Kings 2 Chapter 25
מלכים ב פרק כה
Source: https://ajew.org/reader/tanach-melachim-b/1/25

Segment 1
HE:
ויהי בשנת התשיעית למלכו בחדש העשירי בעשור לחדש בא נבכדנאצר מלך בבל הוא וכל חילו על ירושלם ויחן עליה ויבנו עליה דיק סביב:

Segment 2
HE:
ותבא העיר במצור עד עשתי עשרה שנה למלך צדקיהו:

Segment 3
HE:
בתשעה לחדש ויחזק הרעב בעיר ולא היה לחם לעם הארץ:

Segment 4
HE:
ותבקע העיר וכל אנשי המלחמה הלילה דרך שער בין החמתים אשר על גן המלך וכשדים על העיר סביב וילך דרך הערבה:

Segment 5
HE:
וירדפו חיל כשדים אחר המלך וישגו אתו בערבות ירחו וכל חילו נפצו מעליו:

Segment 6
HE:
ויתפשו את המלך ויעלו אתו אל מלך בבל רבלתה וידברו אתו משפט:

Segment 7
HE:
ואת בני צדקיהו שחטו לעיניו ואת עיני צדקיהו עור ויאסרהו בנחשתים ויבאהו בבל: (ס)

Segment 8
HE:
ובחדש החמישי בשבעה לחדש היא שנת תשע עשרה שנה למלך נבכדנאצר מלך בבל בא נבוזראדן רב טבחים עבד מלך בבל ירושלם:

Segment 9
HE:
וישרף את בית יהוה ואת בית המלך ואת כל בתי ירושלם ואת כל בית גדול שרף באש:

Segment 10
HE:
ואת חומת ירושלם סביב נתצו כל חיל כשדים אשר רב טבחים:

Segment 11
HE:
ואת יתר העם הנשארים בעיר ואת הנפלים אשר נפלו על המלך בבל ואת יתר ההמון הגלה נבוזראדן רב טבחים:

Segment 12
HE:
ומדלת הארץ השאיר רב טבחים לכרמים וליגבים:

Segment 13
HE:
ואת עמודי הנחשת אשר בית יהוה ואת המכנות ואת ים הנחשת אשר בבית יהוה שברו כשדים וישאו את נחשתם בבלה:

Segment 14
HE:
ואת הסירת ואת היעים ואת המזמרות ואת הכפות ואת כל כלי הנחשת אשר ישרתו בם לקחו:

Segment 15
HE:
ואת המחתות ואת המזרקות אשר זהב זהב ואשר כסף כסף לקח רב טבחים:

Segment 16
HE:
העמודים שנים הים האחד והמכנות אשר עשה שלמה לבית יהוה לא היה משקל לנחשת כל הכלים האלה:

Segment 17
HE:
שמנה עשרה אמה קומת העמוד האחד וכתרת עליו נחשת וקומת הכתרת שלש (אמה) אמות ושבכה ורמנים על הכתרת סביב הכל נחשת וכאלה לעמוד השני על השבכה:

Segment 18
HE:
ויקח רב טבחים את שריה כהן הראש ואת צפניהו כהן משנה ואת שלשת שמרי הסף:

Segment 19
HE:
ומן העיר לקח סריס אחד אשר הוא פקיד על אנשי המלחמה וחמשה אנשים מראי פני המלך אשר נמצאו בעיר ואת הספר שר הצבא המצבא את עם הארץ וששים איש מעם הארץ הנמצאים בעיר:

Segment 20
HE:
ויקח אתם נבוזראדן רב טבחים וילך אתם על מלך בבל רבלתה:

Segment 21
HE:
ויך אתם מלך בבל וימיתם ברבלה בארץ חמת ויגל יהודה מעל אדמתו:

Segment 22
HE:
והעם הנשאר בארץ יהודה אשר השאיר נבוכדנאצר מלך בבל ויפקד עליהם את גדליהו בן אחיקם בן שפן: (פ)

Segment 23
HE:
וישמעו כל שרי החילים המה והאנשים כי הפקיד מלך בבל את גדליהו ויבאו אל גדליהו המצפה וישמעאל בן נתניה ויוחנן בן קרח ושריה בן תנחמת הנטפתי ויאזניהו בן המעכתי המה ואנשיהם:

Segment 24
HE:
וישבע להם גדליהו ולאנשיהם ויאמר להם אל תיראו מעבדי הכשדים שבו בארץ ועבדו את מלך בבל ויטב לכם: (ס)

Segment 25
HE:
ויהי בחדש השביעי בא ישמעאל בן נתניה בן אלישמע מזרע המלוכה ועשרה אנשים אתו ויכו את גדליהו וימת ואת היהודים ואת הכשדים אשר היו אתו במצפה:

Segment 26
HE:
ויקמו כל העם מקטן ועד גדול ושרי החילים ויבאו מצרים כי יראו מפני כשדים: (פ)

Segment 27
HE:
ויהי בשלשים ושבע שנה לגלות יהויכין מלך יהודה בשנים עשר חדש בעשרים ושבעה לחדש נשא אויל מרדך מלך בבל בשנת מלכו את ראש יהויכין מלך יהודה מבית כלא:

Segment 28
HE:
וידבר אתו טבות ויתן את כסאו מעל כסא המלכים אשר אתו בבבל:

Segment 29
HE:
ושנא את בגדי כלאו ואכל לחם תמיד לפניו כל ימי חייו:

Segment 30
HE:
וארחתו ארחת תמיד נתנה לו מאת המלך דבר יום ביומו כל ימי חיו: (פפפ)