Kings 2 Chapter 9
מלכים ב פרק ט
Source: https://ajew.org/reader/tanach-melachim-b/1/9

Segment 1
HE:
ואלישע הנביא קרא לאחד מבני הנביאים ויאמר לו חגר מתניך וקח פך השמן הזה בידך ולך רמת גלעד:

Segment 2
HE:
ובאת שמה וראה שם יהוא בן יהושפט בן נמשי ובאת והקמתו מתוך אחיו והביאת אתו חדר בחדר:

Segment 3
HE:
ולקחת פך השמן ויצקת על ראשו ואמרת כה אמר יהוה משחתיך למלך אל ישראל ופתחת הדלת ונסתה ולא תחכה:

Segment 4
HE:
וילך הנער הנער הנביא רמת גלעד:

Segment 5
HE:
ויבא והנה שרי החיל ישבים ויאמר דבר לי אליך השר ויאמר יהוא אל מי מכלנו ויאמר אליך השר:

Segment 6
HE:
ויקם ויבא הביתה ויצק השמן אל ראשו ויאמר לו כה אמר יהוה אלהי ישראל משחתיך למלך אל עם יהוה אל ישראל:

Segment 7
HE:
והכיתה את בית אחאב אדניך ונקמתי דמי עבדי הנביאים ודמי כל עבדי יהוה מיד איזבל:

Segment 8
HE:
ואבד כל בית אחאב והכרתי לאחאב משתין בקיר ועצור ועזוב בישראל:

Segment 9
HE:
ונתתי את בית אחאב כבית ירבעם בן נבט וכבית בעשא בן אחיה:

Segment 10
HE:
ואת איזבל יאכלו הכלבים בחלק יזרעאל ואין קבר ויפתח הדלת וינס:

Segment 11
HE:
ויהוא יצא אל עבדי אדניו ויאמר לו השלום מדוע בא המשגע הזה אליך ויאמר אליהם אתם ידעתם את האיש ואת שיחו:

Segment 12
HE:
ויאמרו שקר הגד נא לנו ויאמר כזאת וכזאת אמר אלי לאמר כה אמר יהוה משחתיך למלך אל ישראל:

Segment 13
HE:
וימהרו ויקחו איש בגדו וישימו תחתיו אל גרם המעלות ויתקעו בשופר ויאמרו מלך יהוא:

Segment 14
HE:
ויתקשר יהוא בן יהושפט בן נמשי אל יורם ויורם היה שמר ברמת גלעד הוא וכל ישראל מפני חזאל מלך ארם:

Segment 15
HE:
וישב יהורם המלך להתרפא ביזרעאל מן המכים אשר יכהו ארמים בהלחמו את חזאל מלך ארם ויאמר יהוא אם יש נפשכם אל יצא פליט מן העיר ללכת (לגיד) להגיד ביזרעאל:

Segment 16
HE:
וירכב יהוא וילך יזרעאלה כי יורם שכב שמה ואחזיה מלך יהודה ירד לראות את יורם:

Segment 17
HE:
והצפה עמד על המגדל ביזרעאל וירא את שפעת יהוא בבאו ויאמר שפעת אני ראה ויאמר יהורם קח רכב ושלח לקראתם ויאמר השלום:

Segment 18
HE:
וילך רכב הסוס לקראתו ויאמר כה אמר המלך השלום ויאמר יהוא מה לך ולשלום סב אל אחרי ויגד הצפה לאמר בא המלאך עד הם ולא שב:

Segment 19
HE:
וישלח רכב סוס שני ויבא אלהם ויאמר כה אמר המלך שלום ויאמר יהוא מה לך ולשלום סב אל אחרי:

Segment 20
HE:
ויגד הצפה לאמר בא עד אליהם ולא שב והמנהג כמנהג יהוא בן נמשי כי בשגעון ינהג:

Segment 21
HE:
ויאמר יהורם אסר ויאסר רכבו ויצא יהורם מלך ישראל ואחזיהו מלך יהודה איש ברכבו ויצאו לקראת יהוא וימצאהו בחלקת נבות היזרעאלי:

Segment 22
HE:
ויהי כראות יהורם את יהוא ויאמר השלום יהוא ויאמר מה השלום עד זנוני איזבל אמך וכשפיה הרבים:

Segment 23
HE:
ויהפך יהורם ידיו וינס ויאמר אל אחזיהו מרמה אחזיה:

Segment 24
HE:
ויהוא מלא ידו בקשת ויך את יהורם בין זרעיו ויצא החצי מלבו ויכרע ברכבו:

Segment 25
HE:
ויאמר אל בדקר (שלשה) שלשו שא השלכהו בחלקת שדה נבות היזרעאלי כי זכר אני ואתה את רכבים צמדים אחרי אחאב אביו ויהוה נשא עליו את המשא הזה:

Segment 26
HE:
אם לא את דמי נבות ואת דמי בניו ראיתי אמש נאם יהוה ושלמתי לך בחלקה הזאת נאם יהוה ועתה שא השלכהו בחלקה כדבר יהוה:

Segment 27
HE:
ואחזיה מלך יהודה ראה וינס דרך בית הגן וירדף אחריו יהוא ויאמר גם אתו הכהו אל המרכבה במעלה גור אשר את יבלעם וינס מגדו וימת שם:

Segment 28
HE:
וירכבו אתו עבדיו ירושלמה ויקברו אתו בקברתו עם אבתיו בעיר דוד: (פ)

Segment 29
HE:
ובשנת אחת עשרה שנה ליורם בן אחאב מלך אחזיה על יהודה:

Segment 30
HE:
ויבוא יהוא יזרעאלה ואיזבל שמעה ותשם בפוך עיניה ותיטב את ראשה ותשקף בעד החלון:

Segment 31
HE:
ויהוא בא בשער ותאמר השלום זמרי הרג אדניו:

Segment 32
HE:
וישא פניו אל החלון ויאמר מי אתי מי וישקיפו אליו שנים שלשה סריסים:

Segment 33
HE:
ויאמר (שמטהו) שמטוה וישמטוה ויז מדמה אל הקיר ואל הסוסים וירמסנה:

Segment 34
HE:
ויבא ויאכל וישת ויאמר פקדו נא את הארורה הזאת וקברוה כי בת מלך היא:

Segment 35
HE:
וילכו לקברה ולא מצאו בה כי אם הגלגלת והרגלים וכפות הידים:

Segment 36
HE:
וישבו ויגידו לו ויאמר דבר יהוה הוא אשר דבר ביד עבדו אליהו התשבי לאמר בחלק יזרעאל יאכלו הכלבים את בשר איזבל:

Segment 37
HE:
(והית) והיתה נבלת איזבל כדמן על פני השדה בחלק יזרעאל אשר לא יאמרו זאת איזבל: (פ)