Ruth Chapter 4
רות פרק ד
Source: https://ajew.org/reader/tanach-rus/1/4

Segment 1
HE:
ובעז עלה השער וישב שם והנה הגאל עבר אשר דבר בעז ויאמר סורה שבה פה פלני אלמני ויסר וישב:

Segment 2
HE:
ויקח עשרה אנשים מזקני העיר ויאמר שבו פה וישבו:

Segment 3
HE:
ויאמר לגאל חלקת השדה אשר לאחינו לאלימלך מכרה נעמי השבה משדה מואב:

Segment 4
HE:
ואני אמרתי אגלה אזנך לאמר קנה נגד הישבים ונגד זקני עמי אם תגאל גאל ואם לא יגאל הגידה לי (ואדע) ואדעה כי אין זולתך לגאול ואנכי אחריך ויאמר אנכי אגאל:

Segment 5
HE:
ויאמר בעז ביום קנותך השדה מיד נעמי ומאת רות המואביה אשת המת (קניתי) קניתה להקים שם המת על נחלתו:

Segment 6
HE:
ויאמר הגאל לא אוכל (לגאול) לגאל לי פן אשחית את נחלתי גאל לך אתה את גאלתי כי לא אוכל לגאל:

Segment 7
HE:
וזאת לפנים בישראל על הגאולה ועל התמורה לקים כל דבר שלף איש נעלו ונתן לרעהו וזאת התעודה בישראל:

Segment 8
HE:
ויאמר הגאל לבעז קנה לך וישלף נעלו:

Segment 9
HE:
ויאמר בעז לזקנים וכל העם עדים אתם היום כי קניתי את כל אשר לאלימלך ואת כל אשר לכליון ומחלון מיד נעמי:

Segment 10
HE:
וגם את רות המאביה אשת מחלון קניתי לי לאשה להקים שם המת על נחלתו ולא יכרת שם המת מעם אחיו ומשער מקומו עדים אתם היום:

Segment 11
HE:
ויאמרו כל העם אשר בשער והזקנים עדים יתן יהוה את האשה הבאה אל ביתך כרחל וכלאה אשר בנו שתיהם את בית ישראל ועשה חיל באפרתה וקרא שם בבית לחם:

Segment 12
HE:
ויהי ביתך כבית פרץ אשר ילדה תמר ליהודה מן הזרע אשר יתן יהוה לך מן הנערה הזאת:

Segment 13
HE:
ויקח בעז את רות ותהי לו לאשה ויבא אליה ויתן יהוה לה הריון ותלד בן:

Segment 14
HE:
ותאמרנה הנשים אל נעמי ברוך יהוה אשר לא השבית לך גאל היום ויקרא שמו בישראל:

Segment 15
HE:
והיה לך למשיב נפש ולכלכל את שיבתך כי כלתך אשר אהבתך ילדתו אשר היא טובה לך משבעה בנים:

Segment 16
HE:
ותקח נעמי את הילד ותשתהו בחיקה ותהי לו לאמנת:

Segment 17
HE:
ותקראנה לו השכנות שם לאמר ילד בן לנעמי ותקראנה שמו עובד הוא אבי ישי אבי דוד: (פ)

Segment 18
HE:
ואלה תולדות פרץ פרץ הוליד את חצרון:

Segment 19
HE:
וחצרון הוליד את רם ורם הוליד את עמינדב:

Segment 20
HE:
ועמינדב הוליד את נחשון ונחשון הוליד את שלמה:

Segment 21
HE:
ושלמון הוליד את בעז ובעז הוליד את עובד:

Segment 22
HE:
ועבד הוליד את ישי וישי הוליד את דוד: (פפפ)