{
  "bookId": "tanach-nechemia",
  "part": "1",
  "torah": "9",
  "title": "Nehemiah Chapter 9",
  "hebrewTitle": "נחמיה פרק ט",
  "sourceUrl": "/reader/tanach-nechemia/1/9",
  "plainUrl": "/reader-plain/tanach-nechemia/1/9/",
  "segments": [
    {
      "index": 1,
      "he": "וביום עשרים וארבעה לחדש הזה נאספו בני ישראל בצום ובשקים ואדמה עליהם:",
      "en": ""
    },
    {
      "index": 2,
      "he": "ויבדלו זרע ישראל מכל בני נכר ויעמדו ויתודו על חטאתיהם ועונות אבתיהם:",
      "en": ""
    },
    {
      "index": 3,
      "he": "ויקומו על עמדם ויקראו בספר תורת יהוה אלהיהם רבעית היום ורבעית מתודים ומשתחוים ליהוה אלהיהם: (פ)",
      "en": ""
    },
    {
      "index": 4,
      "he": "ויקם על מעלה הלוים ישוע ובני קדמיאל שבניה בני שרביה בני כנני ויזעקו בקול גדול אל יהוה אלהיהם:",
      "en": ""
    },
    {
      "index": 5,
      "he": "ויאמרו הלוים ישוע וקדמיאל בני חשבניה שרביה הודיה שבניה פתחיה קומו ברכו את יהוה אלהיכם מן העולם עד העולם ויברכו שם כבודך ומרומם על כל ברכה ותהלה:",
      "en": ""
    },
    {
      "index": 6,
      "he": "אתה הוא יהוה לבדך (את) אתה עשית את השמים שמי השמים וכל צבאם הארץ וכל אשר עליה הימים וכל אשר בהם ואתה מחיה את כלם וצבא השמים לך משתחוים:",
      "en": ""
    },
    {
      "index": 7,
      "he": "אתה הוא יהוה האלהים אשר בחרת באברם והוצאתו מאור כשדים ושמת שמו אברהם:",
      "en": ""
    },
    {
      "index": 8,
      "he": "ומצאת את לבבו נאמן לפניך וכרות עמו הברית לתת את ארץ הכנעני החתי האמרי והפרזי והיבוסי והגרגשי לתת לזרעו ותקם את דבריך כי צדיק אתה:",
      "en": ""
    },
    {
      "index": 9,
      "he": "ותרא את עני אבתינו במצרים ואת זעקתם שמעת על ים סוף:",
      "en": ""
    },
    {
      "index": 10,
      "he": "ותתן אתת ומפתים בפרעה ובכל עבדיו ובכל עם ארצו כי ידעת כי הזידו עליהם ותעש לך שם כהיום הזה:",
      "en": ""
    },
    {
      "index": 11,
      "he": "והים בקעת לפניהם ויעברו בתוך הים ביבשה ואת רדפיהם השלכת במצולת כמו אבן במים עזים:",
      "en": ""
    },
    {
      "index": 12,
      "he": "ובעמוד ענן הנחיתם יומם ובעמוד אש לילה להאיר להם את הדרך אשר ילכו בה:",
      "en": ""
    },
    {
      "index": 13,
      "he": "ועל הר סיני ירדת ודבר עמהם משמים ותתן להם משפטים ישרים ותורות אמת חקים ומצות טובים:",
      "en": ""
    },
    {
      "index": 14,
      "he": "ואת שבת קדשך הודעת להם ומצוות וחקים ותורה צוית להם ביד משה עבדך:",
      "en": ""
    },
    {
      "index": 15,
      "he": "ולחם משמים נתתה להם לרעבם ומים מסלע הוצאת להם לצמאם ותאמר להם לבוא לרשת את הארץ אשר נשאת את ידך לתת להם:",
      "en": ""
    },
    {
      "index": 16,
      "he": "והם ואבתינו הזידו ויקשו את ערפם ולא שמעו אל מצותיך:",
      "en": ""
    },
    {
      "index": 17,
      "he": "וימאנו לשמע ולא זכרו נפלאתיך אשר עשית עמהם ויקשו את ערפם ויתנו ראש לשוב לעבדתם במרים ואתה אלוה סליחות חנון ורחום ארך אפים ורב (וחסד) חסד ולא עזבתם:",
      "en": ""
    },
    {
      "index": 18,
      "he": "אף כי עשו להם עגל מסכה ויאמרו זה אלהיך אשר העלך ממצרים ויעשו נאצות גדלות:",
      "en": ""
    },
    {
      "index": 19,
