Kings 1 Chapter 22
מלכים א פרק כב
Source: https://ajew.org/reader/tanach-melachim-a/1/22

Segment 1
HE:
וישבו שלש שנים אין מלחמה בין ארם ובין ישראל: (פ)

Segment 2
HE:
ויהי בשנה השלישית וירד יהושפט מלך יהודה אל מלך ישראל:

Segment 3
HE:
ויאמר מלך ישראל אל עבדיו הידעתם כי לנו רמת גלעד ואנחנו מחשים מקחת אתה מיד מלך ארם:

Segment 4
HE:
ויאמר אל יהושפט התלך אתי למלחמה רמת גלעד ויאמר יהושפט אל מלך ישראל כמוני כמוך כעמי כעמך כסוסי כסוסיך:

Segment 5
HE:
ויאמר יהושפט אל מלך ישראל דרש נא כיום את דבר יהוה:

Segment 6
HE:
ויקבץ מלך ישראל את הנביאים כארבע מאות איש ויאמר אלהם האלך על רמת גלעד למלחמה אם אחדל ויאמרו עלה ויתן אדני ביד המלך:

Segment 7
HE:
ויאמר יהושפט האין פה נביא ליהוה עוד ונדרשה מאותו:

Segment 8
HE:
ויאמר מלך ישראל אל יהושפט עוד איש אחד לדרש את יהוה מאתו ואני שנאתיו כי לא יתנבא עלי טוב כי אם רע מיכיהו בן ימלה ויאמר יהושפט אל יאמר המלך כן:

Segment 9
HE:
ויקרא מלך ישראל אל סריס אחד ויאמר מהרה מיכיהו בן ימלה:

Segment 10
HE:
ומלך ישראל ויהושפט מלך יהודה ישבים איש על כסאו מלבשים בגדים בגרן פתח שער שמרון וכל הנביאים מתנבאים לפניהם:

Segment 11
HE:
ויעש לו צדקיה בן כנענה קרני ברזל ויאמר כה אמר יהוה באלה תנגח את ארם עד כלתם:

Segment 12
HE:
וכל הנבאים נבאים כן לאמר עלה רמת גלעד והצלח ונתן יהוה ביד המלך:

Segment 13
HE:
והמלאך אשר הלך לקרא מיכיהו דבר אליו לאמר הנה נא דברי הנביאים פה אחד טוב אל המלך יהי נא (דבריך) דברך כדבר אחד מהם ודברת טוב:

Segment 14
HE:
ויאמר מיכיהו חי יהוה כי את אשר יאמר יהוה אלי אתו אדבר:

Segment 15
HE:
ויבוא אל המלך ויאמר המלך אליו מיכיהו הנלך אל רמת גלעד למלחמה אם נחדל ויאמר אליו עלה והצלח ונתן יהוה ביד המלך:

Segment 16
HE:
ויאמר אליו המלך עד כמה פעמים אני משבעך אשר לא תדבר אלי רק אמת בשם יהוה:

Segment 17
HE:
ויאמר ראיתי את כל ישראל נפצים אל ההרים כצאן אשר אין להם רעה ויאמר יהוה לא אדנים לאלה ישובו איש לביתו בשלום:

Segment 18
HE:
ויאמר מלך ישראל אל יהושפט הלוא אמרתי אליך לוא יתנבא עלי טוב כי אם רע:

Segment 19
HE:
ויאמר לכן שמע דבר יהוה ראיתי את יהוה ישב על כסאו וכל צבא השמים עמד עליו מימינו ומשמאלו:

Segment 20
HE:
ויאמר יהוה מי יפתה את אחאב ויעל ויפל ברמת גלעד ויאמר זה בכה וזה אמר בכה:

Segment 21
HE:
ויצא הרוח ויעמד לפני יהוה ויאמר אני אפתנו ויאמר יהוה אליו במה:

Segment 22
HE:
ויאמר אצא והייתי רוח שקר בפי כל נביאיו ויאמר תפתה וגם תוכל צא ועשה כן:

Segment 23
HE:
ועתה הנה נתן יהוה רוח שקר בפי כל נביאיך אלה ויהוה דבר עליך רעה:

Segment 24
HE:
ויגש צדקיהו בן כנענה ויכה את מיכיהו על הלחי ויאמר אי זה עבר רוח יהוה מאתי לדבר אותך:

Segment 25
HE:
ויאמר מיכיהו הנך ראה ביום ההוא אשר תבא חדר בחדר להחבה:

