Kings 2 Chapter 22
מלכים ב פרק כב
Source: https://ajew.org/reader/tanach-melachim-b/1/22

Segment 1
HE:
בן שמנה שנה יאשיהו במלכו ושלשים ואחת שנה מלך בירושלם ושם אמו ידידה בת עדיה מבצקת:

Segment 2
HE:
ויעש הישר בעיני יהוה וילך בכל דרך דוד אביו ולא סר ימין ושמאול: (פ)

Segment 3
HE:
ויהי בשמנה עשרה שנה למלך יאשיהו שלח המלך את שפן בן אצליהו בן משלם הספר בית יהוה לאמר:

Segment 4
HE:
עלה אל חלקיהו הכהן הגדול ויתם את הכסף המובא בית יהוה אשר אספו שמרי הסף מאת העם:

Segment 5
HE:
(ויתנה) ויתנהו על יד עשי המלאכה המפקדים (בבית) בית יהוה ויתנו אתו לעשי המלאכה אשר בבית יהוה לחזק בדק הבית:

Segment 6
HE:
לחרשים ולבנים ולגדרים ולקנות עצים ואבני מחצב לחזק את הבית:

Segment 7
HE:
אך לא יחשב אתם הכסף הנתן על ידם כי באמונה הם עשים:

Segment 8
HE:
ויאמר חלקיהו הכהן הגדול על שפן הספר ספר התורה מצאתי בבית יהוה ויתן חלקיה את הספר אל שפן ויקראהו:

Segment 9
HE:
ויבא שפן הספר אל המלך וישב את המלך דבר ויאמר התיכו עבדיך את הכסף הנמצא בבית ויתנהו על יד עשי המלאכה המפקדים בית יהוה:

Segment 10
HE:
ויגד שפן הספר למלך לאמר ספר נתן לי חלקיה הכהן ויקראהו שפן לפני המלך:

Segment 11
HE:
ויהי כשמע המלך את דברי ספר התורה ויקרע את בגדיו:

Segment 12
HE:
ויצו המלך את חלקיה הכהן ואת אחיקם בן שפן ואת עכבור בן מיכיה ואת שפן הספר ואת עשיה עבד המלך לאמר:

Segment 13
HE:
לכו דרשו את יהוה בעדי ובעד העם ובעד כל יהודה על דברי הספר הנמצא הזה כי גדולה חמת יהוה אשר היא נצתה בנו על אשר לא שמעו אבתינו על דברי הספר הזה לעשות ככל הכתוב עלינו:

Segment 14
HE:
וילך חלקיהו הכהן ואחיקם ועכבור ושפן ועשיה אל חלדה הנביאה אשת שלם בן תקוה בן חרחס שמר הבגדים והיא ישבת בירושלם במשנה וידברו אליה:

Segment 15
HE:
ותאמר אליהם כה אמר יהוה אלהי ישראל אמרו לאיש אשר שלח אתכם אלי:

Segment 16
HE:
כה אמר יהוה הנני מביא רעה אל המקום הזה ועל ישביו את כל דברי הספר אשר קרא מלך יהודה:

Segment 17
HE:
תחת אשר עזבוני ויקטרו לאלהים אחרים למען הכעיסני בכל מעשה ידיהם ונצתה חמתי במקום הזה ולא תכבה:

Segment 18
HE:
ואל מלך יהודה השלח אתכם לדרש את יהוה כה תאמרו אליו כה אמר יהוה אלהי ישראל הדברים אשר שמעת:

Segment 19
HE:
יען רך לבבך ותכנע מפני יהוה בשמעך אשר דברתי על המקום הזה ועל ישביו להיות לשמה ולקללה ותקרע את בגדיך ותבכה לפני וגם אנכי שמעתי נאם יהוה:

Segment 20
HE:
לכן הנני אספך על אבתיך ונאספת אל קברתיך בשלום ולא תראינה עיניך בכל הרעה אשר אני מביא על המקום הזה וישיבו את המלך דבר: