Exodus Chapter 12
שמות פרק יב
Source: https://ajew.org/reader/tanach-shemos/1/12

Segment 1
HE:
ויאמר יהוה אל משה ואל אהרן בארץ מצרים לאמר:

Segment 2
HE:
החדש הזה לכם ראש חדשים ראשון הוא לכם לחדשי השנה:

Segment 3
HE:
דברו אל כל עדת ישראל לאמר בעשר לחדש הזה ויקחו להם איש שה לבית אבת שה לבית:

Segment 4
HE:
ואם ימעט הבית מהיות משה ולקח הוא ושכנו הקרב אל ביתו במכסת נפשת איש לפי אכלו תכסו על השה:

Segment 5
HE:
שה תמים זכר בן שנה יהיה לכם מן הכבשים ומן העזים תקחו:

Segment 6
HE:
והיה לכם למשמרת עד ארבעה עשר יום לחדש הזה ושחטו אתו כל קהל עדת ישראל בין הערבים:

Segment 7
HE:
ולקחו מן הדם ונתנו על שתי המזוזת ועל המשקוף על הבתים אשר יאכלו אתו בהם:

Segment 8
HE:
ואכלו את הבשר בלילה הזה צלי אש ומצות על מררים יאכלהו:

Segment 9
HE:
אל תאכלו ממנו נא ובשל מבשל במים כי אם צלי אש ראשו על כרעיו ועל קרבו:

Segment 10
HE:
ולא תותירו ממנו עד בקר והנתר ממנו עד בקר באש תשרפו:

Segment 11
HE:
וככה תאכלו אתו מתניכם חגרים נעליכם ברגליכם ומקלכם בידכם ואכלתם אתו בחפזון פסח הוא ליהוה:

Segment 12
HE:
ועברתי בארץ מצרים בלילה הזה והכיתי כל בכור בארץ מצרים מאדם ועד בהמה ובכל אלהי מצרים אעשה שפטים אני יהוה:

Segment 13
HE:
והיה הדם לכם לאת על הבתים אשר אתם שם וראיתי את הדם ופסחתי עלכם ולא יהיה בכם נגף למשחית בהכתי בארץ מצרים:

Segment 14
HE:
והיה היום הזה לכם לזכרון וחגתם אתו חג ליהוה לדרתיכם חקת עולם תחגהו:

Segment 15
HE:
שבעת ימים מצות תאכלו אך ביום הראשון תשביתו שאר מבתיכם כי כל אכל חמץ ונכרתה הנפש ההוא מישראל מיום הראשן עד יום השבעי:

Segment 16
HE:
וביום הראשון מקרא קדש וביום השביעי מקרא קדש יהיה לכם כל מלאכה לא יעשה בהם אך אשר יאכל לכל נפש הוא לבדו יעשה לכם:

Segment 17
HE:
ושמרתם את המצות כי בעצם היום הזה הוצאתי את צבאותיכם מארץ מצרים ושמרתם את היום הזה לדרתיכם חקת עולם:

Segment 18
HE:
בראשן בארבעה עשר יום לחדש בערב תאכלו מצת עד יום האחד ועשרים לחדש בערב:

Segment 19
HE:
שבעת ימים שאר לא ימצא בבתיכם כי כל אכל מחמצת ונכרתה הנפש ההוא מעדת ישראל בגר ובאזרח הארץ:

Segment 20
HE:
כל מחמצת לא תאכלו בכל מושבתיכם תאכלו מצות: (פ)

Segment 21
HE:
חמישי  ויקרא משה לכל זקני ישראל ויאמר אלהם משכו וקחו לכם צאן למשפחתיכם ושחטו הפסח:

Segment 22
HE:
ולקחתם אגדת אזוב וטבלתם בדם אשר בסף והגעתם אל המשקוף ואל שתי המזוזת מן הדם אשר בסף ואתם לא תצאו איש מפתח ביתו עד בקר:

Segment 23
HE:
ועבר יהוה לנגף את מצרים וראה את הדם על המשקוף ועל שתי המזוזת ופסח יהוה על הפתח ולא יתן המשחית לבא אל בתיכם לנגף:

