Kings 2 Chapter 14
מלכים ב פרק יד
Source: https://ajew.org/reader/tanach-melachim-b/1/14

Segment 1
HE:
בשנת שתים ליואש בן יואחז מלך ישראל מלך אמציהו בן יואש מלך יהודה:

Segment 2
HE:
בן עשרים וחמש שנה היה במלכו ועשרים ותשע שנה מלך בירושלם ושם אמו (יהועדין) יהועדן מן ירושלם:

Segment 3
HE:
ויעש הישר בעיני יהוה רק לא כדוד אביו ככל אשר עשה יואש אביו עשה:

Segment 4
HE:
רק הבמות לא סרו עוד העם מזבחים ומקטרים בבמות:

Segment 5
HE:
ויהי כאשר חזקה הממלכה בידו ויך את עבדיו המכים את המלך אביו:

Segment 6
HE:
ואת בני המכים לא המית ככתוב בספר תורת משה אשר צוה יהוה לאמר לא יומתו אבות על בנים ובנים לא יומתו על אבות כי אם איש בחטאו (ימות) יומת:

Segment 7
HE:
הוא הכה את אדום בגיא (המלח) מלח עשרת אלפים ותפש את הסלע במלחמה ויקרא את שמה יקתאל עד היום הזה: (פ)

Segment 8
HE:
אז שלח אמציה מלאכים אל יהואש בן יהואחז בן יהוא מלך ישראל לאמר לכה נתראה פנים:

Segment 9
HE:
וישלח יהואש מלך ישראל אל אמציהו מלך יהודה לאמר החוח אשר בלבנון שלח אל הארז אשר בלבנון לאמר תנה את בתך לבני לאשה ותעבר חית השדה אשר בלבנון ותרמס את החוח:

Segment 10
HE:
הכה הכית את אדום ונשאך לבך הכבד ושב בביתך ולמה תתגרה ברעה ונפלתה אתה ויהודה עמך:

Segment 11
HE:
ולא שמע אמציהו ויעל יהואש מלך ישראל ויתראו פנים הוא ואמציהו מלך יהודה בבית שמש אשר ליהודה:

Segment 12
HE:
וינגף יהודה לפני ישראל וינסו איש (לאהלו) לאהליו:

Segment 13
HE:
ואת אמציהו מלך יהודה בן יהואש בן אחזיהו תפש יהואש מלך ישראל בבית שמש (ויבאו) ויבא ירושלם ויפרץ בחומת ירושלם בשער אפרים עד שער הפנה ארבע מאות אמה:

Segment 14
HE:
ולקח את כל הזהב והכסף ואת כל הכלים הנמצאים בית יהוה ובאצרות בית המלך ואת בני התערבות וישב שמרונה:

Segment 15
HE:
ויתר דברי יהואש אשר עשה וגבורתו ואשר נלחם עם אמציהו מלך יהודה הלא הם כתובים על ספר דברי הימים למלכי ישראל:

Segment 16
HE:
וישכב יהואש עם אבתיו ויקבר בשמרון עם מלכי ישראל וימלך ירבעם בנו תחתיו: (פ)

Segment 17
HE:
ויחי אמציהו בן יואש מלך יהודה אחרי מות יהואש בן יהואחז מלך ישראל חמש עשרה שנה:

Segment 18
HE:
ויתר דברי אמציהו הלא הם כתובים על ספר דברי הימים למלכי יהודה:

Segment 19
HE:
ויקשרו עליו קשר בירושלם וינס לכישה וישלחו אחריו לכישה וימתהו שם:

Segment 20
HE:
וישאו אתו על הסוסים ויקבר בירושלם עם אבתיו בעיר דוד:

Segment 21
HE:
ויקחו כל עם יהודה את עזריה והוא בן שש עשרה שנה וימלכו אתו תחת אביו אמציהו:

Segment 22
HE:
הוא בנה את אילת וישבה ליהודה אחרי שכב המלך עם אבתיו: (פ)

Segment 23
HE:
בשנת חמש עשרה שנה לאמציהו בן יואש מלך יהודה מלך ירבעם בן יואש מלך ישראל בשמרון ארבעים ואחת שנה:

Segment 24
HE:
ויעש הרע בעיני יהוה לא סר מכל חטאות ירבעם בן נבט אשר החטיא את ישראל:

Segment 25
HE:
הוא השיב את גבול ישראל מלבוא חמת עד ים הערבה כדבר יהוה אלהי ישראל אשר דבר ביד עבדו יונה בן אמתי הנביא אשר מגת החפר:

Segment 26
HE:
כי ראה יהוה את עני ישראל מרה מאד ואפס עצור ואפס עזוב ואין עזר לישראל:

Segment 27
HE:
ולא דבר יהוה למחות את שם ישראל מתחת השמים ויושיעם ביד ירבעם בן יואש:

Segment 28
HE:
ויתר דברי ירבעם וכל אשר עשה וגבורתו אשר נלחם ואשר השיב את דמשק ואת חמת ליהודה בישראל הלא הם כתובים על ספר דברי הימים למלכי ישראל:

Segment 29
HE:
וישכב ירבעם עם אבתיו עם מלכי ישראל וימלך זכריה בנו תחתיו: (פ)