Kings 2 Chapter 13
מלכים ב פרק יג
Source: https://ajew.org/reader/tanach-melachim-b/1/13

Segment 1
HE:
בשנת עשרים ושלש שנה ליואש בן אחזיהו מלך יהודה מלך יהואחז בן יהוא על ישראל בשמרון שבע עשרה שנה:

Segment 2
HE:
ויעש הרע בעיני יהוה וילך אחר חטאת ירבעם בן נבט אשר החטיא את ישראל לא סר ממנה:

Segment 3
HE:
ויחר אף יהוה בישראל ויתנם ביד חזאל מלך ארם וביד בן הדד בן חזאל כל הימים:

Segment 4
HE:
ויחל יהואחז את פני יהוה וישמע אליו יהוה כי ראה את לחץ ישראל כי לחץ אתם מלך ארם:

Segment 5
HE:
ויתן יהוה לישראל מושיע ויצאו מתחת יד ארם וישבו בני ישראל באהליהם כתמול שלשום:

Segment 6
HE:
אך לא סרו מחטאות בית ירבעם אשר (החטי) החטיא את ישראל בה הלך וגם האשרה עמדה בשמרון:

Segment 7
HE:
כי לא השאיר ליהואחז עם כי אם חמשים פרשים ועשרה רכב ועשרת אלפים רגלי כי אבדם מלך ארם וישמם כעפר לדש:

Segment 8
HE:
ויתר דברי יהואחז וכל אשר עשה וגבורתו הלוא הם כתובים על ספר דברי הימים למלכי ישראל:

Segment 9
HE:
וישכב יהואחז עם אבתיו ויקברהו בשמרון וימלך יואש בנו תחתיו: (פ)

Segment 10
HE:
בשנת שלשים ושבע שנה ליואש מלך יהודה מלך יהואש בן יהואחז על ישראל בשמרון שש עשרה שנה:

Segment 11
HE:
ויעשה הרע בעיני יהוה לא סר מכל חטאות ירבעם בן נבט אשר החטיא את ישראל בה הלך:

Segment 12
HE:
ויתר דברי יואש וכל אשר עשה וגבורתו אשר נלחם עם אמציה מלך יהודה הלוא הם כתובים על ספר דברי הימים למלכי ישראל:

Segment 13
HE:
וישכב יואש עם אבתיו וירבעם ישב על כסאו ויקבר יואש בשמרון עם מלכי ישראל: (פ)

Segment 14
HE:
ואלישע חלה את חליו אשר ימות בו וירד אליו יואש מלך ישראל ויבך על פניו ויאמר אבי אבי רכב ישראל ופרשיו:

Segment 15
HE:
ויאמר לו אלישע קח קשת וחצים ויקח אליו קשת וחצים:

Segment 16
HE:
ויאמר למלך ישראל הרכב ידך על הקשת וירכב ידו וישם אלישע ידיו על ידי המלך:

Segment 17
HE:
ויאמר פתח החלון קדמה ויפתח ויאמר אלישע ירה ויור ויאמר חץ תשועה ליהוה וחץ תשועה בארם והכית את ארם באפק עד כלה:

Segment 18
HE:
ויאמר קח החצים ויקח ויאמר למלך ישראל הך ארצה ויך שלש פעמים ויעמד:

Segment 19
HE:
ויקצף עליו איש האלהים ויאמר להכות חמש או שש פעמים אז הכית את ארם עד כלה ועתה שלש פעמים תכה את ארם: (ס)

Segment 20
HE:
וימת אלישע ויקברהו וגדודי מואב יבאו בארץ בא שנה:

Segment 21
HE:
ויהי הם קברים איש והנה ראו את הגדוד וישליכו את האיש בקבר אלישע וילך ויגע האיש בעצמות אלישע ויחי ויקם על רגליו: (פ)

Segment 22
HE:
וחזאל מלך ארם לחץ את ישראל כל ימי יהואחז:

Segment 23
HE:
ויחן יהוה אתם וירחמם ויפן אליהם למען בריתו את אברהם יצחק ויעקב ולא אבה השחיתם ולא השליכם מעל פניו עד עתה:

Segment 24
HE:
וימת חזאל מלך ארם וימלך בן הדד בנו תחתיו:

Segment 25
HE:
וישב יהואש בן יהואחז ויקח את הערים מיד בן הדד בן חזאל אשר לקח מיד יהואחז אביו במלחמה שלש פעמים הכהו יואש וישב את ערי ישראל: (פ)