Kings 2 Chapter 20
מלכים ב פרק כ
Source: https://ajew.org/reader/tanach-melachim-b/1/20

Segment 1
HE:
בימים ההם חלה חזקיהו למות ויבא אליו ישעיהו בן אמוץ הנביא ויאמר אליו כה אמר יהוה צו לביתך כי מת אתה ולא תחיה:

Segment 2
HE:
ויסב את פניו אל הקיר ויתפלל אל יהוה לאמר:

Segment 3
HE:
אנה יהוה זכר נא את אשר התהלכתי לפניך באמת ובלבב שלם והטוב בעיניך עשיתי ויבך חזקיהו בכי גדול: (ס)

Segment 4
HE:
ויהי ישעיהו לא יצא (העיר) חצר התיכנה ודבר יהוה היה אליו לאמר:

Segment 5
HE:
שוב ואמרת אל חזקיהו נגיד עמי כה אמר יהוה אלהי דוד אביך שמעתי את תפלתך ראיתי את דמעתך הנני רפא לך ביום השלישי תעלה בית יהוה:

Segment 6
HE:
והספתי על ימיך חמש עשרה שנה ומכף מלך אשור אצילך ואת העיר הזאת וגנותי על העיר הזאת למעני ולמען דוד עבדי:

Segment 7
HE:
ויאמר ישעיהו קחו דבלת תאנים ויקחו וישימו על השחין ויחי:

Segment 8
HE:
ויאמר חזקיהו אל ישעיהו מה אות כי ירפא יהוה לי ועליתי ביום השלישי בית יהוה:

Segment 9
HE:
ויאמר ישעיהו זה לך האות מאת יהוה כי יעשה יהוה את הדבר אשר דבר הלך הצל עשר מעלות אם ישוב עשר מעלות:

Segment 10
HE:
ויאמר יחזקיהו נקל לצל לנטות עשר מעלות לא כי ישוב הצל אחרנית עשר מעלות:

Segment 11
HE:
ויקרא ישעיהו הנביא אל יהוה וישב את הצל במעלות אשר ירדה במעלות אחז אחרנית עשר מעלות: (פ)

Segment 12
HE:
בעת ההיא שלח בראדך בלאדן בן בלאדן מלך בבל ספרים ומנחה אל חזקיהו כי שמע כי חלה חזקיהו:

Segment 13
HE:
וישמע עליהם חזקיהו ויראם את כל בית נכתה את הכסף ואת הזהב ואת הבשמים ואת שמן הטוב ואת בית כליו ואת כל אשר נמצא באוצרתיו לא היה דבר אשר לא הראם חזקיהו בביתו ובכל ממשלתו:

Segment 14
HE:
ויבא ישעיהו הנביא אל המלך חזקיהו ויאמר אליו מה אמרו האנשים האלה ומאין יבאו אליך ויאמר חזקיהו מארץ רחוקה באו מבבל:

Segment 15
HE:
ויאמר מה ראו בביתך ויאמר חזקיהו את כל אשר בביתי ראו לא היה דבר אשר לא הראיתם באצרתי:

Segment 16
HE:
ויאמר ישעיהו אל חזקיהו שמע דבר יהוה:

Segment 17
HE:
הנה ימים באים ונשא כל אשר בביתך ואשר אצרו אבתיך עד היום הזה בבלה לא יותר דבר אמר יהוה:

Segment 18
HE:
ומבניך אשר יצאו ממך אשר תוליד (יקח) יקחו והיו סריסים בהיכל מלך בבל:

Segment 19
HE:
ויאמר חזקיהו אל ישעיהו טוב דבר יהוה אשר דברת ויאמר הלוא אם שלום ואמת יהיה בימי:

Segment 20
HE:
ויתר דברי חזקיהו וכל גבורתו ואשר עשה את הברכה ואת התעלה ויבא את המים העירה הלא הם כתובים על ספר דברי הימים למלכי יהודה:

Segment 21
HE:
וישכב חזקיהו עם אבתיו וימלך מנשה בנו תחתיו: (פ)