Kings 2 Chapter 6
מלכים ב פרק ו
Source: https://ajew.org/reader/tanach-melachim-b/1/6

Segment 1
HE:
ויאמרו בני הנביאים אל אלישע הנה נא המקום אשר אנחנו ישבים שם לפניך צר ממנו:

Segment 2
HE:
נלכה נא עד הירדן ונקחה משם איש קורה אחת ונעשה לנו שם מקום לשבת שם ויאמר לכו:

Segment 3
HE:
ויאמר האחד הואל נא ולך את עבדיך ויאמר אני אלך:

Segment 4
HE:
וילך אתם ויבאו הירדנה ויגזרו העצים:

Segment 5
HE:
ויהי האחד מפיל הקורה ואת הברזל נפל אל המים ויצעק ויאמר אהה אדני והוא שאול:

Segment 6
HE:
ויאמר איש האלהים אנה נפל ויראהו את המקום ויקצב עץ וישלך שמה ויצף הברזל:

Segment 7
HE:
ויאמר הרם לך וישלח ידו ויקחהו: (פ)

Segment 8
HE:
ומלך ארם היה נלחם בישראל ויועץ אל עבדיו לאמר אל מקום פלני אלמני תחנתי:

Segment 9
HE:
וישלח איש האלהים אל מלך ישראל לאמר השמר מעבר המקום הזה כי שם ארם נחתים:

Segment 10
HE:
וישלח מלך ישראל אל המקום אשר אמר לו איש האלהים (והזהירה) והזהירו ונשמר שם לא אחת ולא שתים:

Segment 11
HE:
ויסער לב מלך ארם על הדבר הזה ויקרא אל עבדיו ויאמר אליהם הלוא תגידו לי מי משלנו אל מלך ישראל:

Segment 12
HE:
ויאמר אחד מעבדיו לוא אדני המלך כי אלישע הנביא אשר בישראל יגיד למלך ישראל את הדברים אשר תדבר בחדר משכבך:

Segment 13
HE:
ויאמר לכו וראו איכה הוא ואשלח ואקחהו ויגד לו לאמר הנה בדתן:

Segment 14
HE:
וישלח שמה סוסים ורכב וחיל כבד ויבאו לילה ויקפו על העיר:

Segment 15
HE:
וישכם משרת איש האלהים לקום ויצא והנה חיל סובב את העיר וסוס ורכב ויאמר נערו אליו אהה אדני איכה נעשה:

Segment 16
HE:
ויאמר אל תירא כי רבים אשר אתנו מאשר אותם:

Segment 17
HE:
ויתפלל אלישע ויאמר יהוה פקח נא את עיניו ויראה ויפקח יהוה את עיני הנער וירא והנה ההר מלא סוסים ורכב אש סביבת אלישע:

Segment 18
HE:
וירדו אליו ויתפלל אלישע אל יהוה ויאמר הך נא את הגוי הזה בסנורים ויכם בסנורים כדבר אלישע:

Segment 19
HE:
ויאמר אלהם אלישע לא זה הדרך ולא זה העיר לכו אחרי ואוליכה אתכם אל האיש אשר תבקשון וילך אותם שמרונה:

Segment 20
HE:
ויהי כבאם שמרון ויאמר אלישע יהוה פקח את עיני אלה ויראו ויפקח יהוה את עיניהם ויראו והנה בתוך שמרון:

Segment 21
HE:
ויאמר מלך ישראל אל אלישע כראתו אותם האכה אכה אבי:

Segment 22
HE:
ויאמר לא תכה האשר שבית בחרבך ובקשתך אתה מכה שים לחם ומים לפניהם ויאכלו וישתו וילכו אל אדניהם:

Segment 23
HE:
ויכרה להם כרה גדולה ויאכלו וישתו וישלחם וילכו אל אדניהם ולא יספו עוד גדודי ארם לבוא בארץ ישראל: (פ)

Segment 24
HE:
ויהי אחרי כן ויקבץ בן הדד מלך ארם את כל מחנהו ויעל ויצר על שמרון:

Segment 25
HE:
ויהי רעב גדול בשמרון והנה צרים עליה עד היות ראש חמור בשמנים כסף ורבע הקב (חרייונים) דביונים בחמשה כסף:

Segment 26
HE:
ויהי מלך ישראל עבר על החמה ואשה צעקה אליו לאמר הושיעה אדני המלך:

Segment 27
HE:
ויאמר אל יושעך יהוה מאין אושיעך המן הגרן או מן היקב:

Segment 28
HE:
ויאמר לה המלך מה לך ותאמר האשה הזאת אמרה אלי תני את בנך ונאכלנו היום ואת בני נאכל מחר:

Segment 29
HE:
ונבשל את בני ונאכלהו ואמר אליה ביום האחר תני את בנך ונאכלנו ותחבא את בנה:

Segment 30
HE:
ויהי כשמע המלך את דברי האשה ויקרע את בגדיו והוא עבר על החמה וירא העם והנה השק על בשרו מבית:

Segment 31
HE:
ויאמר כה יעשה לי אלהים וכה יוסף אם יעמד ראש אלישע בן שפט עליו היום:

Segment 32
HE:
ואלישע ישב בביתו והזקנים ישבים אתו וישלח איש מלפניו בטרם יבא המלאך אליו והוא אמר אל הזקנים הראיתם כי שלח בן המרצח הזה להסיר את ראשי ראו כבא המלאך סגרו הדלת ולחצתם אתו בדלת הלוא קול רגלי אדניו אחריו:

Segment 33
HE:
עודנו מדבר עמם והנה המלאך ירד אליו ויאמר הנה זאת הרעה מאת יהוה מה אוחיל ליהוה עוד: (ס)