Kings 2 Chapter 17
מלכים ב פרק יז
Source: https://ajew.org/reader/tanach-melachim-b/1/17

Segment 1
HE:
בשנת שתים עשרה לאחז מלך יהודה מלך הושע בן אלה בשמרון על ישראל תשע שנים:

Segment 2
HE:
ויעש הרע בעיני יהוה רק לא כמלכי ישראל אשר היו לפניו:

Segment 3
HE:
עליו עלה שלמנאסר מלך אשור ויהי לו הושע עבד וישב לו מנחה:

Segment 4
HE:
וימצא מלך אשור בהושע קשר אשר שלח מלאכים אל סוא מלך מצרים ולא העלה מנחה למלך אשור כשנה בשנה ויעצרהו מלך אשור ויאסרהו בית כלא:

Segment 5
HE:
ויעל מלך אשור בכל הארץ ויעל שמרון ויצר עליה שלש שנים:

Segment 6
HE:
בשנת התשיעית להושע לכד מלך אשור את שמרון ויגל את ישראל אשורה וישב אתם בחלח ובחבור נהר גוזן וערי מדי: (פ)

Segment 7
HE:
ויהי כי חטאו בני ישראל ליהוה אלהיהם המעלה אתם מארץ מצרים מתחת יד פרעה מלך מצרים וייראו אלהים אחרים:

Segment 8
HE:
וילכו בחקות הגוים אשר הוריש יהוה מפני בני ישראל ומלכי ישראל אשר עשו:

Segment 9
HE:
ויחפאו בני ישראל דברים אשר לא כן על יהוה אלהיהם ויבנו להם במות בכל עריהם ממגדל נוצרים עד עיר מבצר:

Segment 10
HE:
ויצבו להם מצבות ואשרים על כל גבעה גבהה ותחת כל עץ רענן:

Segment 11
HE:
ויקטרו שם בכל במות כגוים אשר הגלה יהוה מפניהם ויעשו דברים רעים להכעיס את יהוה:

Segment 12
HE:
ויעבדו הגללים אשר אמר יהוה להם לא תעשו את הדבר הזה:

Segment 13
HE:
ויעד יהוה בישראל וביהודה ביד כל (נביאו) נביאי כל חזה לאמר שבו מדרכיכם הרעים ושמרו מצותי חקותי ככל התורה אשר צויתי את אבתיכם ואשר שלחתי אליכם ביד עבדי הנביאים:

Segment 14
HE:
ולא שמעו ויקשו את ערפם כערף אבותם אשר לא האמינו ביהוה אלהיהם:

Segment 15
HE:
וימאסו את חקיו ואת בריתו אשר כרת את אבותם ואת עדותיו אשר העיד בם וילכו אחרי ההבל ויהבלו ואחרי הגוים אשר סביבתם אשר צוה יהוה אתם לבלתי עשות כהם:

Segment 16
HE:
ויעזבו את כל מצות יהוה אלהיהם ויעשו להם מסכה (שנים) שני עגלים ויעשו אשירה וישתחוו לכל צבא השמים ויעבדו את הבעל:

Segment 17
HE:
ויעבירו את בניהם ואת בנותיהם באש ויקסמו קסמים וינחשו ויתמכרו לעשות הרע בעיני יהוה להכעיסו:

Segment 18
HE:
ויתאנף יהוה מאד בישראל ויסרם מעל פניו לא נשאר רק שבט יהודה לבדו:

Segment 19
HE:
גם יהודה לא שמר את מצות יהוה אלהיהם וילכו בחקות ישראל אשר עשו:

Segment 20
HE:
וימאס יהוה בכל זרע ישראל ויענם ויתנם ביד שסים עד אשר השליכם מפניו:

Segment 21
HE:
כי קרע ישראל מעל בית דוד וימליכו את ירבעם בן נבט (וידא) וידח ירבעם את ישראל מאחרי יהוה והחטיאם חטאה גדולה:

Segment 22
HE:
וילכו בני ישראל בכל חטאות ירבעם אשר עשה לא סרו ממנה:

Segment 23
HE:
עד אשר הסיר יהוה את ישראל מעל פניו כאשר דבר ביד כל עבדיו הנביאים ויגל ישראל מעל אדמתו אשורה עד היום הזה: (פ)

Segment 24
HE:
ויבא מלך אשור מבבל ומכותה ומעוא ומחמת וספרוים וישב בערי שמרון תחת בני ישראל וירשו את שמרון וישבו בעריה:

Segment 25
HE:
ויהי בתחלת שבתם שם לא יראו את יהוה וישלח יהוה בהם את האריות ויהיו הרגים בהם:

Segment 26
HE:
ויאמרו למלך אשור לאמר הגוים אשר הגלית ותושב בערי שמרון לא ידעו את משפט אלהי הארץ וישלח בם את האריות והנם ממיתים אותם כאשר אינם ידעים את משפט אלהי הארץ:

Segment 27
HE:
ויצו מלך אשור לאמר הליכו שמה אחד מהכהנים אשר הגליתם משם וילכו וישבו שם וירם את משפט אלהי הארץ:

Segment 28
HE:
ויבא אחד מהכהנים אשר הגלו משמרון וישב בבית אל ויהי מורה אתם איך ייראו את יהוה:

Segment 29
HE:
ויהיו עשים גוי גוי אלהיו ויניחו בבית הבמות אשר עשו השמרנים גוי גוי בעריהם אשר הם ישבים שם:

Segment 30
HE:
ואנשי בבל עשו את סכות בנות ואנשי כות עשו את נרגל ואנשי חמת עשו את אשימא:

Segment 31
HE:
והעוים עשו נבחז ואת תרתק והספרוים שרפים את בניהם באש לאדרמלך וענמלך (אלה) אלהי (ספרים) ספרוים:

Segment 32
HE:
ויהיו יראים את יהוה ויעשו להם מקצותם כהני במות ויהיו עשים להם בבית הבמות:

Segment 33
HE:
את יהוה היו יראים ואת אלהיהם היו עבדים כמשפט הגוים אשר הגלו אתם משם:

Segment 34
HE:
עד היום הזה הם עשים כמשפטים הראשנים אינם יראים את יהוה ואינם עשים כחקתם וכמשפטם וכתורה וכמצוה אשר צוה יהוה את בני יעקב אשר שם שמו ישראל:

Segment 35
HE:
ויכרת יהוה אתם ברית ויצום לאמר לא תיראו אלהים אחרים ולא תשתחוו להם ולא תעבדום ולא תזבחו להם:

Segment 36
HE:
כי אם את יהוה אשר העלה אתכם מארץ מצרים בכח גדול ובזרוע נטויה אתו תיראו ולו תשתחוו ולו תזבחו:

Segment 37
HE:
ואת החקים ואת המשפטים והתורה והמצוה אשר כתב לכם תשמרון לעשות כל הימים ולא תיראו אלהים אחרים:

Segment 38
HE:
והברית אשר כרתי אתכם לא תשכחו ולא תיראו אלהים אחרים:

Segment 39
HE:
כי אם את יהוה אלהיכם תיראו והוא יציל אתכם מיד כל איביכם:

Segment 40
HE:
ולא שמעו כי אם כמשפטם הראשון הם עשים:

Segment 41
HE:
ויהיו הגוים האלה יראים את יהוה ואת פסיליהם היו עבדים גם בניהם ובני בניהם כאשר עשו אבתם הם עשים עד היום הזה: (פ)