      "he": "ואתה ברחמיך הרבים לא עזבתם במדבר את עמוד הענן לא סר מעליהם ביומם להנחתם בהדרך ואת עמוד האש בלילה להאיר להם ואת הדרך אשר ילכו בה:",
      "en": ""
    },
    {
      "index": 20,
      "he": "ורוחך הטובה נתת להשכילם ומנך לא מנעת מפיהם ומים נתתה להם לצמאם:",
      "en": ""
    },
    {
      "index": 21,
      "he": "וארבעים שנה כלכלתם במדבר לא חסרו שלמתיהם לא בלו ורגליהם לא בצקו:",
      "en": ""
    },
    {
      "index": 22,
      "he": "ותתן להם ממלכות ועממים ותחלקם לפאה ויירשו את ארץ סיחון ואת ארץ מלך חשבון ואת ארץ עוג מלך הבשן:",
      "en": ""
    },
    {
      "index": 23,
      "he": "ובניהם הרבית כככבי השמים ותביאם אל הארץ אשר אמרת לאבתיהם לבוא לרשת:",
      "en": ""
    },
    {
      "index": 24,
      "he": "ויבאו הבנים ויירשו את הארץ ותכנע לפניהם את ישבי הארץ הכנענים ותתנם בידם ואת מלכיהם ואת עממי הארץ לעשות בהם כרצונם:",
      "en": ""
    },
    {
      "index": 25,
      "he": "וילכדו ערים בצרות ואדמה שמנה ויירשו בתים מלאים כל טוב ברות חצובים כרמים וזיתים ועץ מאכל לרב ויאכלו וישבעו וישמינו ויתעדנו בטובך הגדול:",
      "en": ""
    },
    {
      "index": 26,
      "he": "וימרו וימרדו בך וישלכו את תורתך אחרי גום ואת נביאיך הרגו אשר העידו בם להשיבם אליך ויעשו נאצות גדולת:",
      "en": ""
    },
    {
      "index": 27,
      "he": "ותתנם ביד צריהם ויצרו להם ובעת צרתם יצעקו אליך ואתה משמים תשמע וכרחמיך הרבים תתן להם מושיעים ויושיעום מיד צריהם:",
      "en": ""
    },
    {
      "index": 28,
      "he": "וכנוח להם ישובו לעשות רע לפניך ותעזבם ביד איביהם וירדו בהם וישובו ויזעקוך ואתה משמים תשמע ותצילם כרחמיך רבות עתים:",
      "en": ""
    },
    {
      "index": 29,
      "he": "ותעד בהם להשיבם אל תורתך והמה הזידו ולא שמעו למצותיך ובמשפטיך חטאו בם אשר יעשה אדם וחיה בהם ויתנו כתף סוררת וערפם הקשו ולא שמעו:",
      "en": ""
    },
    {
      "index": 30,
      "he": "ותמשך עליהם שנים רבות ותעד בם ברוחך ביד נביאיך ולא האזינו ותתנם ביד עמי הארצת:",
      "en": ""
    },
    {
      "index": 31,
      "he": "וברחמיך הרבים לא עשיתם כלה ולא עזבתם כי אל חנון ורחום אתה:",
      "en": ""
    },
    {
      "index": 32,
      "he": "ועתה אלהינו האל הגדול הגבור והנורא שומר הברית והחסד אל ימעט לפניך את כל התלאה אשר מצאתנו למלכינו לשרינו ולכהנינו ולנביאנו ולאבתינו ולכל עמך מימי מלכי אשור עד היום הזה:",
      "en": ""
    },
    {
      "index": 33,
      "he": "ואתה צדיק על כל הבא עלינו כי אמת עשית ואנחנו הרשענו:",
      "en": ""
    },
    {
      "index": 34,
      "he": "ואת מלכינו שרינו כהנינו ואבתינו לא עשו תורתך ולא הקשיבו אל מצותיך ולעדותיך אשר העידת בהם:",
      "en": ""
    },
    {
      "index": 35,
      "he": "והם במלכותם ובטובך הרב אשר נתת להם ובארץ הרחבה והשמנה אשר נתת לפניהם לא עבדוך ולא שבו ממעלליהם הרעים:",
      "en": ""
    },
    {
      "index": 36,
      "he": "הנה אנחנו היום עבדים והארץ אשר נתתה לאבתינו לאכל את פריה ואת טובה הנה אנחנו עבדים עליה:",
      "en": ""
    },
    {
      "index": 37,
      "he": "ותבואתה מרבה למלכים אשר נתתה עלינו בחטאותינו ועל גויתינו משלים ובבהמתנו כרצונם ובצרה גדולה אנחנו: (פ)",
      "en": ""
    }
  ]
}