Kings 2 Chapter 24
מלכים ב פרק כד
Source: https://ajew.org/reader/tanach-melachim-b/1/24

Segment 1
HE:
בימיו עלה נבכדנאצר מלך בבל ויהי לו יהויקים עבד שלש שנים וישב וימרד בו:

Segment 2
HE:
וישלח יהוה בו את גדודי כשדים ואת גדודי ארם ואת גדודי מואב ואת גדודי בני עמון וישלחם ביהודה להאבידו כדבר יהוה אשר דבר ביד עבדיו הנביאים:

Segment 3
HE:
אך על פי יהוה היתה ביהודה להסיר מעל פניו בחטאת מנשה ככל אשר עשה:

Segment 4
HE:
וגם דם הנקי אשר שפך וימלא את ירושלם דם נקי ולא אבה יהוה לסלח:

Segment 5
HE:
ויתר דברי יהויקים וכל אשר עשה הלא הם כתובים על ספר דברי הימים למלכי יהודה:

Segment 6
HE:
וישכב יהויקים עם אבתיו וימלך יהויכין בנו תחתיו:

Segment 7
HE:
ולא הסיף עוד מלך מצרים לצאת מארצו כי לקח מלך בבל מנחל מצרים עד נהר פרת כל אשר היתה למלך מצרים: (פ)

Segment 8
HE:
בן שמנה עשרה שנה יהויכין במלכו ושלשה חדשים מלך בירושלם ושם אמו נחשתא בת אלנתן מירושלם:

Segment 9
HE:
ויעש הרע בעיני יהוה ככל אשר עשה אביו:

Segment 10
HE:
בעת ההיא (עלה) עלו עבדי נבכדנאצר מלך בבל ירושלם ותבא העיר במצור:

Segment 11
HE:
ויבא נבוכדנאצר מלך בבל על העיר ועבדיו צרים עליה:

Segment 12
HE:
ויצא יהויכין מלך יהודה על מלך בבל הוא ואמו ועבדיו ושריו וסריסיו ויקח אתו מלך בבל בשנת שמנה למלכו:

Segment 13
HE:
ויוצא משם את כל אוצרות בית יהוה ואוצרות בית המלך ויקצץ את כל כלי הזהב אשר עשה שלמה מלך ישראל בהיכל יהוה כאשר דבר יהוה:

Segment 14
HE:
והגלה את כל ירושלם ואת כל השרים ואת כל גבורי החיל (עשרה) עשרת אלפים גולה וכל החרש והמסגר לא נשאר זולת דלת עם הארץ:

Segment 15
HE:
ויגל את יהויכין בבלה ואת אם המלך ואת נשי המלך ואת סריסיו ואת (אולי) אילי הארץ הוליך גולה מירושלם בבלה:

Segment 16
HE:
ואת כל אנשי החיל שבעת אלפים והחרש והמסגר אלף הכל גבורים עשי מלחמה ויביאם מלך בבל גולה בבלה:

Segment 17
HE:
וימלך מלך בבל את מתניה דדו תחתיו ויסב את שמו צדקיהו: (פ)

Segment 18
HE:
בן עשרים ואחת שנה צדקיהו במלכו ואחת עשרה שנה מלך בירושלם ושם אמו (חמיטל) חמוטל בת ירמיהו מלבנה:

Segment 19
HE:
ויעש הרע בעיני יהוה ככל אשר עשה יהויקים:

Segment 20
HE:
כי על אף יהוה היתה בירושלם וביהודה עד השלכו אתם מעל פניו וימרד צדקיהו במלך בבל: (ס)