41
HE:
ויתר דברי שלמה וכל אשר עשה וחכמתו הלוא הם כתבים על ספר דברי שלמה:

Segment 42
HE:
והימים אשר מלך שלמה בירושלם על כל ישראל ארבעים שנה:

Segment 43
HE:
וישכב שלמה עם אבתיו ויקבר בעיר דוד אביו וימלך רחבעם בנו תחתיו: (ס)