Kings 2 Chapter 3
מלכים ב פרק ג
Source: https://ajew.org/reader/tanach-melachim-b/1/3

Segment 1
HE:
ויהורם בן אחאב מלך על ישראל בשמרון בשנת שמנה עשרה ליהושפט מלך יהודה וימלך שתים עשרה שנה:

Segment 2
HE:
ויעשה הרע בעיני יהוה רק לא כאביו וכאמו ויסר את מצבת הבעל אשר עשה אביו:

Segment 3
HE:
רק בחטאות ירבעם בן נבט אשר החטיא את ישראל דבק לא סר ממנה: (ס)

Segment 4
HE:
ומישע מלך מואב היה נקד והשיב למלך ישראל מאה אלף כרים ומאה אלף אילים צמר:

Segment 5
HE:
ויהי כמות אחאב ויפשע מלך מואב במלך ישראל:

Segment 6
HE:
ויצא המלך יהורם ביום ההוא משמרון ויפקד את כל ישראל:

Segment 7
HE:
וילך וישלח אל יהושפט מלך יהודה לאמר מלך מואב פשע בי התלך אתי אל מואב למלחמה ויאמר אעלה כמוני כמוך כעמי כעמך כסוסי כסוסיך:

Segment 8
HE:
ויאמר אי זה הדרך נעלה ויאמר דרך מדבר אדום:

Segment 9
HE:
וילך מלך ישראל ומלך יהודה ומלך אדום ויסבו דרך שבעת ימים ולא היה מים למחנה ולבהמה אשר ברגליהם:

Segment 10
HE:
ויאמר מלך ישראל אהה כי קרא יהוה לשלשת המלכים האלה לתת אותם ביד מואב:

Segment 11
HE:
ויאמר יהושפט האין פה נביא ליהוה ונדרשה את יהוה מאותו ויען אחד מעבדי מלך ישראל ויאמר פה אלישע בן שפט אשר יצק מים על ידי אליהו:

Segment 12
HE:
ויאמר יהושפט יש אותו דבר יהוה וירדו אליו מלך ישראל ויהושפט ומלך אדום:

Segment 13
HE:
ויאמר אלישע אל מלך ישראל מה לי ולך לך אל נביאי אביך ואל נביאי אמך ויאמר לו מלך ישראל אל כי קרא יהוה לשלשת המלכים האלה לתת אותם ביד מואב:

Segment 14
HE:
ויאמר אלישע חי יהוה צבאות אשר עמדתי לפניו כי לולי פני יהושפט מלך יהודה אני נשא אם אביט אליך ואם אראך:

Segment 15
HE:
ועתה קחו לי מנגן והיה כנגן המנגן ותהי עליו יד יהוה:

Segment 16
HE:
ויאמר כה אמר יהוה עשה הנחל הזה גבים גבים:

Segment 17
HE:
כי כה אמר יהוה לא תראו רוח ולא תראו גשם והנחל ההוא ימלא מים ושתיתם אתם ומקניכם ובהמתכם:

Segment 18
HE:
ונקל זאת בעיני יהוה ונתן את מואב בידכם:

Segment 19
HE:
והכיתם כל עיר מבצר וכל עיר מבחור וכל עץ טוב תפילו וכל מעיני מים תסתמו וכל החלקה הטובה תכאבו באבנים:

Segment 20
HE:
ויהי בבקר כעלות המנחה והנה מים באים מדרך אדום ותמלא הארץ את המים:

Segment 21
HE:
וכל מואב שמעו כי עלו המלכים להלחם בם ויצעקו מכל חגר חגרה ומעלה ויעמדו על הגבול:

Segment 22
HE:
וישכימו בבקר והשמש זרחה על המים ויראו מואב מנגד את המים אדמים כדם:

Segment 23
HE:
ויאמרו דם זה החרב נחרבו המלכים ויכו איש את רעהו ועתה לשלל מואב:

Segment 24
HE:
ויבאו אל מחנה ישראל ויקמו ישראל ויכו את מואב וינסו מפניהם (ויבו) ויכו בה והכות את מואב:

Segment 25
HE:
והערים יהרסו וכל חלקה טובה ישליכו איש אבנו ומלאוה וכל מעין מים יסתמו וכל עץ טוב יפילו עד השאיר אבניה בקיר חרשת ויסבו הקלעים ויכוה:

Segment 26
HE:
וירא מלך מואב כי חזק ממנו המלחמה ויקח אותו שבע מאות איש שלף חרב להבקיע אל מלך אדום ולא יכלו:

Segment 27
HE:
ויקח את בנו הבכור אשר ימלך תחתיו ויעלהו עלה על החמה ויהי קצף גדול על ישראל ויסעו מעליו וישבו לארץ: (פ)