Kings 1 Chapter 9
מלכים א פרק ט
Source: https://ajew.org/reader/tanach-melachim-a/1/9

Segment 1
HE:
ויהי ככלות שלמה לבנות את בית יהוה ואת בית המלך ואת כל חשק שלמה אשר חפץ לעשות: (פ)

Segment 2
HE:
וירא יהוה אל שלמה שנית כאשר נראה אליו בגבעון:

Segment 3
HE:
ויאמר יהוה אליו שמעתי את תפלתך ואת תחנתך אשר התחננתה לפני הקדשתי את הבית הזה אשר בנתה לשום שמי שם עד עולם והיו עיני ולבי שם כל הימים:

Segment 4
HE:
ואתה אם תלך לפני כאשר הלך דוד אביך בתם לבב ובישר לעשות ככל אשר צויתיך חקי ומשפטי תשמר:

Segment 5
HE:
והקמתי את כסא ממלכתך על ישראל לעלם כאשר דברתי על דוד אביך לאמר לא יכרת לך איש מעל כסא ישראל:

Segment 6
HE:
אם שוב תשבון אתם ובניכם מאחרי ולא תשמרו מצותי חקתי אשר נתתי לפניכם והלכתם ועבדתם אלהים אחרים והשתחויתם להם:

Segment 7
HE:
והכרתי את ישראל מעל פני האדמה אשר נתתי להם ואת הבית אשר הקדשתי לשמי אשלח מעל פני והיה ישראל למשל ולשנינה בכל העמים:

Segment 8
HE:
והבית הזה יהיה עליון כל עבר עליו ישם ושרק ואמרו על מה עשה יהוה ככה לארץ הזאת ולבית הזה:

Segment 9
HE:
ואמרו על אשר עזבו את יהוה אלהיהם אשר הוציא את אבתם מארץ מצרים ויחזקו באלהים אחרים (וישתחו) וישתחוו להם ויעבדם על כן הביא יהוה עליהם את כל הרעה הזאת: (פ)

Segment 10
HE:
ויהי מקצה עשרים שנה אשר בנה שלמה את שני הבתים את בית יהוה ואת בית המלך:

Segment 11
HE:
חירם מלך צר נשא את שלמה בעצי ארזים ובעצי ברושים ובזהב לכל חפצו אז יתן המלך שלמה לחירם עשרים עיר בארץ הגליל:

Segment 12
HE:
ויצא חירם מצר לראות את הערים אשר נתן לו שלמה ולא ישרו בעיניו:

Segment 13
HE:
ויאמר מה הערים האלה אשר נתתה לי אחי ויקרא להם ארץ כבול עד היום הזה: (פ)

Segment 14
HE:
וישלח חירם למלך מאה ועשרים ככר זהב:

Segment 15
HE:
וזה דבר המס אשר העלה המלך שלמה לבנות את בית יהוה ואת ביתו ואת המלוא ואת חומת ירושלם ואת חצר ואת מגדו ואת גזר:

Segment 16
HE:
פרעה מלך מצרים עלה וילכד את גזר וישרפה באש ואת הכנעני הישב בעיר הרג ויתנה שלחים לבתו אשת שלמה:

Segment 17
HE:
ויבן שלמה את גזר ואת בית חרן תחתון:

Segment 18
HE:
ואת בעלת ואת (תמר) תדמר במדבר בארץ:

Segment 19
HE:
ואת כל ערי המסכנות אשר היו לשלמה ואת ערי הרכב ואת ערי הפרשים ואת חשק שלמה אשר חשק לבנות בירושלם ובלבנון ובכל ארץ ממשלתו:

Segment 20
HE:
כל העם הנותר מן האמרי החתי הפרזי החוי והיבוסי אשר לא מבני ישראל המה:

Segment 21
HE:
בניהם אשר נתרו אחריהם בארץ אשר לא יכלו בני ישראל להחרימם ויעלם שלמה למס עבד עד היום הזה:

Segment 22
HE:
ומבני ישראל לא נתן שלמה עבד כי הם אנשי המלחמה ועבדיו ושריו ושלשיו ושרי רכבו ופרשיו: (ס)

Segment 23
HE:
אלה שרי הנצבים אשר על המלאכה לשלמה חמשים וחמש מאות הרדים בעם העשים במלאכה:

Segment 24
HE:
אך בת פרעה עלתה מעיר דוד אל ביתה אשר בנה לה אז בנה את המלוא:

Segment 25
HE:
והעלה שלמה שלש פעמים בשנה עלות ושלמים על המזבח אשר בנה ליהוה והקטיר אתו אשר לפני יהוה ושלם את הבית:

Segment 26
HE:
ואני עשה המלך שלמה בעציון גבר אשר את אלות על שפת ים סוף בארץ אדום:

Segment 27
HE:
וישלח חירם באני את עבדיו אנשי אניות ידעי הים עם עבדי שלמה:

Segment 28
HE:
ויבאו אופירה ויקחו משם זהב ארבע מאות ועשרים ככר ויבאו אל המלך שלמה: (פ)