Segment 26
HE:
ויאמר מלך ישראל קח את מיכיהו והשיבהו אל אמן שר העיר ואל יואש בן המלך:

Segment 27
HE:
ואמרת כה אמר המלך שימו את זה בית הכלא והאכילהו לחם לחץ ומים לחץ עד באי בשלום:

Segment 28
HE:
ויאמר מיכיהו אם שוב תשוב בשלום לא דבר יהוה בי ויאמר שמעו עמים כלם:

Segment 29
HE:
ויעל מלך ישראל ויהושפט מלך יהודה רמת גלעד:

Segment 30
HE:
ויאמר מלך ישראל אל יהושפט התחפש ובא במלחמה ואתה לבש בגדיך ויתחפש מלך ישראל ויבוא במלחמה:

Segment 31
HE:
ומלך ארם צוה את שרי הרכב אשר לו שלשים ושנים לאמר לא תלחמו את קטן ואת גדול כי אם את מלך ישראל לבדו:

Segment 32
HE:
ויהי כראות שרי הרכב את יהושפט והמה אמרו אך מלך ישראל הוא ויסרו עליו להלחם ויזעק יהושפט:

Segment 33
HE:
ויהי כראות שרי הרכב כי לא מלך ישראל הוא וישובו מאחריו:

Segment 34
HE:
ואיש משך בקשת לתמו ויכה את מלך ישראל בין הדבקים ובין השרין ויאמר לרכבו הפך ידך והוציאני מן המחנה כי החליתי:

Segment 35
HE:
ותעלה המלחמה ביום ההוא והמלך היה מעמד במרכבה נכח ארם וימת בערב ויצק דם המכה אל חיק הרכב:

Segment 36
HE:
ויעבר הרנה במחנה כבא השמש לאמר איש אל עירו ואיש אל ארצו:

Segment 37
HE:
וימת המלך ויבוא שמרון ויקברו את המלך בשמרון:

Segment 38
HE:
וישטף את הרכב על ברכת שמרון וילקו הכלבים את דמו והזנות רחצו כדבר יהוה אשר דבר:

Segment 39
HE:
ויתר דברי אחאב וכל אשר עשה ובית השן אשר בנה וכל הערים אשר בנה הלוא הם כתובים על ספר דברי הימים למלכי ישראל:

Segment 40
HE:
וישכב אחאב עם אבתיו וימלך אחזיהו בנו תחתיו: (פ)

Segment 41
HE:
ויהושפט בן אסא מלך על יהודה בשנת ארבע לאחאב מלך ישראל:

Segment 42
HE:
יהושפט בן שלשים וחמש שנה במלכו ועשרים וחמש שנה מלך בירושלם ושם אמו עזובה בת שלחי:

Segment 43
HE:
וילך בכל דרך אסא אביו לא סר ממנו לעשות הישר בעיני יהוה:

Segment 44
HE:
אך הבמות לא סרו עוד העם מזבחים ומקטרים בבמות:

Segment 45
HE:
וישלם יהושפט עם מלך ישראל:

Segment 46
HE:
ויתר דברי יהושפט וגבורתו אשר עשה ואשר נלחם הלא הם כתובים על ספר דברי הימים למלכי יהודה:

Segment 47
HE:
ויתר הקדש אשר נשאר בימי אסא אביו בער מן הארץ:

Segment 48
HE:
ומלך אין באדום נצב מלך:

Segment 49
HE:
יהושפט (עשר) עשה אניות תרשיש ללכת אופירה לזהב ולא הלך כי (נשברה) נשברו אניות בעציון גבר:

Segment 50
HE:
אז אמר אחזיהו בן אחאב אל יהושפט ילכו עבדי עם עבדיך באניות ולא אבה יהושפט:

Segment 51
HE:
וישכב יהושפט עם אבתיו ויקבר עם אבתיו בעיר דוד אביו וימלך יהורם בנו תחתיו: (ס)

Segment 52
HE:
אחזיהו בן אחאב מלך על ישראל בשמרון בשנת שבע עשרה ליהושפט מלך יהודה וימלך על ישראל שנתים:

Segment 53
HE:
ויעש הרע בעיני יהוה וילך בדרך אביו ובדרך אמו ובדרך ירבעם בן נבט אשר החטיא את ישראל:

Segment 54
HE:
ויעבד את הבעל וישתחוה לו ויכעס את יהוה אלהי ישראל ככל אשר עשה אביו: (פפפ)