Kings 1 Chapter 14
מלכים א פרק יד
Source: https://ajew.org/reader/tanach-melachim-a/1/14

Segment 1
HE:
בעת ההיא חלה אביה בן ירבעם:

Segment 2
HE:
ויאמר ירבעם לאשתו קומי נא והשתנית ולא ידעו כי (אתי) את אשת ירבעם והלכת שלה הנה שם אחיה הנביא הוא דבר עלי למלך על העם הזה:

Segment 3
HE:
ולקחת בידך עשרה לחם ונקדים ובקבק דבש ובאת אליו הוא יגיד לך מה יהיה לנער:

Segment 4
HE:
ותעש כן אשת ירבעם ותקם ותלך שלה ותבא בית אחיה ואחיהו לא יכל לראות כי קמו עיניו משיבו: (ס)

Segment 5
HE:
ויהוה אמר אל אחיהו הנה אשת ירבעם באה לדרש דבר מעמך אל בנה כי חלה הוא כזה וכזה תדבר אליה ויהי כבאה והיא מתנכרה:

Segment 6
HE:
ויהי כשמע אחיהו את קול רגליה באה בפתח ויאמר באי אשת ירבעם למה זה את מתנכרה ואנכי שלוח אליך קשה:

Segment 7
HE:
לכי אמרי לירבעם כה אמר יהוה אלהי ישראל יען אשר הרימתיך מתוך העם ואתנך נגיד על עמי ישראל:

Segment 8
HE:
ואקרע את הממלכה מבית דוד ואתנה לך ולא היית כעבדי דוד אשר שמר מצותי ואשר הלך אחרי בכל לבבו לעשות רק הישר בעיני:

Segment 9
HE:
ותרע לעשות מכל אשר היו לפניך ותלך ותעשה לך אלהים אחרים ומסכות להכעיסני ואתי השלכת אחרי גוך: (ס)

Segment 10
HE:
לכן הנני מביא רעה אל בית ירבעם והכרתי לירבעם משתין בקיר עצור ועזוב בישראל ובערתי אחרי בית ירבעם כאשר יבער הגלל עד תמו:

Segment 11
HE:
המת לירבעם בעיר יאכלו הכלבים והמת בשדה יאכלו עוף השמים כי יהוה דבר:

Segment 12
HE:
ואת קומי לכי לביתך בבאה רגליך העירה ומת הילד:

Segment 13
HE:
וספדו לו כל ישראל וקברו אתו כי זה לבדו יבא לירבעם אל קבר יען נמצא בו דבר טוב אל יהוה אלהי ישראל בבית ירבעם:

Segment 14
HE:
והקים יהוה לו מלך על ישראל אשר יכרית את בית ירבעם זה היום ומה גם עתה:

Segment 15
HE:
והכה יהוה את ישראל כאשר ינוד הקנה במים ונתש את ישראל מעל האדמה הטובה הזאת אשר נתן לאבותיהם וזרם מעבר לנהר יען אשר עשו את אשריהם מכעיסים את יהוה:

Segment 16
HE:
ויתן את ישראל בגלל חטאות ירבעם אשר חטא ואשר החטיא את ישראל:

Segment 17
HE:
ותקם אשת ירבעם ותלך ותבא תרצתה היא באה בסף הבית והנער מת:

Segment 18
HE:
ויקברו אתו ויספדו לו כל ישראל כדבר יהוה אשר דבר ביד עבדו אחיהו הנביא:

Segment 19
HE:
ויתר דברי ירבעם אשר נלחם ואשר מלך הנם כתובים על ספר דברי הימים למלכי ישראל:

Segment 20
HE:
והימים אשר מלך ירבעם עשרים ושתים שנה וישכב עם אבתיו וימלך נדב בנו תחתיו: (פ)

Segment 21
HE:
ורחבעם בן שלמה מלך ביהודה בן ארבעים ואחת שנה רחבעם במלכו ושבע עשרה שנה מלך בירושלם העיר אשר בחר יהוה לשום את שמו שם מכל שבטי ישראל ושם אמו נעמה העמנית:

Segment 22
HE:
ויעש יהודה הרע בעיני יהוה ויקנאו אתו מכל אשר עשו אבתם בחטאתם אשר חטאו:

Segment 23
HE:
ויבנו גם המה להם במות ומצבות ואשרים על כל גבעה גבהה ותחת כל עץ רענן:

Segment 24
HE:
וגם קדש היה בארץ עשו ככל התועבת הגוים אשר הוריש יהוה מפני בני ישראל: (פ)

Segment 25
HE:
ויהי בשנה החמישית למלך רחבעם עלה (שושק) שישק מלך מצרים על ירושלם:

Segment 26
HE:
ויקח את אצרות בית יהוה ואת אוצרות בית המלך ואת הכל לקח ויקח את כל מגני הזהב אשר עשה שלמה:

Segment 27
HE:
ויעש המלך רחבעם תחתם מגני נחשת והפקיד על יד שרי הרצים השמרים פתח בית המלך:

Segment 28
HE:
ויהי מדי בא המלך בית יהוה ישאום הרצים והשיבום אל תא הרצים:

Segment 29
HE:
ויתר דברי רחבעם וכל אשר עשה הלא המה כתובים על ספר דברי הימים למלכי יהודה:

Segment 30
HE:
ומלחמה היתה בין רחבעם ובין ירבעם כל הימים:

Segment 31
HE:
וישכב רחבעם עם אבתיו ויקבר עם אבתיו בעיר דוד ושם אמו נעמה העמנית וימלך אבים בנו תחתיו: (פ)