Micah Chapter 7
מיכה פרק ז
Source: https://ajew.org/reader/tanach-michah/1/7

Segment 1
HE:
אללי לי כי הייתי כאספי קיץ כעללת בציר אין אשכול לאכול בכורה אותה נפשי:

Segment 2
HE:
אבד חסיד מן הארץ וישר באדם אין כלם לדמים יארבו איש את אחיהו יצודו חרם:

Segment 3
HE:
על הרע כפים להיטיב השר שאל והשפט בשלום והגדול דבר הות נפשו הוא ויעבתוה:

Segment 4
HE:
טובם כחדק ישר ממסוכה יום מצפיך פקדתך באה עתה תהיה מבוכתם:

Segment 5
HE:
אל תאמינו ברע אל תבטחו באלוף משכבת חיקך שמר פתחי פיך:

Segment 6
HE:
כי בן מנבל אב בת קמה באמה כלה בחמתה איבי איש אנשי ביתו:

Segment 7
HE:
ואני ביהוה אצפה אוחילה לאלהי ישעי ישמעני אלהי:

Segment 8
HE:
אל תשמחי איבתי לי כי נפלתי קמתי כי אשב בחשך יהוה אור לי: (פ)

Segment 9
HE:
זעף יהוה אשא כי חטאתי לו עד אשר יריב ריבי ועשה משפטי יוציאני לאור אראה בצדקתו:

Segment 10
HE:
ותרא איבתי ותכסה בושה האמרה אלי איו יהוה אלהיך עיני תראינה בה עתה תהיה למרמס כטיט חוצות:

Segment 11
HE:
יום לבנות גדריך יום ההוא ירחק חק:

Segment 12
HE:
יום הוא ועדיך יבוא למני אשור וערי מצור ולמני מצור ועד נהר וים מים והר ההר:

Segment 13
HE:
והיתה הארץ לשממה על ישביה מפרי מעלליהם: (פ)

Segment 14
HE:
רעה עמך בשבטך צאן נחלתך שכני לבדד יער בתוך כרמל ירעו בשן וגלעד כימי עולם:

Segment 15
HE:
כימי צאתך מארץ מצרים אראנו נפלאות:

Segment 16
HE:
יראו גוים ויבשו מכל גבורתם ישימו יד על פה אזניהם תחרשנה:

Segment 17
HE:
ילחכו עפר כנחש כזחלי ארץ ירגזו ממסגרתיהם אל יהוה אלהינו יפחדו ויראו ממך:

Segment 18
HE:
מי אל כמוך נשא עון ועבר על פשע לשארית נחלתו לא החזיק לעד אפו כי חפץ חסד הוא:

Segment 19
HE:
ישוב ירחמנו יכבש עונתינו ותשליך במצלות ים כל חטאותם:

Segment 20
HE:
תתן אמת ליעקב חסד לאברהם אשר נשבעת לאבתינו מימי קדם: (פפפ)