Exodus Chapter 13
שמות פרק יג
Source: https://ajew.org/reader/tanach-shemos/1/13

Segment 1
HE:
שביעי  וידבר יהוה אל משה לאמר:

Segment 2
HE:
קדש לי כל בכור פטר כל רחם בבני ישראל באדם ובבהמה לי הוא:

Segment 3
HE:
ויאמר משה אל העם זכור את היום הזה אשר יצאתם ממצרים מבית עבדים כי בחזק יד הוציא יהוה אתכם מזה ולא יאכל חמץ:

Segment 4
HE:
היום אתם יצאים בחדש האביב:

Segment 5
HE:
והיה כי יביאך יהוה אל ארץ הכנעני והחתי והאמרי והחוי והיבוסי אשר נשבע לאבתיך לתת לך ארץ זבת חלב ודבש ועבדת את העבדה הזאת בחדש הזה:

Segment 6
HE:
שבעת ימים תאכל מצת וביום השביעי חג ליהוה:

Segment 7
HE:
מצות יאכל את שבעת הימים ולא יראה לך חמץ ולא יראה לך שאר בכל גבלך:

Segment 8
HE:
והגדת לבנך ביום ההוא לאמר בעבור זה עשה יהוה לי בצאתי ממצרים:

Segment 9
HE:
והיה לך לאות על ידך ולזכרון בין עיניך למען תהיה תורת יהוה בפיך כי ביד חזקה הוצאך יהוה ממצרים:

Segment 10
HE:
ושמרת את החקה הזאת למועדה מימים ימימה: (פ)

Segment 11
HE:
והיה כי יבאך יהוה אל ארץ הכנעני כאשר נשבע לך ולאבתיך ונתנה לך:

Segment 12
HE:
והעברת כל פטר רחם ליהוה וכל פטר שגר בהמה אשר יהיה לך הזכרים ליהוה:

Segment 13
HE:
וכל פטר חמר תפדה בשה ואם לא תפדה וערפתו וכל בכור אדם בבניך תפדה:

Segment 14
HE:
מפטיר  והיה כי ישאלך בנך מחר לאמר מה זאת ואמרת אליו בחזק יד הוציאנו יהוה ממצרים מבית עבדים:

Segment 15
HE:
ויהי כי הקשה פרעה לשלחנו ויהרג יהוה כל בכור בארץ מצרים מבכר אדם ועד בכור בהמה על כן אני זבח ליהוה כל פטר רחם הזכרים וכל בכור בני אפדה:

Segment 16
HE:
והיה לאות על ידכה ולטוטפת בין עיניך כי בחזק יד הוציאנו יהוה ממצרים: (ססס)

Segment 17
HE:
ויהי בשלח פרעה את העם ולא נחם אלהים דרך ארץ פלשתים כי קרוב הוא כי אמר אלהים פן ינחם העם בראתם מלחמה ושבו מצרימה:

Segment 18
HE:
ויסב אלהים את העם דרך המדבר ים סוף וחמשים עלו בני ישראל מארץ מצרים:

Segment 19
HE:
ויקח משה את עצמות יוסף עמו כי השבע השביע את בני ישראל לאמר פקד יפקד אלהים אתכם והעליתם את עצמתי מזה אתכם:

Segment 20
HE:
ויסעו מסכת ויחנו באתם בקצה המדבר:

Segment 21
HE:
ויהוה הלך לפניהם יומם בעמוד ענן לנחתם הדרך ולילה בעמוד אש להאיר להם ללכת יומם ולילה:

Segment 22
HE:
לא ימיש עמוד הענן יומם ועמוד האש לילה לפני העם: (פ)