Segment 24
HE:
ושמרתם את הדבר הזה לחק לך ולבניך עד עולם:

Segment 25
HE:
והיה כי תבאו אל הארץ אשר יתן יהוה לכם כאשר דבר ושמרתם את העבדה הזאת:

Segment 26
HE:
והיה כי יאמרו אליכם בניכם מה העבדה הזאת לכם:

Segment 27
HE:
ואמרתם זבח פסח הוא ליהוה אשר פסח על בתי בני ישראל במצרים בנגפו את מצרים ואת בתינו הציל ויקד העם וישתחוו:

Segment 28
HE:
וילכו ויעשו בני ישראל כאשר צוה יהוה את משה ואהרן כן עשו: (ס)

Segment 29
HE:
שישי  ויהי בחצי הלילה ויהוה הכה כל בכור בארץ מצרים מבכר פרעה הישב על כסאו עד בכור השבי אשר בבית הבור וכל בכור בהמה:

Segment 30
HE:
ויקם פרעה לילה הוא וכל עבדיו וכל מצרים ותהי צעקה גדלה במצרים כי אין בית אשר אין שם מת:

Segment 31
HE:
ויקרא למשה ולאהרן לילה ויאמר קומו צאו מתוך עמי גם אתם גם בני ישראל ולכו עבדו את יהוה כדברכם:

Segment 32
HE:
גם צאנכם גם בקרכם קחו כאשר דברתם ולכו וברכתם גם אתי:

Segment 33
HE:
ותחזק מצרים על העם למהר לשלחם מן הארץ כי אמרו כלנו מתים:

Segment 34
HE:
וישא העם את בצקו טרם יחמץ משארתם צררת בשמלתם על שכמם:

Segment 35
HE:
ובני ישראל עשו כדבר משה וישאלו ממצרים כלי כסף וכלי זהב ושמלת:

Segment 36
HE:
ויהוה נתן את חן העם בעיני מצרים וישאלום וינצלו את מצרים: (פ)

Segment 37
HE:
ויסעו בני ישראל מרעמסס סכתה כשש מאות אלף רגלי הגברים לבד מטף:

Segment 38
HE:
וגם ערב רב עלה אתם וצאן ובקר מקנה כבד מאד:

Segment 39
HE:
ויאפו את הבצק אשר הוציאו ממצרים עגת מצות כי לא חמץ כי גרשו ממצרים ולא יכלו להתמהמה וגם צדה לא עשו להם:

Segment 40
HE:
ומושב בני ישראל אשר ישבו במצרים שלשים שנה וארבע מאות שנה:

Segment 41
HE:
ויהי מקץ שלשים שנה וארבע מאות שנה ויהי בעצם היום הזה יצאו כל צבאות יהוה מארץ מצרים:

Segment 42
HE:
ליל שמרים הוא ליהוה להוציאם מארץ מצרים הוא הלילה הזה ליהוה שמרים לכל בני ישראל לדרתם: (פ)

Segment 43
HE:
ויאמר יהוה אל משה ואהרן זאת חקת הפסח כל בן נכר לא יאכל בו:

Segment 44
HE:
וכל עבד איש מקנת כסף ומלתה אתו אז יאכל בו:

Segment 45
HE:
תושב ושכיר לא יאכל בו:

Segment 46
HE:
בבית אחד יאכל לא תוציא מן הבית מן הבשר חוצה ועצם לא תשברו בו:

Segment 47
HE:
כל עדת ישראל יעשו אתו:

Segment 48
HE:
וכי יגור אתך גר ועשה פסח ליהוה המול לו כל זכר ואז יקרב לעשתו והיה כאזרח הארץ וכל ערל לא יאכל בו:

Segment 49
HE:
תורה אחת יהיה לאזרח ולגר הגר בתוככם:

Segment 50
HE:
ויעשו כל בני ישראל כאשר צוה יהוה את משה ואת אהרן כן עשו: (ס)

Segment 51
HE:
ויהי בעצם היום הזה הוציא יהוה את בני ישראל מארץ מצרים על צבאתם: (פ)